ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦០គីឡូក្រាម នៅសង្វៀនទូរទស្សន៍SEATV នៅរសៀលថ្ងៃអាទិត្យ ទី១០ ខែមីនា ឆ្នាំ២០១៩នេះ ជាការប្រកួតជុំចុងក្រោយ រវាងអ្នកប្រដាល់កម្ពុជា ធឿន ធី ក្លិបអង្គរមានជ័យខេត្តសៀមរាប និងអ្នកប្រដាល់ថៃ Chhav Vallit ហើយអ្នកប្រដាល់កម្ពុជា លន បញ្ញា សមាគមកីឡាប្រដាល់ក្រសួងការពារជាតិ ជួបអ្នកប្រដាល់ថៃYorth Katangyou។
ធឿន ធី និង Chhav Vallit ពួកគេទាំងពីរនាក់ ពុំធ្លាប់ជួបគ្នាទេកន្លងមក។ ធឿន ធី អ្នកប្រដាល់កម្ពុជាយើងនេះ គេមានប្រវត្តិប្រកួត៣៨លើកឈ្នះ៣០លើក ចាញ់០៥លើក និង ស្មើ០២លើក។ ឯ Chhav Vallit គេមានប្រវត្តិប្រកួតចំនួន៧០លើក ឈ្នះ៥៧លើក ចាញ់១៣លើក មិនដែលស្មើ។ យ៉ាងណាសម្រាប់ការប្រកួតជុំចុងក្រោយនេះ គេមិនរំពឹងថា ធឿន ធី អាចនឹងរកបាន៣ពិន្ទុនោះឡើយ ក្នុងការជួប Chhav Vallit នេះ។
Chhav Vallit កាលពីប្រកួតក្នុងលើកទី៣ គេវាយចាញ់លន បញ្ញា អ្នកប្រដាល់សមាគមប្រដាល់ក្រសួងការពារជាតិដោយពិន្ទុ មាន៥ពិន្ទុក្នុង៣ប្រកួត ដោយឈ្នះ ១ ចាញ់ ២ ប្រកួត ឯ ធឿន ធី កាលពីប្រកួតជុំទី៣ គេវាយចាញ់Yorth Katangyou ដោយពិន្ទុដែរ មានតែ៣ពិន្ទុប៉ុណ្ណោះ ក្នុង៣ប្រកួតដោយចាញ់ទាំងបីប្រកួត ។យ៉ាងណា ធឿន ធី និងអ្នកប្រដាល់ថៃ Chhav Vallit គ្រាន់តែប្រកួតបង្គ្រប់កិច្ចប៉ុណ្ណោះ សម្រាប់ការប្រកួតជុំចុងក្រោយនេះ។
ចំពោះការជួបគ្នារវាង លន បញ្ញា និងYorth Katangyou ពួកគេទាំងពីរនាក់នេះ ក៏មិនធ្លាប់ជួបគ្នាដែរកន្លងមក។ អ្នកប្រដាល់ទាំងពីរនាក់នេះ មានកម្ពស់ខុសគ្នាដោយបញ្ញាខ្ពស់ជាងបន្តិច គឺYorth Katangyou ១,៦៧ម៉ែត្រ ហើយបញ្ញា១,៧១ម៉ែត្រ ប៉ុន្តែលន បញ្ញា ចាញ់បទពិសោធន៍ និង កំណត់ត្រា Yorth Katangyou ។
Yorth Katangyou គេមានកំណត់ត្រាប្រកួតចំនួន៦៣លើក ក្នុងនោះឈ្នះ៥២លើក ចាញ់១១លើក មិនដែលស្មើ។ ចំណែក លន បញ្ញា គេមានកំណត់ត្រាប្រកួត៤៤លើក ឈ្នះ៣៩លើកចាញ់០៣លើក និងស្មើ០២លើក។
លន បញ្ញា គេប្រកួតជុំទី៣ (២៤កុម្ភៈ២០១៩) គេវាយ Chhav Vallit ដោយពិន្ទុ ដែលធ្វើឲ្យគេបាន៧ពិន្ទុ សម្រាប់ការប្រកួតជម្រុះ៣ជុំកន្លងមកនេះ គឺឈ្នះ ២ ចាញ់១ ប្រកួត។ ចំណែក ការប្រកួតជុំទី៣ របស់Yorth Katangyou(២៤កុម្ភៈ២០១៩) គឺឈ្នះធឿន ធី ដោយពិន្ទុបាន៧ពិន្ទុដែរ គឺឈ្នះ២ ចាញ់១ ដូចគ្នា ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។
ចំពោះការការប្រកួតក្រៅពីគូខ្សែក្រវាត់នេះ ឡុង ពិសិដ្ឋ អ្នកប្រដាល់ក្លិបខ្លារខិនមានរិទ្ធ នឹងត្រូវជួបប្រកួតជាមួយ ព្រឿង សុចើត អ្នកប្រដាល់ស្រករក្រោយនៃក្លិបមជ្ឈមណ្ឌលកីឡាខ.ភ.ម ដោយជួបគ្នាក្នុងប្រភេទទម្ងន់៤៨គីឡូក្រាម។
ឡុង ពិសិដ្ឋ ថ្វីត្បិតតែជាអ្នកប្រដាល់ជើងថ្មីក្តី ប៉ុន្តែគេមានស្នៀតប្រដាល់ល្អ រហ័ស រហួន ព្រមទាំងមានផ្លែល្អទៀតផង ដែលគូប្រកួតមិនអាចមើលស្រាលបានឡើយ។
ដូច្នេះសម្រាប់ការប្រកួតលើកនេះ តើឡុង ពិសិដ្ឋ អាចយកឈ្នះលើអ្នកប្រដាល់ស្រករក្រោយព្រឿង សុចើត បានឬអត់នោះទេ?។ ចាំមើល តើ អ្នកប្រដាល់ស្រករក្រោយព្រឿង សុចើត អាចទប់ទល់ជាមួយឡុង ពិសិដ្ឋ បានដែរឬទេ ?សម្រាប់ជំនួបលើកដំបូងនេះ។
អេ រាជសីហ៍ អ្នកប្រដាល់ក្លិបអេភូថងកីឡា នឹងជួបសាកកណ្ដាប់ដៃជាមួយ ឡុង និមិត្តអ្នកប្រដាល់ក្លិបសាលវ័ន្តកីឡា។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ ពុំមាននរណាហ៊ានទាយមុនថា អ្នកណាឈ្នះ អ្នកណាចាញ់នោះឡើយ?៕
Source: Kampuchea Thmey Daily
0 Comments