ប៉េ​រូ​បើក​មូលដ្ឋាន​យោធា​ដើម្បី​ការពារ​ព្រៃ​អា​ម៉ា​ហ្សូ​ន​ពី​ការកាប់បំផ្លាញ​

ប្រទេស​ប៉េ​រូ ​បាន​បើក​មូលដ្ឋាន​យោធា​មួយ​នៅ​ព្រៃ​អា​ម៉ា​ហ្សូ​ន​ កាលពី​ថ្ងៃ​អង្គារ ​ក្នុង​គោលបំណង​ដើម្បី​ដោះស្រាយ​ការធ្វើ​អាជីវកម្ម​រ៉ែ​ខុសច្បាប់​ដែលជា​មូលហេតុ​ចម្បង​នៃ​ការបំផ្លាញ​ព្រៃឈើ​នៅក្នុង​ព្រៃធំ​បំផុត​របស់​ពិភពលោក​មួយ​នេះ។

រដ្ឋមន្ត្រី​ក្រសួងការពារជាតិ​លោក Jose Huerta បាន​និយាយ​នៅក្នុង​ពិធី​សម្ពោធ​មូលដ្ឋាន​ក្នុង​តំបន់​អភិរក្ស​ធម្មជាតិ Tambopata ថា “​រដ្ឋាភិបាល​បានធ្វើការ​សម្រេចចិត្ត​ផ្នែក​នយោបាយ​នៅក្នុង​តំបន់​នេះ​ដើម្បី​លុបបំបាត់​ការរក​រ៉ែ​ខុសច្បាប់​”​។​

តំបន់​អភិរក្ស​នេះ​គឺ​ស្ថិតនៅក្នុង​តំបន់ Madre de Dios ដែល​ត្រូវគេ​ស្គាល់​ថា​ជា​សម្បុក​នៃ​ការរុករក​រ៉ែ​ខុសច្បាប់​នៅក្នុង​ប្រទេស​ប៉េ​រូ​។​

មូលដ្ឋាន​យោធា​នេះ​ត្រូវបាន​បង្កើតឡើង​នៅក្នុង​ជំរំ​ឈើ​ចាស់​មួយ​ដែល​ត្រូវបាន​បោះបង់ចោល​ដោយ​អ្នករុករក​រ៉ែ​ខុសច្បាប់​កាលពី​ពីរ​សប្តាហ៍​មុន​នៅពេលដែល​ប្រទេស​ប៉េ​រូ​បានចាប់ផ្តើម​ប្រតិបត្តិការ​របស់ខ្លួន​ប្រឆាំងនឹង​ការអនុវត្ត​នេះ​។​

លោក Huerta បាន​និយាយថា “​យើង​បាន​មកហើយ​យើង​នឹង​ស្នាក់នៅ​ឲ្យ​បានយូរ​តាម​ដែល​ចាំបាច់​។ មូលដ្ឋាន​យោធា​បន្ថែមទៀត​ត្រូវបាន​គ្រោង​នឹង​សាងសង់ឡើង​”​។ លោក​បាន​បន្ថែមថា “​យើង​មាន​ដំណាក់កាល​ដំបូង​រយៈពេល​ពីរ​សប្តាហ៍​ហើយ​ពេលនេះ​យើង​ឈានដល់​ដំណាក់កាល​ទី​ពីរ​ដែល​ត្រូវបាន​គេ​រំពឹងថា​នឹងមាន​រយៈពេល​៦​ខែ​”​។​

រដ្ឋមន្ត្រី​ក្រសួងបរិស្ថាន​លោកស្រី Fabiola Munoz ដែល​ក៏បាន​ចូលរួម​ក្នុង​ការបើក​មូលដ្ឋាន​នេះ​ផងដែរ​នោះបាន​និយាយថា Madre de Dios គឺជា​តំបន់​មួយ​នៃ​ជីវចំរុះ​ខ្ពស់​និង​សក្តានុពល​ទេសចរណ៍​ដ៏​អស្ចារ្យ​ដែល​បានធ្វើ​អាជីវកម្ម​តែ​បន្តិចបន្តួច​ប៉ុណ្ណោះ​។​

គួរ​បញ្ជាក់ថា មូលដ្ឋាន​នីមួយៗ​នឹងត្រូវ​ប្រមូលផ្តុំ​ដោយ​ទាហាន​ចំនួន​១០០​នាក់ មន្ត្រីប៉ូលិស​៥០​នាក់​និង​រដ្ឋអាជ្ញា​ម្នាក់​សម្រាប់​រយៈពេល​៦​ខែ​ដំបូង​ប៉ុន្តែ​ប្រតិបត្តិការ​អាចមាន​រយៈ​ពេល​រាប់​ឆ្នាំ​។​

លោក Huerta បាន​និយាយថា គោលបំណង​គឺ​បន្ត​នៅ​រហូតដល់​តំបន់​នេះ​បញ្ចប់​ការកាប់​ព្រៃ​។​
​លោក​បាន​បន្ថែមថា ការ​ល្បាត​នឹង​ប្រើប្រាស់​យន្តហោះ​ដ្រូ​ន ផ្កាយរណប​ប៉េ​រូ​មួយ​និង​យន្តហោះ​យោធា​មួយគ្រឿង​៕ AFP

​

Source: Kampuchea Thmey Daily