ក្រុម​គីរីវង់​សុខ​សែន​ជ័យ បន្ថែម​សមាជិក​បរទេស​១​រូប​ទៀត​ ជា​ជនជាតិ​ជប៉ុន ត្រៀម​រដូវ​កាល​ថ្មី

​ក្លិប​បាល់ទាត់​គីរីវង់​សុខ​សែន​ជ័យ ដែលជា​បេក្ខភាព​១​ក្រុម​ក្នុងចំណោម​ក្លិប​បាល់ទាត់​ចំនួន​៣​ក្រុម ត្រូវ​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) ជ្រើសរើស​ជា​បេក្ខភាព​ដើម្បី​ចូលរួម​ប្រកួត​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League)​រដូវ​កាល​ឆ្នាំ​២០១៩ ខាងមុខ​ដើម្បី​បន្ថែម​និង​ជំនួស​ក្រុមបាល់ទាត់​វេ​ស្ទើ​ន​ភ្នំពេញ ដែល​ប្រកាស​រំសាយ​ក្រុម​កាលពីពេល​ថ្មីៗ ដោយសារ​បញ្ហា​ហិរញ្ញវត្ថុ​។

​យោង​តាម​ការ​បញ្ជាក់​នៅ​លើ​ហ្វេ​ស​ប៊ុ​ករ​បស់​ក្លិប ​ដែល​មាន​មូលដ្ឋាន​នៅ​ខេត្តតាកែវ មួយ​នេះ​បាន​បញ្ជាក់ថា ​កីឡាករ​ថ្មី​ជា​ជនជាតិ​ជប៉ុន​នេះ​មាន​ឈ្មោះថា RYUTO SASAKI មាន​កម្ពស់​១,៧៧​ម៉ែត្រ ហើយ​លេង​ក្នុង​តំណែង​ជា​ខ្សែបម្រើ​ប្រយុទ្ធ​។ រូបគេ​ធ្លាប់​លេង​នៅ​ទឹកដី​អឺរ៉ុប ដោយ​នៅ​ឆ្នាំ​២០១៧ បាន​ចូលរួម​ជាមួយ​ក្រុម FK Kom សមាជិក​ពានរង្វាន់​លី​គ​លំដាប់​ទី​២​របស់​ប្រទេស​ម៉ុង​តេ​ណេ​ក្រូ និង​បន្ត​ចូល​លេង​ឲ្យ​ក្លិប FK Berane នៅ​ឆ្នាំ​២០១៨ ខណៈ​នៅ​ជើង​ទី​២​បាន​ផ្លាស់​ទៅលេង​នៅ​ក្លិប NK Fuzinar លី​គ​ទី​២​ប្រទេស​ស្លូ​វ៉ា​នី​។

លោក Ekapob Potisai គ្រូ​បង្គោល​គិរីវង់​សុខ​សែន​ជ័យ ធ្លាប់​បាន​លើក​ឡើង​ថា ក្លិប​របស់លោក​បាន​ចុះកិច្ចសន្យា​ជាមួយ​កីឡាករ​បរទេស​៤​នាក់​រួចរាល់​ហើយ​ មុន​ដំណើរ​មកដល់​របស់​កីឡាករ Reiya Kinnoshita​។ កីឡាករ​ចាស់​ទាំង​៣​រូបនេះ​មាន​កីឡាករ​Souleymane Coulibaly ជនជាតិ​ម៉ាលី​, Marcio Santos ជនជាតិ​ប្រេ​ស៊ី​ល និង RYUTO SASAKI ជនជាតិ​ជប៉ុន​។ គ្រូបង្វឹក​ជនជាតិ​ថៃ​ជឿជាក់​ថា កីឡាករ​សមាជិក​ថ្មី​ទាំងអស់​អាចបំពេញ​ចំណុច​ខ្វះខាត​ក្នុង​ក្រុម​ជាពិសេស​ចាប់ពី​តំបន់​បម្រើ​ដល់​ប្រយុទ្ធ ហើយ​ថា ក្លិប​ក៏​កំពុង​ធ្វើតេស្ដ​កូតា​កីឡាករ​បរទេស​មួយចំនួន​ទៀត​ដែរ​។

ក្លិប​គីរីវង់​សុខ​សែន​ជ័យ បាន​ផ្លាស់ប្តូរ​ក្បាលម៉ាស៊ីន មួយចំនួន​ដោយមាន​ការដឹកនាំ​ពី​សំណាក់​គ្រូបង្វឹក​ថ្មី​គឺ​លោក Ekapob Potisai ដែលជា​អតីត​កីឡាករ​ជម្រើសជាតិ​ថៃ​និង​ជា​អតីត​គ្រូ​បង្គោល​នៃ​ក្លិប Savan United នៃ​លី​គ​កំពូល​ឡាវ​ផងដែរ​។ យ៉ាងណាក្តី​ក្លិប​នេះ​មាន​លោក​ សុខ ពុទ្ធិ​វុ​ធ ជា​ប្រធាន​ក្លិប​ហើយ​មាន​លោក ឌុ​ក វាសនា ជា​អ្នកចាត់ការ​ទូទៅ​របស់​ក្លិប​។ លោក ផាន់ ចាន់​ផាត ដែលជា​គ្រូបង្វឹក​ចាស់​ធ្លាប់បាន​ដឹកនាំ​ជាច្រើន​ឆ្នាំ​មកនេះ​ត្រូវបាន​ក្លិប​ប្តូរ​តួ​នាទី​ទៅជា​គ្រូ​ជំនួយ​វិញ​។

​ក្រុម​គីរីវង់​សុខ​សែន​ជ័យ បាន​ធ្លាក់​ទៅ​ចេញពី​ពានរង្វាន់​លី​គ​កំពូល​កម្ពុជា (Metfone Cambodian League) កាលពី​ឆ្នាំ​២០១៧ កន្លងទៅ​ក្រោយ​ឈរ​លេខ​រៀង​ទី​១២ ក្នុងចំណោម​ក្រុម​ជា​សមាជិក​ទាំង​១២​នៅ​ឆ្នាំ​នោះ​។ សម្រាប់​នៅ​ឆ្នាំ​២០១៨ កន្លងទៅនេះ​ក្រុម​គីរីវង់​សុខ​សែន​ជ័យ បាន​ចូលរួម​ក្នុង​ពានរង្វាន់​សម្តេច​អគ្គមហាសេនាបតី​តេ​ជោ ហ៊ុន សែន ដោយ​ចាញ់​ក្រុមយុវជន​សាលា​បាល់ទាត់​ជាតិ​បាទី ដោយ​លទ្ធផល ២​ទល់​១ ក្នុង​វគ្គ​ផ្តាច់ព្រ័ត្រ​ជើងឯក​ថ្នាក់​ខេត្ត​។ ប៉ុន្តែ​ពេល​ឡើងដល់​វគ្គ​ជម្រុះ​ថ្នាក់ជាតិ​បាន​ធ្លាក់​ត្រឹម​វគ្គ​១៦​ក្រុម​ចុងក្រោយ បន្ទាប់ពី​ចាញ់​ក្រុម​អគ្គស្នងការដ្ឋាន​នគរ​បាល​ជាតិ ដោយ​លទ្ធ​ផល៣ទល់២៕

Source: Kampuchea Thmey Daily