ស្វាមីសញ្ជាតិហូឡង់របស់ Shamima Begum ដែលជាយុវតីដើមកំណើតអង់គ្លេសដែលបានភៀសខ្លួនទៅចូលរួមក្នុងក្រុមរដ្ឋឥស្លាមគឺចង់រស់នៅជាមួយនាងនៅក្នុងប្រទេសហូឡង់។ នេះបើតាមសំដីរបស់គាត់ក្នុងបទសម្ភាសន៍មួយកាលពីថ្ងៃអាទិត្យពីមន្ទីរឃុំឃាំងនៅក្នុងប្រទេសស៊ីរី។
លោក Yago Riedijk ដែលកំពុងត្រូវបានគេឃុំខ្លួនក្នុងមណ្ឌលឃុំឃាំងរបស់ពួកឃើដនៅភាគឦសានប្រទេសស៊ីរីបានរៀបការជាមួយនាង Begum ប៉ុន្មានថ្ងៃបន្ទាប់ពីនាងបានមកដល់ដែនដីដែលកាន់កាប់ដោយក្រុម IS នៅពេលគាត់មានអាយុ២៣ឆ្នាំហើយនាងមានអាយុ១៥ឆ្នាំ។
នាង Begum អាយុ១៩ឆ្នាំមកពីភាគខាងកើតទីក្រុងឡុងដ៍ហើយឥឡូវនេះកំពុងស្ថិតនៅក្នុងជំរំជនភៀសខ្លួនបាននិយាយថា នាងចង់វិលត្រលប់ទៅកាន់ប្រទេសអង់គ្លេសវិញប៉ុន្តែត្រូវបានរដ្ឋាភិបាលដកហូតសញ្ជាតិដោយសារតែចាត់ទុកថា នាងជាការគំរាមកំហែងផ្នែកសន្តិសុខ។
លោក Riedijk អាយុ២៧ឆ្នាំបាននិយាយថា ឥឡូវនេះគាត់បានច្រានចោលក្រុម IS បន្ទាប់ពីបានប្រយុទ្ធឲ្យក្រុមជីហាដនេះ។ ផ្ទុយទៅវិញ គាត់ចង់វិលត្រលប់ទៅប្រទេសហូឡង់វិញជាមួយប្រពន្ធនិងកូនប្រុសទើបនឹងកើតរបស់ពួកគេ។ កូនពីរនាក់ដំបូងរបស់ពួកគេបានស្លាប់ទៅហើយ។
គាត់បាននិយាយថា “ខ្ញុំចង់ត្រលប់ទៅប្រទេសរបស់ខ្ញុំវិញ។ នៅពេលនេះ ខ្ញុំយល់ពីសិទ្ធិដែលខ្ញុំបានរស់នៅជាមួយនិងឯកសិទ្ធិរស់នៅទីនោះក្នុងនាមជាពលរដ្ឋមួយរូប”។
នៅពេលត្រូវបានសួរថាតើគាត់គិតថាការរៀបការជាមួយក្មេងស្រីដែលមានអាយុប៉ុននោះអាចទទួលយកបានដែរឬទេ គាត់បានទទួលស្គាល់ថា នាង “ក្មេងណាស់”។
លោក Riedijk មកពីទីក្រុង Arnhem បានប្រាប់ BBC ថា គាត់ត្រូវបានគេដាក់ពន្ធនាគារនិងធ្វើទារុណកម្មបន្ទាប់ពីក្រុម IS សង្ស័យថាគាត់ជាចារកម្មហូឡង់។ គាត់បានចុះចូលពួកយុទ្ធជនស៊ីរី។
ទោះបីជាយ៉ាងណាក៏ដោយ គាត់បាននិយាយថា គាត់មិនបានមើលឃើញពីរបៀបដែលនាង Begum អាចត្រូវបានចាត់ទុកថាជាការគំរាមកំហែងដោយអាជ្ញាធរអង់គ្លេសទេ។
ករណីរបស់ Begum បានគូសបញ្ជាក់ពីទុក្ខលំបាកដែលប្រទេសអឺរ៉ុបជាច្រើនត្រូវប្រឈមមុខនិងបែកបាក់គ្នាទៅលើថាតើត្រូវអនុញ្ញាតឲ្យជនជីហាដនិងអ្នកគាំទ្រក្រុម IS ចូលក្នុងប្រទេសដើម្បីប្រឈមមុខនឹងការចោទប្រកាន់ឬក៏រារាំងពួកគេ៕ AFP
Source: Kampuchea Thmey Daily
0 Comments