យប់​ថ្ងៃ​ទី​២៧​មីនា មនុស្ស​ចំនួន​០៤​នាក់​បាន​ស្លាប់ ដោយសារ​គ្រោះ​ថ្នាក់​ចរាចរណ៍ លើទឹក​ដី ក្រុង​ព្រះសីហនុ​

ព្រះសីហនុ ​៖ គ្រោះថ្នាក់​ចរាចរណ៍ ចំនួន០៣​ករណី ក្នុង​យប់​តែមួយ​ នា​ថ្ងៃទី​២៧ ខែ​មីនា ​ឆ្នាំ​២០១៩ លើទឹក​ដី​ក្រុងព្រះសីហនុ បណ្តាល​ឲ្យ​មនុស្ស​ចំនួន​០៤​នាក់ បាន​ស្លាប់ យ៉ាង​អាណោចអាធ័ម នៅ​នឹង​កន្លែង​កើតហេតុ​តែម្តង និង មនុស្សម្នាក់​រងរបួស​ធ្ងន់។

ករណី​ទី១-ក្មេងប្រុស​ចំនួន​០២​នាក់ បាន​ស្លាប់ ខណៈពេល ពួកគេ​ជិះ​ម៉ូតូឌុប​គ្នា តាម​បណ្តោយ​ផ្លូវ វិថី​ថៃ ត្រងចំណុច​ផ្លូវ​កែប បំបែក​រ៉ា​រថភ្លើង ស្ថិតក្នុង​ភូមិ​លេខ​០៣ ក្រុងព្រះសីហនុ គឺ បើកបរ​ក្នុង​ល្បឿន លឿន ក៏បាន​ជួប​គ្រោះថ្នាក់​ចរាចរណ៍ បុក​ជាមួយ​នឹង​រថយន្ត ក្រឡុក​ស៊ីម៉ងត៍ ក្នុង​ទិស​ដៅ​បញ្ច្រាស​ទិស​គ្នា​យ៉ាង​ពេញទំហឹង បណ្តាល​ឲ្យ​ជនរងគ្រោះ​ទាំង​០២​នាក់ និង​ ម៉ូតូ ចូល​ទៅ​ក្រោម​រថយន្ត កិន​ស្លាប់​ក្នុងពេល​នោះ​តែម្តង។​

ហេតុការណ៍​នេះ​បាន​កើតឡើង នៅវេលា​ម៉ោង​ប្រមាណ​១៩ យប់​ថ្ងៃ​ទី​២៧ ខែមីនា ឆ្នាំ​២០១៩ ដោយ ករណីនេះ នៅ​មិនទាន់​ដឹងថា ភាគី​ណា​ខុស​ណា​ត្រូវ​នោះ​ទេ គ្រាន់តែ​ដឹងថា ទាំង​រថយន្ត និង ម៉ូតូ​ជនរងគ្រោះ សុទ្ធសឹង បើកបរ​ក្នុង​ល្បឿន​លឿន ដូចគ្នា ក្នុង​ទីប្រជុំជន។

បច្ចុប្បន្ន សព​ជនរងគ្រោះ ត្រូវបាន​ក្រុម​គ្រួសារ នាំយកទៅ​ធ្វើបុណ្យ​តាម​ប្រពៃណី​ហើយ ចំណែក ម៉ូតូ និង​រថយន្ត ក្រឡុក​ស៊ីម៉ងត៍ ដែល​អ្នកបើកបរ​រត់គេច​ខ្លួន​បាត់​ស្រមោល​ទៅហើយនោះ ត្រូវបាន សមត្ថកិច្ច​ប៉ូលិស​ចរាចរណ៍ នាំយកទៅ​រក្សាទុក ដើម្បី​ដោះស្រាយ​តាម​នីតិវិធី នៃ​ច្បាប់​។​
​
ករណី​ទី​០២-បុរស​ម្នាក់ បាន​ស្លាប់ ដោយសារ​រថយន្ត​បុក ​ក្នុង​ខណៈពេល​ដើរ​ឆ្លង​ផ្លូវ នៅតាម​បណ្ដោយ​ផ្លូវ​ឯករាជ្យ​ ក្នុង​សង្កាត់​លេខ​៣​ ក្រុងព្រះសីហនុ វេលា​ម៉ោង​ជិត​១០​យប់ ​ថ្ងៃ​២៧​ ខែ​មីនា ​ឆ្នាំ​២០១៩ មិនបាន​ប្រយ័ត្ន ក៏ត្រូវ​រថយន្ត មិន​ស្គាល់​អត្តសញ្ញាណ បើក​បុក​ស្លាប់​នៅ​នឹង​កន្លែង​កើតហេតុ​តែម្តង។ ​​រហូត មកដល់​ព្រឹក ថ្ងៃ​ទី​២៨​មីនា​នេះ ជនរងគ្រោះ មិនទាន់​ត្រូវ​បាន​គេ​ស្គាល់ អត្តសញ្ញាណ​នៅឡើយ​ទេ។ ចំណែក សមត្ថកិច្ច ជុំវិញ​ករណី​នេះ ក៏​កំពុង​ធ្វើការ​ស្រាវជ្រាវ យក​ចិត្ត​ទុកដាក់​ផងដែរ ដើម្បី​ស្វែងរក​អត្តសញ្ញាណ​រថយន្ត​បង្ក​ឲ្យ​ចូល​ខ្លួន​មក​ទទួល​ខុសត្រូវ ចំពោះ​មុខ​ច្បាប់។​

ករណី​ទី០៣-អ្នកបើកបរ​ម៉ូតូ​ចំនួន​២​គ្រឿង ដែល​សមត្ថកិច្ច អះអាង​ថា សុទ្ធសឹង ស្ថិតក្នុង​ស្ថានភាព ស្រវឹង​ស្រា និង មិនមាន​ពាក់មួក​សុវត្ថិភាព បាន​ជិះ​ម៉ូតូ ក្នុង​ល្បឿន​លឿន​ដូចគ្នា នៅ​វេលា​ម៉ោង​១៤ និង​០០​នាទី រំលង​អាធ្រាត្រ ឈានចូល ថ្ងៃទី​២៨ ខែ​មីនា ឆ្នាំ​២០១៩ ពួកគេ​បាន​ជិះ​ម៉ូតូ​បុក​គ្នា ក្នុង​គោលដៅ បញ្ច្រាស​ទិស​គ្នា តាម​បណ្ដោយ ផ្លូវលំ​មួយ ក្នុង​ភូមិ លេខ០១ សង្កាត់​លេខ០១ ក្រុង​ព្រះសីហនុ បណ្ដាល​ឲ្យ​ដួល​ទាំង​សងខាង ប៉ុន្តែ​ក្នុង​ករណី​នោះ មិន​បង្ក​ឲ្យ​ភាគី​ណា​គ្រោះថ្នាក់​ដល់​ស្លាប់​នោះ​ទេ ប៉ុន្តែ​ចៃដន្យ​អាក្រក់ ស្របពេល​កើតហេតុ​នោះ ក៏​ស្រាប់​តែមាន​រថយន្ត​មួយ​គ្រឿង ក៏​បាន​មកដល់​ល្មម ហើយ​ក៏បាន​កិន​ជនរងគ្រោះ​ម្នាក់​បន្ថែម បណ្ដាល​ឲ្យ​ស្លាប់ ក្នុងពេលនោះ​តែម្ដង បន្ទាប់មក តៃកុង​រថយន្ត ក្រោយ​ដឹងថា ខ្លួន​បាន​កិន​ជនរងគ្រោះ​ស្លាប់ ក៏បាន​រត់​គេច​ខ្លួន​ក្នុង​ពេល​នោះ​តែម្តងទៅ បន្សល់ទុក រថយន្ត​បង្ក​ហេតុ។
​
បច្ចុប្បន្ន ម៉ូតូ ជនរងគ្រោះ ម៉ាក EXCITER ពណ៌​ខ្មៅ​-​ក្រហម គ្មាន​ស្លាក​លេខ និង​ ម៉ូតូ ម៉ាក HONDA C125 ពណ៌​ខ្មៅ ស្លាកលេខ កែប​1A-1566 រួម​នឹង​រថយន្ត​បង្ក ម៉ាក Sterling ស្លាកលេខ ភ្នំពេញ​3C-3319 ត្រូវបាន សមត្ថកិច្ច ប៉ូលិស​ចរាចរណ៍ នាំយកទៅ​រក្សាទុក ដើម្បី​ធ្វើការ​ដោះស្រាយ​តាម​ផ្លូវច្បាប់​៕​

 


​

Source: Kampuchea Thmey Daily