ឧត្ដរមានជ័យ ៖ កងកម្លាំងមូលដ្ឋានកងរាជអាវុធហត្ថស្រុកអន្លង់វែង ចំនួនប្រាំបីនាក់ ដឹកនាំដោយលោកវរសេនីយ៍ទោ ងួន ទ្ធីរិទ្ធ មេបញ្ជាការមូលដ្ឋានកងរាជអាវុធហត្ថស្រុកអន្លង់វែង បានធ្វើការបង្ក្រាប ទីតាំងចែកចាយ និងរក្សាទុកនូវសារធាតុញៀន ក្នុងផ្ទះជួលមួយកន្លែង ដោយរឹបអូសបានសារធាតុញៀន ជាងកន្លះគីឡូក្រាម និងឃាត់ខ្លួនបានបុរសម្នាក់ កាលពីថ្ងៃទី០៣ ខែមីនា ឆ្នាំ២០១៩ ស្ថិតនៅភូមិអភិវឌ្ឍន៍ ឃុំអន្លង់វែងស្រុកអន្លង់វែង ខេត្តឧត្ដរមានជ័យ។
បើតាមការឲ្យដឹងពីសមត្ថកិច្ចអាវុធហត្ថស្រុកថា ជនសង្ស័យ ដែលធ្វើការឃាត់ខ្លួនបាន ចំនួន០១នាក់នោះ ឈ្មោះ គឹម នៀង ភេទប្រុស អាយុ២៥ឆ្នាំ មុខរបរធ្វើចម្ការ បច្ចុប្បន្ន រស់នៅ ភូមិដីក្រហម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។
ជាមួយនឹងការឃាត់ខ្លួននេះ សមត្ថកិច្ចបានធ្វើការដកហូតវត្ថុតាងជាសារធាតុញៀនម្សៅក្រាម ពណ៌ ស និងសម្ភារៈផ្សេងៗ ដូចខាងក្រោម ៖ ១.ម្សៅក្រាម ពណ៌ស(ម៉ាទឹកកក)ចំនួន០៥ថង់ធំ និង០១ថង់តូច ស្មើ ៥០០,៦៧ ក្រាម ២.ទូរស័ព្ទដៃម៉ាកណូគា(អ៊ិនចុចពិល)០១គ្រឿង ៣.ទូរក្បាលគ្រែ(ទុកគ្រឿងញៀន)ចំនួន០១គ្រឿង ៤.ប្រាក់ខ្មែរចំនួន១០០.០០០រៀល (មួយសែនរៀល) ៥.ជញ្ជីងសម្រាប់ថ្លឹង ចំនួន០១គ្រឿង ៦.ពូថៅដៃ ចំនួន០១ ព្រមទាំងសម្ភារៈមួយចំនួនទៀត។
បច្ចុប្បន្ន សមត្ថកិច្ចអាវុធហត្ថស្រុកអន្លង់វែង កំពុងកសាងសំណុំរឿងចាត់ការបន្តទៅតាមនីតិវិធីផ្លូវច្បាប់៕
Source: Kampuchea Thmey Daily
0 Comments