កំពង់ឆ្នាំង ៖ ភរិយារបស់បុរសអ្នកបើកគោយន្តកែច្នៃកិនស្រូវតាមភូមិ រួមនឹងសាក្សីជាច្រើននាក់ កាលពីល្ងាចថ្ងៃទី២៦មីនានេះ បាននាំគ្នាមកជួបជាមួយក្រុមអ្នកសារព័ត៌មាន ឲ្យជួយផ្សព្វផ្សាយ នូវភាពអយុត្តិធម៌ ឲ្យបានដឹងដល់ថ្នាក់ដឹកនាំ តុលាការ និងស្ថាប័នពាក់ព័ន្ធ ដើម្បីជួយស្រាវជ្រាវស៊ើបអង្កេត ករណីគ្រោះថ្នាក់ចរាចរណ៍ រវាងម៉ូតូ និងគោយន្តកែច្នៃ បើកកិនស្រូវតាមភូមិ ខណៈដែលស្ត្រី អ្នកបើកម៉ូតូ រេចង្កូត ទៅបុកគោយន្តកែច្នៃរបួសបាក់ជើង ទារសំណង៦ពាន់ដុល្លារ តែភាគីគោយន្តមិនមានលទ្ធភាព ត្រូវបានតុលាការឃុំខ្លួនក្នុងពន្ធនាគារ។
ស្ត្រី ឈ្មោះ ប៉ិល ដានី អាយុ៣៧ឆ្នាំ ជាភរិយា របស់ឈ្មោះ ហេង សារ៉ុន អាយុ៤២ឆ្នាំ ជាអ្នកបើកគោយន្តកិនស្រូវ បានរៀបរាប់ថា គ្រួសារគាត់ មានទីលំនៅខេត្តត្បូងឃ្មុំ ប៉ុន្តែដោយភាពក្រីក្រគ្រួសារគាត់បានមកជួលផ្ទះគេស្នាក់នៅក្នុងភូមិប្រាំបីឆោម ឃុំពង្រ ស្រុករលាប្អៀរ ខេត្តកំពង់ឆ្នាំង ប្រកបមុខរបរ បើកគោយន្តកែច្នៃ សម្រាប់កិនស្រូវ ចល័តតាមភូមិ។
នៅថ្ងៃកើតហេតុ វេលាម៉ោង៦និង៣០នាទីព្រឹក ថ្ងៃទី២០ ខែមីនា ឆ្នាំ២០១៩ នៅពេលប្តីគាត់កំពុងបើកគោយន្ត មកដល់ចំណុចមុខសាលាបឋមសិក្សាព្រះទ្វារ ស្ថិតក្នុងភូមិប្រាំបីឆោម ឃុំពង្រ ស្រុករលាប្អៀរ ស្រាប់តែមានស្ត្រីម្នាក់ ជិះម៉ូតូក្នុងដំណើរច្រាសទិសជាមួយ គោយន្តប្តីគាត់ បានរេចង្កូត មកបុកគោយន្ត ប្តីគាត់ ខណៈដែលប្តីគាត់ព្យាយាមគេចធ្លាក់ពីថ្នល់ជាតិ មកលើគ្រោះក្រហម ទៅហើយ។ ក្រោយពេលកើតហេតុ ស្ត្រីរងគ្រោះរងរបួសបាក់ជើង បានទារសំណង៦ពាន់ដុល្លារ ពេលគាត់គ្មានប្រាក់សង ក៏ត្រូវបានតុលាការ ឃុំខ្លួនប្តីគាត់ក្នុងពន្ធនាគារយ៉ាងអយុត្តិធម៌។
សព្វថ្ងៃគ្រួសារគាត់កំពុងតែជួបការខ្វះខាត ចិញ្ចឹមកូនតូចៗ២នាក់ ទាំងលំបាក ណាមួយប្តីគាត់មិនមែនជាអ្នកខុសផង ម្ដេចត្រូវទារសំណងដល់ម្លឹង ហេតុនេះហើយគាត់សូមលើកដៃសំពះដល់ សមត្ថកិច្ច តុលាការ និងក្រសួងពាក់ព័ន្ធ សូមមេត្តាជួយស្រាវជ្រាវ ស៊ើបអង្កេតស្រាវជ្រាវករណីនេះផ្តល់យុត្តិធម៌ ជូនគ្រួសារគាត់ផង។
ជុំវិញករណីគ្រោះថ្នាក់ចរាចរណ៍ខាងលើ បុរសម្នាក់ដែលជាសាក្សីនៅកន្លែងកើតហេតុបានឲ្យដឹងថា ៖ មុនពេលកើតហេតុ គាត់កំពុងបើកម៉ូតូ ស្រាប់តែឃើញស្ត្រីរងគ្រោះជិះម៉ូតូមានដឹកកញ្ឆេរពីក្រោយ និងមានឥវ៉ាន់ខ្លះភ្ជួរនៅពីមុខម៉ូតូ( ជិះម៉ូតូលក់បន្លែ និងត្រី ) បានបើកម៉ូតូវ៉ាម៉ូតូគាត់ ក្នុងទិសស្របគ្នា ពេលបើកវ៉ាផុត បានបន្តិច គាត់ឃើញស្ត្រីរូបនោះ អោនដោយដៃឆ្វេង ឈោងយករបស់អ្វីមួយ ពេលនោះ ម៉ូតូក៏បានរេចង្កូតទៅឆ្វេងដៃដែរ ហើយក៏បានទៅបុកគោយន្ត ក្នុងទិសច្រាស់គ្នាតែម្ដង ខណៈអ្នកបើកគោយន្ត ឃើញសភាពមិនស្រួលខំគេចធ្លាក់មកលើថ្នល់ក្រួសក្រហមទៅហើយ។
ស្ត្រីសាក្សីម្នាក់ទៀត បានបំភ្លឺប្រាប់អ្នកសារព័ត៌មានថា ៖ ពេលគាត់ទៅដល់ ឃើញស្ត្រីរងគ្រោះរងរបួសបាក់ជើង ហើយគាត់ក៏បានជួយលើកស្ត្រីរងគ្រោះដែរ ពេលនោះគាត់បានឃើញស្ត្រីរងគ្រោះ សួររកអ្នកបើកគោយន្ត ហើយអ្នកបើកគោយន្ត ដែលកំពុងជួយស្ត្រីរងគ្រោះនោះដែរ បានឆ្លើយថា ៖ ខ្ញុំនៅនឹងទេ ខ្ញុំមិនរត់ទៅណាទេ ! បន្ទាប់មក ស្ត្រីរងគ្រោះ បន្ទោសអ្នកបើកគោយន្តថា បើឃើញគាត់បើកមកហើយ ម៉េចមិនគេចផង តែអ្នកបើកគោយន្តថា ខ្ញុំខំគេចធ្លាក់ថ្នល់ក្រហមហើយ តែនៅតែគេចមិនផុត។
ជុំវិញករណីនេះ លោក ឈឹម សារុន នាយការិយាល័យ ចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បានឆ្លើយថា តាមការវាស់វែងរបស់មន្ត្រីជំនាញ បញ្ជាក់ថា ស្ត្រីអ្នកបើកម៉ូតូបានបើកម៉ូតូឆ្លងថ្នល់ជាតិផុត ដល់ថ្នល់ក្រួសក្រហមទៅហើយ ត្រូវគោយន្តទៅបុក។ ប៉ុន្តែលោកថា បើមានសាក្សីមែន លោកនឹងស្រាវជ្រាវរឿងនេះឡើងវិញ ដើម្បីឲ្យមានយុត្តិធម៌ទាំងសងខាង។
រឿងនេះ ទុកឲ្យសមត្ថកិច្ចបន្តនីតិវិធីរបស់ខ្លួនដើម្បីរកយុត្តិធម៌ទាំងសងខាងចុះ ប៉ុន្តែការឃុំខ្លួនបុរសអ្នកបើកគោយន្ត ពិតជាធ្វើឲ្យជីវភាពគ្រួសារនេះ កាន់តែលំបាកមែនទែន សូម្បីតែប្រាក់ជួលរ៉ឺម៉កម៉ូតូ មកជួបអ្នកសារព័ត៌មានចំនួន៣ម៉ឺនរៀល ក៏ត្រូវប្រជាពលរដ្ឋ ជិតខាងអាណិតជួយចេញឲ្យដែរ និងក្រោយពីកិច្ចសម្ភាសន៍ចប់ ក្រុមអ្នកសារព័ត៌មានបានរៃលុយគ្នា បាន១០ម៉ឺនរៀល ឲ្យស្ត្រីជាភរិយា អ្នកបើកគោយន្តធ្វើសោហ៊ុយទៅផ្ទះវិញ ព្រោះតែក្តីអាណិតអាសូរ៕
Source: Kampuchea Thmey Daily
0 Comments