វង្ស ណយ ចាញ់ ចែគស្យ៉ាម ខណៈ អ៊ូច ធារិទ្ធ ឈ្នះ ហ្វាម៉ៃ ដោយពិន្ទុ

អ្នកប្រដាល់ជើងខ្លាំងកម្ពុជាវង្ស ណយ នៃក្លិបកុលបុត្រគុនខ្មែរ បានប្រកួតចាញ់អ្នកប្រដាល់ថៃ ចែគស្យ៉ាម ចែគស្យ៉ាមជីម (Jacksiam Jacksiam Gym) នៅក្នុងការជួបគ្នាលើសង្វៀនបាយ័នស្ទឹងមានជ័យ កាលពីយប់ថ្ងៃទី០៣ ខែមីនា ឆ្នាំ២០១៩។

វង្សណយ បានវាយចាញ់អ្នកប្រដាល់ថៃចែគស្យ៉ាម ចែគស្យ៉ាមជីម ដោយពិន្ទុបន្ទាប់ពីប្រកួតគ្នា៥ទឹកពេញនោះ។ ពួកគេទាំងពីរនាក់នេះ ប្រកួតគ្នាក្នុងទម្ងន់៧១គីឡូក្រាម។

ចែគស្យ៉ាម ឈ្នះ វង្ស ណយនេះ ដោយសារគេវាយចំគោលដៅល្អជាងនិងច្រើនជាង ការវាយចេញរបស់វង្ស ណយ។ ដូច្នេះហើយ ទើបចប់ការប្រកួតចែគស្យ៉ាម ឈ្នះដោយពិន្ទុនោះ។

អ្នកប្រដាល់ថៃចែគស្យ៉ាមនេះ រាល់ការវាយចេញរបស់គេ គឺលឿន រហ័ស ដែលធ្វើឲ្យ វង្ស ណយ ពិបាកក្នុងការការពារនិងវាយបកវិញនោះ។ យ៉ាងណា អ្នកប្រដាល់ថៃរូបនេះ បើតាមកំណត់ត្រាប្រកួតរបស់គេ គឺមិនសមនឹងបានឈ្នះ វង្ស ណយ នោះទេ ខណៈដែល វង្ស ណយ គេមានកំណត់ត្រាប្រកួតចំនួន២០៣លើក ខណៈដែលចែគស្យ៉ាម គេមានកំណត់ត្រាប្រកួតតែ៩៩លើកប៉ុណ្ណោះ។

សូមបញ្ជាក់ថា ចែគស្យ៉ាមនេះ កាលពីមកប្រកួតលើកដំបូងជួបជាមួយឯម ឡេងលី ក្លិបថ្មគោលពោធិសែនជ័យនោះ គេបានវាយឯម ឡេងលីឲ្យសន្លប់ក្នុងទឹកទី២។

ចំណែក អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ដែលគេផ្គូឲ្យជួបប្រកួតជាមួយអ្នកប្រដាល់ថៃឈ្មោះហ្វាម៉ៃ ស៊ីត យ៉តសៀន(Famai Site Yodsian)នោះ បានវាយឈ្នះហ្វាម៉ៃ ស៊ីត យ៉តសៀន ដោយពិន្ទុប្រផុតប្រផើយ។ ពីរនាក់នេះ ប្រកួតគ្នាក្នុងទម្ងន់៥៧គ.ក្រ។

អ៊ូច ធារិទ្ធ បានវាយហ្វាម៉ៃ ស៊ីត យ៉តសៀន បែកថ្ងាសក្នុងទឹកទី៥និងបានដាល់ចំគោលដៅច្រើនក្នុងទឹកបង្ហើយនេះ ទើបបានឈ្នះអ្នកប្រដាល់ថៃដោយពិន្ទុប្រផុតប្រផើយ។ អ៊ូច ធា រិទ្ធ គេបានឆ្លងកាត់ការប្រកួតជាមួយអ្នកប្រដាល់ថៃ១១លើក និងឡាវ១លើក ប៉ុណ្ណោះ ប៉ុន្តែលទ្ធផលគេ គឺឈ្នះជាងចាញ់។ កាលពីជួបប្រកួតជាមួយថៃលើកមុន(១៨វិច្ឆិកា២០១៨) គេបានវាយស្មើជាមួយ ឃុម ផេត (Khum Petch)។

ដោយឡែក សម្រាប់ការប្រកួតរវាងអ្នកប្រដាល់រួមជាតិវិញ ខេម ចាន់ អ្នកប្រដាល់ក្លិបកងពលតូចទ័ពឆ័ត្រយោង៩១១ បានវាយឈ្នះ ងួន គា អ្នកប្រដាល់ជើងចាស់ក្លិបរាជសីហ៍មានរិទ្ធខេត្តរតនគិរីដោយពិន្ទុ។ ពីរនាក់នេះ ជួបប្រកួតគ្នាក្នុងទម្ងន់៥៧គីឡូក្រាម។

•មាស សារ៉ាក់ ចាញ់ សុខ សុវណ្ណ ឯ ធឹម ទាន់ ចាញ់ វីសុភ័ស្ស
មាស សារ៉ាក់ អ្នកប្រដាល់ក្លិបអាណាចក្រគុនខ្មែរ ដែលគេផ្គូឲ្យជួបប្រកួតជាមួយសុខ សុវណ្ណ អ្នកប្រដាល់ជើងខ្លាំងក្លិបកងពលធំអន្តរាគមន៍លេខ២ និងជាម្ចាស់ខ្សែក្រវាត់ លីអូទម្ងន់៦០គីឡូក្រាម បានវាយចាញ់ត្រឹមពិន្ទុ កាលពីល្ងាចថ្ងៃសៅរ៍ ទី០២ ខែមីនា ឆ្នាំ២០១៩ នៅលើសង្វៀនបាយ័នស្ទឹងមានជ័យពីរនាក់នេះ ជួបគ្នាក្នុងប្រភេទទម្ងន់៦៣,៥០០គីឡូក្រាម។

សុខ សុវណ្ណ ជាអ្នកប្រដាល់ជើងខ្លាំងជើងចាស់ គេមានកណ្តាប់ដៃខ្លាំង រហ័ស និងលឿន ពិសេសស្នៀតទាត់របស់គេ គឺអស្ចារ្យតែម្តង ដែលធ្វើឲ្យ មាស សារ៉ាក់ ចង់គាំងម្តងៗទៅហើយ។

មាស សារ៉ាក់ គេមានស្នៀតកណ្ដាប់ដៃល្អ ហើយវាយខ្លាំងដែរ តែដល់មកប៉ះជាមួយ សុវណ្ណ គេបែរជាវាយអត់ចេញទៅវិញ។ បើពិនិត្យទៅ សមត្ថភាពបច្ចេកទេស សារ៉ាក់ ប្រហាក់ប្រហែលនឹងសុវណ្ណ ដែរ។

គេនៅចាំបានថា មាស សារ៉ាក់ ដែលពីមុនមិនដែលប៉ះសុខ សុវណ្ណ នោះ ដោយសារ ពេលនោះសារ៉ាក់មានសមត្ថភាពមិនដល់សុវណ្ណ ហើយណាមួយទម្ងន់របស់គេ ក៏នៅស្រាលជាងសុវណ្ណដែរ។

ធឹម ទាន់ អ្នកប្រដាល់ក្លិបរាជសីហ៍ខេត្តរតនគិរី បានបោះបង់ចោលការប្រកួត ក្នុងទឹកទី៤ បន្ទាប់ពីមិនអាចទប់និងការពារបានពីការវាយប្រហារដ៏ខ្លាំងរបស់វី សុភ័ស្ស អ្នកប្រដាល់ក្លិបនាគរាជមានជ័យនោះ។ ពីរនាក់នេះ ជួបគ្នាក្នុងប្រភេទទម្ងន់៦៥គីឡូក្រាម។

វី សុភ័ស្ស ជាអ្នកប្រដាល់ចាស់វស្សា ប៉ុន្តែគេបានបាត់មុខពីសង្វៀនប្រដាល់យូរហើយ ទើបតែលេចមុខមកវិញលើកនេះ ជួបធឹម ទាន់នេះឯង។

ចំពោះ អេរ៉ាវ៉ាន់ ចាន់រាជ អ្នកប្រដាល់ក្លិបកុសលកីឡា បានផ្តួល ម៉ន ខួច អ្នកប្រដាល់ក្លិបការិយាល័យទី៥ កងទ័ពជើងគោក ឲ្យសន្លប់ក្នុងទឹកទី១ប៉ុណ្ណោះ ក្នុងការជួបប្រកួតគ្នាក្នុងទម្ងន់៥៤គីឡូក្រាម ។

ចំណែក សោម ពិសិដ្ឋ អ្នកប្រដាល់ក្លិបអេភូថងកីឡា បានវាយឈ្នះណាក់ សុខា អ្នកប្រដាល់ក្លិបយុវវាលស្បូវខណ្ឌច្បារអំពៅ ដោយពិន្ទុ។ ពួកគេទាំងពីរប្រកួតគ្នាក្នុងទម្ងន់៦៥គីឡូក្រាម៕