យោងតាមការបញ្ជាក់របស់ក្លិបបាល់ទាត់ភ្នំពេញក្រោន សមាជិកពានរង្វាន់លីគកំពូលកម្ពុជា (Metfone Cambodian League) បានលើកឡើងថា ក្លិបសម្រេចបញ្ជូនក្រុមបាល់ទាត់នារីរបស់ខ្លួនចូលរួមក្នុងសកម្មភាពសង្គមមួយពោលគឺកម្មវិធីអបអរសាទរទិវាសិទ្ធិនារីអន្តរជាតិ នៅថ្ងៃសុក្រ ទី៨ ខែមីនា ឆ្នាំ២០១៩ នេះ។
ប្រភពបានបន្តថា ក្រុមនារីនេះនឹងចូលរួមប្រកួតក្នុងកម្មវិធីមួយដែលរៀបចំឡើងដោយក្រុមហ៊ុន GFA Soriya – Cambodia ដើម្បីអបអរសាទរទិវានារី។ ក្រុមនារីដែលនឹងចូលរួមកម្មវិធីនេះត្រូវបានចែកចេញជាពីរក្រុមគឺក្រុមនារីភ្នំពេញក្រោន និងក្រុមនារីដែលជាសមាជិកបុគ្គលិក ក៏ដូចជាក្រុមគ្រូៗនារីភ្នំពេញក្រោន។ ភាគីទាំង២នឹងប្រកួតបាល់ទាត់មិត្តភាពជាមួយគ្នានៅតារាងហ្វូតសាល នៃផ្សារទំនើបអ៊ីអនម៉ល សែនសុខស៊ីធី ជាន់ទី៤ វេលាម៉ោង១រសៀលតទៅ។
កម្មវិធីប្រកួតបាល់ទាត់មិត្តភាពនេះ ក៏មានបើកឲ្យមហាជនចូលរួមនិងទស្សនាដោយសេរីផងដែរ ខណៈការប្រកួតនេះគឺធ្វើឡើងដើម្បីអបអរសាទរទិវានារីអន្តរជាតិ ៨មីនា នឹងដើម្បីបង្ហាញថានារីក៏មានលទ្ធភាពក្នុងការលេងបាល់ទាត់ដូចនឹងបុរសដែរ។ ការចូលរួមរបស់អ្នកទាំងអស់គ្នាអាចបញ្ជាក់ពីលើកកម្ពស់វិស័យបាល់ទាត់នារីនៅប្រទេសកម្ពុជាផងដែរ។
ទិវានារីអន្តរជាតិ(៨មិនា) គឺជាទិវាមួយ ដែលនារីជុំវិញពិភពលោក ប្រារព្ធពិធី ដើម្បីរំឭកអបអរសាទរសិទ្ធ របស់ខ្លួន។ ជាឱកាសមួយត្រូវអបអរ ដោយមានពិធីបុណ្យរំឭកខួប ប្រារព្ធធ្វើដោយនារីជុំវិញពិភពលោក។ អង្គការ សហប្រជាជាតិ ក៏ប្រារព្ធពិធីអបអរសាទរទិវានេះ និងប្រទេសជាច្រើន បានកំណត់ទិវានេះ ថាជាថ្ងៃបុណ្យជាតិរបស់ ខ្លួនផងដែរ។
នៅពេលនារី ក្នុងទ្វីបទាំងអស់ដែលជាញឹកញាប់តែងត្រូវបែងចែកដោយព្រំដែនជាតិ និងដោយជាតិពន្ធខុសគ្នា ដោយភាពខុសគ្នា ខាងភាសា វប្បធម៌ សេដ្ឋកិច្ច និងនយោបាយ មកជួបជុំគ្នា ដើម្បីធ្វើពិធីបុណ្យរំឭកខួបទិវា របស់ខ្លួន គេ អាចរំឭកឡើងវិញអំពីប្រពៃណីដែលតំណាងឲ្យយ៉ាងតិចប្រាំបួនទសវត្ស នៃការតស៊ូដើម្បីសមភាព យុត្តិធម៌ សន្តិភាព និងអភិវឌ្ឍន៍៕
Source: Kampuchea Thmey Daily
0 Comments