អ្នកប្រដាល់កម្ពុជា ពុទ្ធ ឆាយរិទ្ធី ក្លិបពុទ្ធសេរីវង្សកីឡា បានផ្ដួល មី ឈូក (Mee Chhuok)អ្នកប្រដាល់ថៃចំណូលថ្មី នៅក្នុងទឹកទី៣ ក្នុងការជួបសាកកណ្ដាប់ដៃគ្នាក្នុងកម្មវិធីប្រដាល់Boostrong Fighter On Fire នៅសង្វៀនSEATV កាលពីព្រឹកថ្ងៃទី០៣ ខែមីនា ឆ្នាំ២០១៩។
ពុទ្ធ ឆាយរិទ្ធី ជួប មី ឈូក ក្នុងទម្ងន់៦៧គីឡូក្រាម។ អ្នកប្រដាល់ថៃរូបនេះ ទើបតែមកស្រុកខ្មែរជាលើកទី១ប៉ុណ្ណោះ។ ដូចការរំពឹងទុកមុនថា មី ឈូកនេះ មិនអាចឈ្នះពុទ្ធ ឆាយរិទ្ធី នោះឡើយ ដោយសារអ្នកប្រដាល់ថៃរូបនេះ មានបទពិសោធន៍មិនជាល្អនិងខ្លាំងជាង ឆាយរិទ្ធី នោះឡើយ។
មី ឈូក ដែលមានកាយសម្បទារាងតូចជាង ឆាយ រិទ្ធី ផងនោះ បានធ្វើឲ្យ ឆាយរិទ្ធី សង្គ្រប់វាយមិនដកដៃ និងជើងនោះទេ។ នៅក្នុងការប្រកួតទឹកទី២ មី ឈូក ត្រូវ ឆាយរិទ្ធី ប្រើជង្គង់ហោះ និងវាយកែងត្រូវក្បាលដួលលើរេញ ត្រូវអាជ្ញាកណ្ដាលរាប់៨ម្តង។ បន្ទាប់មក ក្នុងទឹកទី៣ មី ឈូក ត្រូវឆាយរិទ្ធី ទាត់ត្រូវដៃ និងក្បាល ហើយគេក៏ដួលបោះបង់ការប្រកួត តែម្តង ក្រោយពេលអាជ្ញាកណ្ដាលរាប់ដល់ដប់ហើយ តែគេមិនបន្តការប្រកួតនោះ។
ពុទ្ធ ឆាយរិទ្ធី ឥឡូវនេះគេមានការវិវត្តន៍ខាងក្បាច់គុនច្រើន គួបផ្សំនឹងការខំប្រឹងហ្វឹកហាត់ទៀត ឃើញថា គេខ្លាំង និងល្អជាងមុន។ ឆាយរិទ្ធី គេមានកំណត់ត្រាប្រកួត១១៨លើក ឈ្នះ៩១លើក ចាញ់២៥លើក និងស្មើ០២លើក ខណៈដែល មី ឈូក គេមានប្រវត្តិប្រកួតចំនួន៦៩លើក ឈ្នះ៥៩លើក និង ចាញ់១០លើក មិនដែលស្មើ។
ចំណែក ការប្រកួតរវាងអ្នកប្រដាល់រួមជាតិវិញ លីន វិរៈ អ្នកប្រដាល់ក្លិបបូរីរាជសីហ៍មានរិទ្ធ បានផ្តួល ហេង សុភ័ក្រ អ្នកប្រដាល់ក្លិបព្រៃទទឹងខេត្តបាត់ដំបង ក្នុងទឹកទី៣។ សុភ័ក្រ គេមានបញ្ហាដៃខាងស្តាំ ដោយសារតែរងនូវទម្ងន់ជើងទាត់របស់ លីន វិរៈ។
យ៉ាម ខេមរា អ្នកប្រដាល់ក្លិបរស្មីកុមារកំព្រា ក៏បានផ្ដួល ធឿន វិថាត់ អ្នកប្រដាល់ក្លិប អប់រំកាយកីឡាស្រុកអន្លង់វែង ក្នុងទឹកទី២ ដោយរាប់៨ចំនួន២លើក បន្ទាប់មកក៏ត្រូវខេមរាវាយឲ្យសន្លប់តែម្តង។ ឯ អេ ហនុមាន អ្នកប្រដាល់ក្លិបអេភូថងកីឡា បានវាយឈ្នះ ឡុង ណងសៅ អ្នកប្រដាល់ក្លិបសាលវ័ន្តកីឡា នៅក្នុងទឹកទី៤ ដោយសារខូចជើង។
•ជម្រុះខ្សែក្រវាត់Wurkz ជុំទី៣ ៖ សារឿន ច័ន្ទ ចាញ់ Super Man ទឹក១ ឯ ហេង វាសនា ចាញ់ Chhai Yo ដោយពិន្ទុ
ការប្រកួតជម្រុះដណ្ដើមខ្សែក្រវាត់ជើងឯកWurkz ទម្ងន់៦០គីឡូក្រាម នៅសង្វៀនទូរទស្សន៍SEATV នារសៀលថ្ងៃអាទិត្យទី០៣ ខែមីនា ឆ្នាំ២០១៩ ដែលជាការប្រកួតជម្រុះជុំទី៣ រវាងអ្នកប្រដាល់កម្ពុជា សារឿន ច័ន្ទ ក្លិបតាព្រហ្មមានជ័យ និងអ្នកប្រដាល់ថៃ Super Man ហើយអ្នកប្រដាល់កម្ពុជា ហេង វាសនា ក្លិបព្រៃទទឹង ខេត្តបាត់ដំបង និងអ្នកប្រដាល់ថៃ Chhai Yo នោះ ខ្មែរយើងចាញ់ទាំងពីរនាក់។
សារឿន ច័ន្ទ គេវាយចាញ់ Super Man ក្នុងទឹកទី១ បន្ទាប់ពីត្រូវថៃទាត់ផ្កាប់ចានត្រូវកញ្ចឹង.ក ធ្វើឲ្យគេវង្វេងទិស។ អាជ្ញាកណ្ដាលរាប់ដល់៨ ហើយ តែសារឿន ច័ន្ទ នៅមិនទាន់ស្វាង និងយល់ព្រមបន្តការប្រកួតនោះឡើយ ធ្វើឲ្យអាជ្ញាកណ្ដាលរាប់បន្តដល់ដប់តែម្តង ដែលមានន័យថា សារឿន ច័ន្ទ បោះបង់ការប្រកួតនោះ។
កាលពីប្រកួតជុំទី២ សារឿន ច័ន្ទ បានវាយឈ្នះអ្នកប្រដាល់ថៃ Chhav Vallit ក្នុងទឹកទី៣ ហើយជុំទី៣នេះ ចាញ់ Super Man សរុប៣ប្រកួត៣ជុំ សារឿន ច័ន្ទ បាន៥ពិន្ទុ ក្នុងបីប្រកួតបូកទាំង១ប្រកួតរបស់ចាន់ សំអាត ផង។ ចំពោះអ្នកប្រដាល់ថៃ Super Man គេបាន៩ពិន្ទុ ដោយវាយឈ្នះទាំង៣ជុំ។
ចំពោះការជួបគ្នារវាង ហេង វាសនានិង Chhai Yo វិញ ឃើញថា Chhai Yo មានប្រៀបលើវាសនាសឹងតែគ្រប់ទឹក ក្នុងការប្រកួត៥ទឹកនោះ។ ចប់ការប្រកួត ហេង វាសនា ចាញ់ Chhai Yo ដោយពិន្ទុ។
ជាមួយនឹងការបរាជ័យនេះ ហេង វាសនា ៣ប្រកួត វាយចាញ់២ ឈ្នះ១ប្រកួត បាន៥ពិន្ទុ ហើយអ្នកប្រដាល់ថៃ Chhai Yo ឆ្លងកាត់៣ប្រកួតដូចគ្នា គេឈ្នះ២ ចាញ់១ប្រកួតបាន៧ពិន្ទុ។
ព្រឹត្តិការណ៍ដណ្តើមខ្សែក្រវាត់Wurkz រដូវកាលទី៣ ទម្ងន់៦០គីឡូក្រាម មានអ្នកប្រដាល់ជើងខ្លាំងកម្ពុជា៤រូប និង អ្នកប្រដាល់ជើងខ្លាំងថៃ៤រូប។ ការប្រកួត គឺពុំមានវគ្គពាក់កណ្ដាលផ្ដាច់ព្រ័ត្រទេ គឺគេជ្រើសរើសយកតែអ្នកលេខ១ក្នុងពូល ទាំងពូលខ្មែរនិងពូលថៃ តែប៉ុណ្ណោះ សម្រាប់ឡើងទៅជួបគ្នាក្នុងវគ្គផ្ដាច់ព្រ័ត្រដណ្ដើមខ្សែក្រវាត់តែម្តង។
វ៉ាន់ វឿនផ្តួល Banda Sakទឹក១ ក្នុងជម្រុះខ្សែក្រវាត់Carabao ជុំចុងក្រោយ ខណៈ សេន កុសល ឈ្នះដោយស្វ័យប្រវត្តិ
ការប្រកួតជម្រុះដណ្តើមខ្សែក្រវាត់ជើងឯកCarabao ទម្ងន់៥៧ គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ ទី០២ ខែកុម្ភៈ ឆ្នាំ២០១៩ ដែលជាការប្រកួតជុំចុងក្រោយរបស់អ្នកប្រដាល់កម្ពុជាវ៉ាន់ វឿន ក្លិបឃ្លាំងមឿងកីឡានោះ វ៉ាន់ វឿន បានផ្ដួលដៃគូប្រកួតគឺ អ្នកប្រដាល់ថៃ Banda Sak ឲ្យបោះបង់ចោលការប្រកួតក្នុងទឹកទី១ប៉ុណ្ណោះ។
ចំណែក អ្នកប្រដាល់កម្ពុជាសេន កុសល ក្លិបមោងឬស្សីមរតកគុនខ្មែរ ដែលត្រូវជួបអ្នកប្រដាល់ថៃ Dek Doeur នោះ គេបានឈ្នះដោយស្វ័យប្រវត្តិ ដោយមិនចាំបាច់ប្រកួត ដោយសារតែដៃគូប្រកួតរបស់គេគឺ Dek Doeur បានបោះបង់ចោលការប្រកួតតាំងពីជុំទី២មកម្ល៉េះ ដែលធ្វើអ្នកប្រដាល់ណាប៉ះជាមួយគេ នឹងត្រូវឈ្នះដោយស្វ័យប្រវត្តិតែម្តង។
ជាមួយនឹងជ័យជម្នះនេះ វ៉ាន់ វឿន គេបាន១២ពិន្ទុ ក្នុងការប្រកួត៤ប្រកួត(៤ជុំ)ដោយគេវាយឈ្នះទាំង៤ប្រកួត។ ចំណែក ការប្រកួតរបស់Banda Sak គេចាញ់ទាំង៤ជុំ បាន៤ពិន្ទុប៉ុណ្ណោះ គឺធ្លាក់ហើយ។ រីឯ សេន កុសល វិញ ក៏បាន១២ពិន្ទុដែរ ក្នុង៤ប្រកួត។
សម្រាប់វគ្គផ្ដាច់ព្រ័ត្រវិញ គឺតម្រូវរើសយកតែម្នាក់ប៉ុណ្ណោះក្នុងមួយពូល គឺលេខ១ពូលកម្ពុជា ជួបប្រកួតជាមួយ លេខ១ ពូលថៃ។
សូមបញ្ជាក់ថា សេន កុសល បើទោះជាបានឈ្នះដោយស្វ័យប្រវត្តិលើគូខ្សែក្រវាត់ក្តី គេក៏នៅតែតម្រូវឲ្យឡើងប្រកួតជាមួយអ្នកប្រដាល់ថៃម្នាក់ផ្សេងទៀត នោះគឺRoung Sayam ជាលក្ខណៈមិត្តភាពអន្តរជាតិ ក្នុងប្រភេទទម្ងន់៥៧គីឡូក្រាមដែរ។ ក្នុងការប្រកួតមិត្តភាពនេះ សេន កុសល ត្រូវRoung Sayam វាយឲ្យបោះបង់ការប្រកួតក្នុងទឹកទី៣៕
Source: Kampuchea Thmey Daily
0 Comments