ប្រដាល់ ៖ វង្ស វិឆ័យ អ្នកប្រដាល់កម្ពុជា នៃក្លិបកងពលតូចទ័ពឆ័ត្រយោង៩១១ និង រិទ្ធ ភូលូ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនខារ៉ាបាវស្ទឹងមានជ័យ នាយប់ថ្ងៃអាទិត្យ ទី៣១ ខែមីនា ឆ្នាំ២០១៩នេះ។
វង្ស វិឆ័យ គេនឹងត្រូវជួបប្រកួតជាមួយអ្នកប្រដាល់ថៃ ចែគស្យ៉ាម ចែគស្យ៉ាមជីម (Jacksiam Jacksiam Gym)។ ពួកគេទាំងពីរ នឹងជួបប្រកួតគ្នាក្នុងប្រភេទទម្ងន់៧១គីឡូក្រាម។
ចែគស្យ៉ាម គេធ្លាប់មកប្រកួតនៅកម្ពុជាប៉ុន្មានលើកហើយកន្លងមក។ អ្នកប្រដាល់ថៃរូបនេះ ខ្លាំងគួរសមដែរ។ នេះបើតាមអ្នកដឹកនាំកីឡាករថៃមកប្រកួតឲ្យដឹង។
ទោះជាយ៉ាងណា ចែគស្យ៉ាម ជួបជាមួយ វង្ស វិឆ័យលើកនេះ ក៏មិនជាធានាប៉ុន្មានដែរ ព្រោះ វង្ស វិឆ័យ គេបានត្រៀមខ្លួនយ៉ាងល្អ សម្រាប់ការប្រកួតនេះ។ យ៉ាងណា វង្ស វិឆ័យ លើកនេះ អាចថាគេមានការប្រុងប្រយ័ត្នជាងមុន ដែលធ្វើឲ្យ ចែគស្យ៉ាម ពិបាកសង្ឃឹមឈ្នះណាស់។
ចែគស្យ៉ាម បើតាមអ្នកផ្គូផ្គងឲ្យដឹងនោះ គេមានកំណត់ត្រាប្រកួត៧៩លើក ឈ្នះ៦២លើក ចាញ់១៦លើក ស្មើ០១លើក និងធ្លាប់វាយដៃគូឲ្យសន្លប់ជាង២០លើកឯណោះ។ យ៉ាងណាបើធៀបជាមួយប្រវត្តិប្រកួតរបស់វង្ស វិឆ័យ ក៏នៅតែច្រើនជាង វិឆ័យ ដែរ ដោយ វង្សវិឆ័យ មានកំណត់ត្រាប្រកួតតែ២៦លើក ឈ្នះ២២លើក ចាញ់០៤លើក មិនដែលស្មើ។
ដូច្នេះ វង្ស វិឆ័យ មិនអាចមើលងាយ ចែគស្យ៉ាម បានឡើយ ព្រោះអ្នកប្រដាល់ថៃរូបនេះ ទើបតែស្គាល់ចាញ់១៦លើកប៉ុណ្ណោះ ក្នុងការប្រកួតជាង៨០លើកនោះ។
ចាំមើល វង្ស វិឆ័យ និង ចែគស្យ៉ាម នេះ តើនរណាជាអ្នកឈ្នះ? ក្នុងការជួបគ្នាលើកដំបូងនេះ។ វង្ស វិឆ័យ គេប្រកួតចុងក្រោយនេះ វាយឈ្នះអ្នកប្រដាល់ថៃហានមើ (Harnmer Chak Kravan Muay Thai) ក្នុងទឹកទី៤ កាលពីថ្ងៃទី១៥ ខែមីនា ឆ្នាំ២០១៩កន្លងទៅនេះ។
ចំពោះ រិទ្ធ ភូលូ អ្នកប្រដាល់ជើងខ្លាំងស្រករក្រោយកម្ពុជា នៃក្លិបថ្មគោលពោធិ៍សែនជ័យវិញ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃជើងចាស់ រិទ្ធ អៃរ៉ា (Rith iara Luk mnuenpetch) ដោយប្រកួតគ្នាក្នុងទម្ងន់៦៣,៥០០គ.ក្រ។ ពីរនាក់នេះ ពុំធ្លាប់ដែលប៉ះគ្នាម្តង ណានៅឡើយទេកន្លងមក។
រិទ្ធ ភូលូ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃ១១លើក និងឡាវ២លើកប៉ុណ្ណោះ។ ដូច្នេះ លើកនេះជាលើកទី១២ ដែលគេជួបប្រកួតជាមួយថៃនោះ។ ក្នុងការជួបប្រកួតជាមួយថៃ១០នោះ ភូលូ វាយឈ្នះ៨ លើកនិងចាញ់២ លើកប៉ុណ្ណោះ។
ភូលូ មានប្រវត្តិប្រកួតប្រមាណ៥៩លើក ក្នុងនោះវាយឈ្នះ៤៤លើក ចាញ់១៣លើក និងស្មើ០២លើក ហើយធ្លាប់ផ្ដួលគូប្រកួតឲ្យសន្លប់បានចំនួន២០លើក។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ភូលូ អាចយកឈ្នះ រិទ្ធ អៃរ៉ា បានឬក៏អត់នោះទេ?។
រិទ្ធ អៃរ៉ា ដែលមុននេះ គេមានឈ្មោះថា WiFi ធ្លាប់វាយចាញ់ ផល សោភ័ណ្ឌ ពីរដង រួចមកហើយកាលពីពេលកន្លងមក។ អ្នកប្រដាល់ថៃរូបនេះ មានប្រវត្តិប្រកួត១១៤លើក ក្នុងនោះ គេវាយឈ្នះ៨៨ លើក ចាញ់២៣លើក និងស្មើ០៣លើក។
អ្នកប្រដាល់ជើងចាស់ រិទ្ធ អៃរ៉ា នេះ ធ្លាប់វាយចាញ់ចាន់ រតនា ក្លិបខ្លាហោះម្តង កាលពីជាងមួយឆ្នាំមុន នៅសង្វៀនបាយ័ននេះ។ ហើយគេធ្លាប់ផ្ដួលដៃគូប្រកួតឲ្យសន្លប់បានចំនួន១៥លើក។
រិទ្ធ អៃរ៉ា ជាជើងខ្លាំង ដោយមានស្នៀតទាត់ និងកណ្ដាប់ដៃល្អ។ ដូច្នេះ រិទ្ធភូលូ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អ និងខ្លាំង។ តែបើអាចឈ្នះបាន គឺមានតែការវាយប្ដូរកែងមួយមុខគត់ ដែលប្រថុយដូរជាមួយនឹងជ័យជំនះ។ ចាំមើល រវាង រិទ្ធ ភូលូ និង រិទ្ធ អៃរ៉ា តើនរណាជាអ្នកឈ្នះនៅក្នុងការជួបគ្នានេះ?៕
Source: Kampuchea Thmey Daily
0 Comments