ភ្នំពេញ ៖ ប៉ូលិសបានចាប់ខ្លួនបុរសម្នាក់ បញ្ជូនទៅតុលាការ ក្រោយពីបានទទួលបណ្តឹង និងស្រាវជ្រាវរកឃើញថា បុរសរូបនេះ បានប្រើល្បិចសុំខ្ចីម៉ូតូគេជិះ តែបែរជាយកទៅដាក់បញ្ចាំ មានទោស ពីបទរំលោភទំនុកចិត្ត ដែលហេតុការណ៍នេះបានកើតឡើងកាលពីថ្ងៃទី៣ ខែមីនា ឆ្នាំ២០១៩នៅសង្កាត់ភ្នំពេញថ្មី ខណ្ឌសែនសុខ។
ឈ្មោះ សុខ ធារ៉ា ហៅឆ្អឹង ហៅវែង ភេទប្រុស អាយុ២៥ឆ្នាំ គ្មានមុខរបរពិតប្រាកដ ស្នាក់នៅផ្ទះជួលម្តុំភូមិបាយ៉ាប សង្កាត់ភ្នំពេញថ្មី ជាជនដែលត្រូវបានគេចោទប្រកាន់ និងចាប់ខ្លួនខាងលើ។
ប៉ូលិសនិយាយថា ជនសង្ស័យ ឈ្មោះ សុខ ធារ៉ា ត្រូវបានឃាត់ខ្លួនតាមបណ្ដឹងរបស់ លោក ហ៊ី បញ្ញា អាយុ២៦ឆ្នាំ មានទីលំនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ។
លោក ហ៊ី បញ្ញា បានរៀបរាប់នៅក្នុងខ្លឹមសារបណ្តឹងរបស់លោកថា នៅមុនពេលកើតហេតុ លោកបានជិះម៉ូតូផ្ទាល់ខ្លួនម៉ាកស៊ុយហ្ស៊ុយគីនិច ស៊េរីឆ្នាំ២០១៩ ពាក់ស្លាកលេខភ្នំពេញ1HL.0327ទៅលេងផ្ទះមិត្តភ័ក្ដិម្នាក់ ឈ្មោះ ហង្ស វិរសត្យា នៅផ្ទះជួលភូមិភ្នំពេញថ្មី។ នៅគ្រានោះដែរ ឈ្មោះ សុខ ធារ៉ា បានទូរស័ព្ទ មកឈ្មោះ ហង្ស វីរសត្យា ឲ្យជិះម៉ូតូមកដឹកខ្លួនមកលេង ដើម្បីបបួលគ្នាផឹកស៊ីជុំគ្នានៅផ្ទះរបស់ ឈ្មោះ ហង្ស វីរសត្យា។ ក្រោយពេលផឹកស៊ីមួយស្របក់ជន ឈ្មោះ សុខ ធារ៉ា បានប្រើល្បិចសុំម៉ូតូរបស់គាត់(ហ៊ី បញ្ញា)ដោយប្រាប់ថា ទៅតែមួយភ្លែតទេ ដើម្បីយកលុយគេជំពាក់នៅម្តុំផ្សារស៊ិនជូរី ផ្លាហ្សា នៅពោធិចិនតុង។
នៅពេលនោះខ្លួន ក៏បានប្រគល់សោម៉ូតូឲ្យតាមសំណូមពរ នៅវេលាម៉ោង១២និង៣០នាទី ថ្ងៃទី៣ ខែមីនា ឆ្នាំ២០១៩។ ក្រោយមកជន ឈ្មោះ សុខ ធារ៉ា ទៅបាត់មិនឃើញត្រឡប់យកម៉ូតូមកឲ្យវិញ ចំណែកឯទូរស័ព្ទក៏បិទទៀត មិនអាចទាក់ទងបានទើបនាំគ្នាឈប់ផឹកស៊ីដើរស្វែងរកដើម្បីយកម៉ូតូមកវិញ។
ក្រោយមក ជនរងគ្រោះ បានប្រទះឃើញជន ឈ្មោះ សុខ ធារ៉ា នៅម្តុំភូមិបាយ៉ាប សង្កាត់ភ្នំពេញថ្មី នៅសួរនាំរកម៉ូតូមិនឃើញ ក៏បានដាល់មួយដៃ និងទាត់មួយជើងទៀតបណ្តាលឲ្យរបួសបែកចិញ្ចើម បង្កការភ្ញាក់ផ្អើលនៅទីនោះ រួចចាប់ខ្លួននាំយកមកប្រគល់ឲ្យប៉ូលិសមូលដ្ឋានចាត់ការតាមផ្លូវច្បាប់ ដែលនៅប៉ូលិសចាប់ខ្លួនបានត្រួតពិនិត្យទឹកនោមជននេះ មានផ្ទុកនូវធាតុថ្នាំញៀន។
ជនសង្ស័យបានសារភាពថា ម៉ូតូនោះខ្លួនបានឲ្យបក្សពួកម្នាក់ ឈ្មោះ ហុក ភេទប្រុស អាយុ៣៣ឆ្នាំ គ្មានមុខរបរ និងទីលំនៅមិនច្បាស់លាស់ យកទៅលក់(ដាក់បញ្ចាំ) ប៉ុន្តែគេក៏គេចខ្លួនបាត់មិនឃើញត្រឡប់មកវិញ។
ប៉ូលិសនិយាយថា នេះគ្រាន់តែជាពាក្យដោះសារបស់គេប៉ុណ្ណោះ៕
Source: Kampuchea Thmey Daily
0 Comments