ភ្នំពេញ ៖ បុរស/ស្ដ្រី ពីរនាក់ប្ដីប្រពន្ធ បាននាំគ្នាមកដាក់ពាក្យបណ្ដឹងនៅប៉ុស្តិ៍នគរបាលចោមចៅ៣ ដោយបានអះអាងថា ខ្លួនត្រូវបានចោរចូលលួចយកម៉ូតូ១គ្រឿង និងកាបូបលុយ ក្នុងនោះ បើសរុបជាលុយ ប្ដី ថាអស់ជាងពីរម៉ឺនដុល្លារ ឯនាងប្រពន្ធថាអស់ជាងមួយម៉ឺនដុល្លារ ហើយដឹងថាបាត់តាំងពីពាក់កណ្ដាលអធ្រាត្រ លុះដល់វេលាយប់ជិតដល់ពាក់កណ្ដាលអធ្រាត្រវិញ ទើបនាំគ្នាមកប្ដឹង ព្រោះថារវល់ដើររកចោរសិន។
ជនរងគ្រោះបានឲ្យដឹងថា កាលពីវេលាម៉ោង៨និង៣០នាទីយប់ ថ្ងៃទី០២ ខែមីនា ឆ្នាំ២០១៩ ម៉ូតូសេ១២៥មួយគ្រឿង ត្រូវបានជនសង្ស័យលួចយកទៅបាត់ ដោយសុវត្ថិភាព រួមទាំងកាបូបលុយទៀតផង សរុបជាលុយអស់រាប់ម៉ឺនដុល្លារ ខ្សែកមាស២ខ្សែ ទម្ងន់៦តម្លឹង តែបញ្ហានេះ ប្ដី ប្រពន្ធទាំងពីរនាក់នេះ បានប្រកែកគ្នាមិនច្បាស់ថា បាត់ចំនួនប៉ុន្មានឲ្យពិតប្រាកដឡើយ។
បុរសជាប្តីបានឲ្យដឹងថា កាលពីវេលាម៉ោង១១យប់ ថ្ងៃទី០១ ខែមីនា ឆ្នាំ២០១៩ គាត់ជិះម៉ូតូវិលមកពីផ្ទះបងប្អូននៅម្តុំវត្តសំរោងអណ្តែត ខណ្ឌសែនសុខវិញ បន្ទាប់ពី អូសម៉ូតូដាក់ចូលក្នុងផ្ទះហើយ បានចូលទៅងូតទឹក ហើយ ដោយអស់កម្លាំងពេកទើបប្រះខ្លួនដេកលង់លក់ដោយភ្លេចបិទទ្វារផ្ទះ លុះមកដល់វេលាពាក់កណ្ដាលអធ្រាត្រ ឈានចូលថ្ងៃទី២មីនា ពេលភ្ញាក់ដឹងខ្លួនឡើង ស្រាប់តែបាត់ម៉ូតូរួមទាំងកាបូបលុយតែម្ដង។
ជនរងគ្រោះជាប្តី ឈ្មោះ សូ ពៅ អាយុ៣៩ឆ្នាំ មុខរបរជាងជួសជុលម៉ូតូ ចំណែកប្រពន្ធ ឈ្មោះ លន់ ស៊ីណា មុខរបរមេផ្ទះ ស្នាក់នៅផ្ទះជួលនៅភូមិជំពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ ទើបបាន២ខែប៉ុណ្ណោះ មានស្រុកកំណើតភូមិកំពង់ថ្នល់ ឃុំល្វា ស្រុកព្រះស្តេច ខេត្តព្រៃវែង។
ចំណែកម៉ូតូដែលចោរលួចយកទៅបាត់នោះ ម៉ាកហុងដាឌ្រីម ពណ៌ខ្មៅ សេ១២៥ ស៊េរី២០១៩ ពាក់ស្លាកលេខ ព្រៃវែង 1O-3911។ លុយដែលថា ចោរលួចទាំងកាបូបនោះពីរនាក់ប្ដីប្រពន្ធនេះ និយាយមិនត្រូវគ្នាសោះ ដោយប្តីថាបាត់អស់២៣.៥០០ដុល្លារ លុយខ្មែរជាង៣០ម៉ឺនរៀល ខ្សែកមាស២ខ្សែទម្ងន់៦តម្លឹង។ ចំណែកប្រពន្ធថា បាត់តែ១ម៉ឺនដុល្លារ លុយខ្មែរជាង៣០ម៉ឺនរៀល ខ្សែកមាស២ខ្សែ ទម្ងន់៦តម្លឹង ប្រកែកគ្នារឿងបាត់លុយរវាងប្តី-ប្រពន្ធ ដែលមើលទៅហាក់មិនប្រក្រតីសោះ។
សមត្ថកិច្ចបានឲ្យដឹងថា ប្ដីប្រពន្ធ១គូនេះ ក្រោយពីបាត់ម៉ូតូ និងកាបូបលុយកាលពីយប់រំលងអធ្រាត្រនៅថ្ងៃទី០២មីនា ដោយចោរលួចមិនបានទៅប្តឹងភ្លាមៗនោះទេ រវល់តែតាមស្វែងរកចោរ រហូតដល់វេលាម៉ោង៨និង៣០នាទីយប់ ថ្ងៃទី២មីនា ទើបនាំគ្នារត់ទៅដាក់ពាក្យបណ្តឹងដើម្បីឲ្យសមត្ថកិច្ចជួយស្រាវជ្រាវ ដូច្នេះឃើញថា ទុកពេលពេញ១ថ្ងៃ បាត់តាំងពីយប់រំលងអធ្រាត្រ លុះរហូតមកដល់ម៉ោងជិត៩យប់វិញ ទើបនាំគ្នាមកប្ដឹងសមត្ថកិច្ច ហើយនិយាយមិនត្រូវគ្នាទៀតផង៕
Source: Kampuchea Thmey Daily
0 Comments