ភ្លៀងកក់ខែ លាយឡំខ្យល់កន្ត្រាក់រំលំ ប៉ើងដំបូលផ្ទះ៣២ខ្នង និងសាលារៀន២ខ្នងនៅ ស្រុក ក្រុង៤ ក្នុងបន្ទាយមានជ័យ

Cambodia News March 28, 2019

បន្ទាយមានជ័យ ៖ នៅល្ងាច ថ្ងៃទី២៧ ខែមីនា ឆ្នាំ២០១៩ នៅខេត្តបន្ទាយមានជ័យ មានភ្លៀងកក់ខែមួយមេយ៉ាងធំ លាយឡំខ្យល់កន្ត្រាក់បោកបក់ចំនៅស្រុក ក្រុងមួយចំនួនក្នុងខេត្តបន្ទាយមានជ័យបណ្ដាលឲ្យខូចខាតផ្ទះ សាលារៀន សរុប៣២ខ្នង របើកដំបូលផ្ទះ២៦ខ្នង តូបលក់អីវ៉ាន់១ខ្នង សាលារៀន២ខ្នង រោងដាក់សម្ភារៈ២ខ្នង ខ្ចុះ១ខ្នង របើកស័ង្កសីសរុបចំនួន៤៤១សន្លឹក។

លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានប្រាប់អ្នកយកព័ត៌មានថា នៅល្ងាច ថ្ងៃទី២៧ នេះ ស្រាប់មានភ្លៀងកក់ខែលាយឡំខ្យល់កន្ត្រាក់បោកបក់ប៉ះចំស្រុកថ្មពួក បណ្តាលឲ្យផ្ទះប្រជាពលរដ្ឋខូចខាត៨ខ្នង របើកដំបូលផ្ទះ៤ខ្នង,សាលារៀន២ខ្នង រោងដាក់សម្ភារៈ១ខ្នង តូបលក់អីវ៉ាន់១ របើកស័ង្កសី២០៩សន្លឹក ចំណែកនៅស្រុកស្វាយចេកខូចខាត៥ខ្នងរបើកដំបូលផ្ទះ៥ខ្នងរបើកស័ង្កសី៦២សន្លឹក នៅស្រុកព្រះនេត្រព្រះ ខូចខាត៥ខ្នងរបើកដំបូលផ្ទះ៥ខ្នងរបើកស័ង្កសី៥៦សន្លឹក នៅក្រុងប៉ោយប៉ែត ខូចខាត២ខ្នង របើកដំបូលផ្ទះ២ខ្នង របើកស័ង្កសី៤០សន្លឹក នៅស្រុកម៉ាឡៃខូចខាត១២ខ្នង របើកដំបូលផ្ទះ១០ខ្នង ខ្យុះ០១ខ្នង រោងដាក់សម្ភារៈ១ខ្នងរបើកស័ង្កសី ៧៤សន្លឹក។

លោកឧត្តមសេនីយ៍ទោអាត់ ខែម ក៏ដូចលោក ឌៀប ឈួន អភិបាលស្រុកថ្មពួកឲ្យដឹងថា ជាការឆ្លើយតបនិងអន្តរាគមន៍ កម្លាំងនគរបាលខេត្ត ស្រុក ឃុំ យោធាខេត្តស្រុក កងពលលេខ៥១និងកងរាជអាវុធហត្ថខេត្ត ស្រុកនិងមន្ត្រីអាជ្ញាធរ យុវជន ពលរដ្ឋ បានចុះជួយរុះរើ រៀបជម្រកបណ្តោះអាសន្ននិងជួសជុលនូវផ្ទះនិងអគារសាលារៀនទាំងនោះឡើងវិញជាបន្តបន្ទាប់៕