បន្ទាយមានជ័យ ៖ មានករណីគ្រោះថ្នាក់ចរាចរណ៍មួយ បានកើតឡើងរវាងរថយន្តCRVនិងរថយន្តIZUZU បុកគ្នាពេញទំហឹងលាន់ដូចរន្ទះបណ្តាលឲ្យមានអ្នកជិះក្នុងរថយន្តCRV រងរបួសធ្ងន់ស្រាលចំនួន៣នាក់នៅព្រឹក ថ្ងៃទី៤ ខែមីនា ឆ្នាំ២០១៩ នៅតាមបណ្ដោយផ្លូវជាតិលេខ៥ក្នុង ភូមិសូរិយា ឃុំគោក ស្រុកអូរជ្រៅ ខេត្តបន្ទាយមានជ័យ។
មន្ត្រីចរាចរណ៍បានប្រាប់កម្ពុជាថ្មីថា នៅមុនពេលកើតហេតុនោះមានរថយន្តម៉ាក CRV១គ្រឿងបើកពីលិចមកកើតយ៉ាងលឿន លុះបើកមកដល់ចំណុចកើតហេតុស្រាប់តែវាក់អ៊ើទៅនឹងសមត្ថកិច្ចស្រុកអូរជ្រៅ ដែលកំពុងធ្វើសកម្មភាពស្ទាក់ពួនចាប់រថយន្តបើកលើសល្បឿនកំណត់បណ្តាលឲ្យអ្នកបើកជាន់ហ្គាខ្លាំងធ្វើឲ្យល្បឿនកាន់តែលឿន ក៏ជ្រុលទៅបុករថយន្តIZUZUចង្កូតស្ដាំពណ៌ខ្មៅ ពាក់ស្លាកលេខSR ០២៧៧ បើកស្របទិសគ្នា បណ្តាលឲ្យបុកគ្នាពេញទំហឹងលាន់ដូចរន្ទះធ្វើឲ្យមនុស្សជិះនៅក្នុងរថយន្តCRVរងរបួសធ្ងន់ ស្រាល៣នាក់។
ក្រោយពីកើតហេតុហើយ អ្នករងរបួសធ្ងន់ស្រាលចំនួន៣នាក់ ត្រូវបានរថយន្តសង្គ្រោះដឹកយកទៅធ្វើការព្យាបាលនៅឯមន្ទីរពេទ្យសង្គ្រោះបន្ទាន់ភ្លាមៗផងដែរ។ ចំណែករថយន្ត CRVនិងIZUZU ខូចខាតយ៉ាងដំណំត្រូវបាន នគរបាលចរាចរណ៍ យកទៅរក្សាទុកនៅអធិការនគរបាលស្រុកអូរជ្រៅ ដើម្បីទុកដោះស្រាយនៅពេលក្រោយ៕
Source: Kampuchea Thmey Daily
0 Comments