ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានផ្ញើសារនយោបាយជាថ្មីទៅកាន់ក្រុមអ្នកនយោបាយប្រឆាំងដែលត្រូវបានកាត់សិទ្ធិធ្វើនយោបាយ ឲ្យប្រញាប់ប្រញាល់សុំសិទ្ធិធ្វើនយោបាយឡើងវិញ ហើយកុំបាច់រង់ចាំ និង ដាក់លក្ខខណ្ឌអ្វីឲ្យសោះ។ ព្រោះទ្វារកំពុងបើកតែវាក៏អាចបិទទៅវិញផង ដែរដូចនេះជំរើសមានតែ២ទេ ទី១.ត្រូវសុំសិទ្ធិនីតិសម្បទាធ្វើនយោបាយឡើងវិញនិង ទី២.ត្រូវរង់ចាំរហូតចប់ឳសានវាទនៃសាលក្រមតុលាការកំពូលនៅខែវិច្ឆិកា២០២២។
សម្តេចតេជោនាយករដ្ឋមន្ត្រីបានថ្លែងបែបនេះ នៅក្នុងពិធីបើកការដ្ឋានសាងសង់សំណង់ផ្សេងៗក្នុងគម្រោងការពារទឹកជំនន់និងកែលម្អប្រព័ន្ធ ប្រឡាយ-លូក្នុងរាជធានីភ្នំពេញជំហានទី៤ នាព្រឹកថ្ងៃទី៤ ខែមីនា។
សម្តេចតេជោនាយករដ្ឋមន្ត្រីបានលើកឡើងថា «ទ្វារបានបើកហើយ អ្នកចូលឬមិនចូលស៊ីសងលើអ្នក តែអ្នកក៏ត្រូវគិតថាទ្វារដែលបានបើកហើយវាក៏ អាចបិទទៅវិញដែរ ប្រសិនអ្នកព្រងើយកន្តើយ ហើយចង់ទាមទារនេះ ទាមទារនោះ លក្ខខណ្ឌនេះ លក្ខខណ្ឌនោះ អ្នកត្រូវចាំថា អ្នកត្រូវរង់ចាំរហូតដល់ ឆ្នាំ២០២២ អ្នកត្រូវចាំកុំរង់ចាំអ្វីទាំងអស់។ ត្រូវចាំប្រទេសនេះកំពុងស្ថិតក្នុងប្រទេសឯករាជ្យអធិបតេយ្យនិងជាប្រទេសមានប្រជាធិបតេយ្យនិងនីតិរដ្ឋរាជរដ្ឋាភិបាលបានខិតខំបើកទ្វារសម្រាប់អស់លោកអ្នក ប៉ុន្តែរឿងអស់លោក អ្នកចូល ឬមិនចូលជារឿងរបស់អស់លោកអ្នក។ ប៉ុន្តែអស់លោកអ្នកកុំសង្ឃឹមថានឹងមានការលើកទោស ឬ ការលើកលែងការចោទប្រកាន់ចំពោះអ្នកណានោះទេសុំផ្តាំ»។ ជាមួយគ្នានេះដែរ សម្តេចក៏បានលើកឡើថា «មានអ្នកខ្លះបានលើកឡើងថា ចាំក្រោយថ្ងៃ ៣ មីនា ខ្ញុំសូមឲ្យលោកឯងរង់ចាំមើលឆ្នាំ ២០២២ និងឆ្នាំ២០២៣ ឯណោះ លោកឯងចូល ឬ មិនចូលជាសិទ្ធិរបស់អ្នកឯង សិទ្ធិនយោបាយត្រូវហាមឃាត់ អ្នកឯងហ៊ានធ្វើនយោបាយខ្ញុំវ៉ៃខ្នោះ និយាយឲ្យពិត រឿងនេះវាតែប៉ុណ្ណឹង។ ទ្វារបើកហើយបើអ្នកឯងមិនចូលជារឿងរបស់អ្នកឯង ហើយកុំរង់ចាំថានឹងមានការសម្របសម្រួលនយោបាយណាមួយ។ នេះមិនមែនជារឿងនយោបាយនោះទេតែជារឿងផ្លូវច្បាប់។ តុលាការត្រូវកាត់ទោសជនដែលកំពុងស្ថិតនៅក្រោមការស៊ើបអង្កេតពីសំណាក់តុលាការជាបន្តនៅពេលគេបិទការស៊ើបអង្កេត គេនឹងដំណើរការក្តីតាមអំណាចរបស់តុលាការ។ ខ្ញុំគ្រាន់តែឲ្យសារចុងក្រោយសម្រាប់អ្នកហើយអ្នកព្រងើយកន្តើយទ្វារនឹងត្រូវបិទនៅមុនចូលឆ្នាំខ្មែរ ឬក្រោយចូលឆ្នាំខ្មែរ ហើយទោះបីជាអតីតមន្ត្រីបក្សប្រឆាំងដាក់លិខិតសុំយ៉ាងណាក្តីក៏ខ្ញុំមិនអើពើ ខ្ញុំគ្រាន់តែបញ្ជាក់ឲ្យអ្នកឯងបានដឹង ហើយបញ្ជាក់នៅមុខទូតជប៉ុនទៀតផង។ ព្រោះខ្ញុំដឹងអ្នកខ្លះរង់ចាំប៉ុន្មានថ្ងៃទៀត ប៉ុន្មានអាទិត្យទៀត ប៉ុន្តែអ្នកត្រូវរង់ចាំដល់ខែវិច្ឆិកា ឆ្នាំ ២០២២ ដូច្នេះអ្នកគ្មានលទ្ធភាពចូលរួមបោះឆ្នោតឃុំសង្កាត់ ឆ្នាំ២០២២នោះទេ...»។
ជាមួយនេះ សម្តេចតេជោនាយករដ្ឋមន្ត្រីក៏បានព្រមានចំពោះមនុស្សមួយចំនួនដែលនៅតែបន្តប្រើពាក្យសំដីបែបច្រឡើសបើសថា «បើអ្នកនៅបន្តឈ្លើយប្រើសំដីឈ្លើយទ្វារនឹងត្រូវបិទនៅមុនចូលឆ្នាំខ្មែរ ឬក្រោយចូលឆ្នាំខ្មែរឆ្នាំ២០១៩នេះព្រោះភាពព្រហើន គឺមិនអាច ឬវានឹងទៅតាមច្បាប់ គឺច្បាប់ ប៉ុន្តែគេអាចស្នើទៅរដ្ឋមន្ត្រីក្រសួងមហាផ្ទៃហើយស្នើទៅនាយករដ្ឋមន្ត្រី ប៉ុន្តែរដ្ឋមន្ត្រីក្រសួងមហាផ្ទៃបដិសេធ ហើយស្នើមកនាយករដ្ឋមន្ត្រីតែវាឈ្លើយពេកទុកឲ្យនៅនឹងទៅ។ ខ្ញុំដឹងមានអ្នកកំពុងរត់សុំសិទ្ធិធ្វើនយោបាយ ប៉ុន្តែក៏មានអ្នកស្ទាក់ស្ទើរ ហើយជាពិសេសអ្នកដែលស្ទាក់ស្ទើរនោះបានទទួលអនុសាសន៍ពីអ្នកវិភាគមួយដែលថារង់ចាំមើលប៉ុន្មានថ្ងៃ ប៉ុន្មានអាទិត្យទៀត។ ប៉ុន្តែខ្ញុំសូមប្រាប់ថាបើរង់ចាំដូច្នេះសូមរង់ចាំដល់រហូតដល់ខែវិច្ឆិកាឆ្នាំ២០២២ គឺជាថេរវេលានៃសាលដីកាតុលាការកំពូល ដូច្នេះអ្នកគ្មានឱកាសមកបង្កើតបក្សនយោបាយចូលរួមបោះឆ្នោតក្រុមប្រឹក្សាឃុំសង្កាត់ទេ»។
សម្តេចតេជោក៏បានលើកឡើងថា សម្តេចក៏បានប្រាប់ទៅកាន់តំណាងគណបក្សនយោបាយចំនួន ១៦ ដែលជាសមាជិកឧត្តមក្រុមប្រឹក្សា ពិគ្រោះនិងផ្តល់យោបល់ថា មានជម្រើសពីរសម្រាប់អតីតប្រឆាំងគឺទី១-សុំសិទ្ធិធ្វើនីតិសម្បទាហើយរៀបចំបក្សនយោបាយ ដើម្បីចូលរួមការបោះឆ្នោតឃុំសង្កាត់ឆ្នាំ២០២២ ជំរើសទី២-រង់ចាំឲ្យផុតសាលដីកាតុលាការនៅខែវិច្ឆិកាឆ្នាំ២០២២ ហើយត្រូវរៀបចំបង្កើតបក្សនយោបាយ ចូលរួមបោះឆ្នោតនៅខែកក្កដាឆ្នាំ២០២៣។ សម្តេចបានបន្តថា ប្រាក់ចំណេញគឺបានទៅលោកអ្នកទេព្រោះសន្លឹកឆ្នោតដែលគេមិនបោះឲ្យគណបក្សប្រជាជននោះគឺ បោះឲ្យអស់លោកទេ។ សូមបញ្ជាក់ថា នៅកម្ពុជាមិនមែនមានតែគណបក្សមួយនោះទេគឺមានរាប់សិប ហើយមានអ្នកខ្លះទើបបង្កើតថ្មី។
សម្តេចតេជោនាយករដ្ឋមន្ត្រីបានបន្តថា សម្តេចក្តាប់បានថាមានមន្ត្រីអតីតបក្សប្រឆាំងមួយចំនួនបានប្រជុំគ្នាថានឹងចូលមកសុំសិទ្ធិធ្វើនយោបាយ។ ឥឡូវមានអ្នកខ្លះនៅបាងកក អ្នកខ្លះនៅភ្នំពេញ អ្នកខ្លះនៅសៀមរាប គេបានប្រជុំគ្នាដែលភាគច្រើនមានគំនិតចង់សុំសិទ្ធិនយោបាយ។ ប៉ុន្តែមានមនុស្សម្នាក់ដែលមិនស្ថិតនៅក្នុងចំណោមមនុស្ស ១១៨ នាក់ ឬ មិននៅក្នុងចំណោម ១១៥ ព្រោះមាន៣នាក់បានសុំសិទ្ធិធ្វើនយោបាយរួចហើយ។ ម្នាក់នោះគេថា ដូចជាមានសញ្ញាសម្រាប់ដោះស្រាយបញ្ហានយោបាយ ចំណុចនេះសម្តេចបានបញ្ជាក់ច្បាស់ថាអត់ទេ សម្តេចគ្មានត្រូវការចរចានយោបាយអ្វីទាំងអស់ ខ្ញុំត្រូវទុកសិទ្ធិឲ្យតុលាការកាត់ក្តីសម្រាប់អ្នកដែលត្រូវបានចាប់ខ្លួន និង កំពុងដាក់ក្រោមការត្រួតពិនិត្យរបស់តុលាការ នេះជាសារនយោបាយជាក់លាក់ដែលសម្តេចមិនអាចធ្វើផ្ទុយពីនេះបានជាដាច់ខាត។ សម្តេចតេជោនាយករដ្ឋមន្ត្រីក៏បានឲ្យសារទៅអ្នកទាំងឡាយដែលឲ្យមតិនេះមតិនោះ សុំអ្នកត្រូវចាំសិទ្ធិចុះហត្ថលេខានៅលើដៃ ហ៊ុន សែន បើអ្នកព្រហើនហើយវាយតម្លៃខុស សូម្បីដាក់សុំក្នុងចំណោម ១៥ ហើយដឹងថា មានមនុស្សពីរ នាក់ដែលជាមនុស្សក្បាលរឹងប្រឆាំងនឹងសាលក្រមតុលាការសម្តេចក៏អាចធ្វើការទាត់ចោលមនុស្ស ២ នាក់នោះចេញ ហើយដោះស្រាយជូនតែ ១៣ នាក់ប៉ុណ្ណោះ នេះជាសិទ្ធិរបស់សម្តេចក្នុងការសម្រេច។ នៅពេលដែលអ្នកមិនទាន់មាននីតិសម្បទាខាងនយោបាយអ្នកធ្វើនយោបាយអ្នកនឹងខុស។ សម្តេចតេជោបញ្ជាក់ថា នេះមិនមែនជាការបង្ក្រាបខាងនយោបាយទេ ជាការដាស់តឿនដើម្បីពង្រីកនូវលំហខាងនយោបាយ សម្រាប់ដំណើរការប្រជាធិបតេយ្យសេរីពហុបក្ស និង ក្របខ័ណ្ឌនីតិរដ្ឋ។
សម្តេចតេជោ ហ៊ុន សែន បានបន្តថា រាជរដ្ឋាភិបាលបានបើកទ្វារ ដែលមុននេះគេសុំមកយើងមិនអាចផ្តល់ឲ្យ ដោយសារតែច្បាប់ស្តីពីគណបក្សនយោបាយមិនបានផ្តល់សិទ្ធិឲ្យនាយករដ្ឋមន្ត្រីសុំទៅព្រះមហាក្សត្រដើម្បីផ្តល់នីតិសម្បទាខាងនយោបាយ។ ប៉ុន្តែរាជរដ្ឋាភិបាលកម្ពុជាបានខិតខំកែច្បាប់ដើម្បីឲ្យ នាយករដ្ឋមន្ត្រីមានសិទ្ធិស្នើសុំទៅព្រះមហាក្សត្រដើម្បីផ្តល់នីតិសម្បទាដល់អ្នកនយោបាយ។
សូមរំលឹកថា ច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ ដែលជាការបើកផ្លូវឲ្យអ្នកនយោបាយជាប់បម្រាម អាចធ្វើសកម្មភាពនយោបាយរបស់ខ្លួនឡើងវិញនោះ ត្រូវបានព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជាចេញព្រះរាជក្រម ប្រកាសដាក់ឲ្យប្រើប្រាស់ជាផ្លូវការហើយ កាលពីថ្ងៃទី០២ ខែមករា ឆ្នាំ២០១៩។
រហូតមកដល់ពេលនេះអតីតសមាជិកគណបក្សសង្គ្រោះជាតិដែលជាប់បំរាមមិនឲ្យធ្វើនយោបាយរយៈពេល៥ឆ្នាំនោះ មានចំនួន៣នាក់ហើយដែលបានដាក់ពាក្យសុំសិទ្ធិនយោបាយឡើងវិញក្នុងនោះរួមមានលោក គង់ បូរ៉ា, លោក គង់ គាំ និងលោក ស៊ីម សុវណ្ណនី ហៅ ស៊ីម វ៉ាន់នី។
សូមបញ្ជាក់ថា អតីតគណបក្សសង្គ្រោះជាតិ សរុបចំនួន១១៨នាក់ ត្រូវបានតុលាការកំពូលចេញសាលដីកាផ្អាកសកម្មភាពនយោបាយរយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ ហើយបិទផ្លូវតវ៉ា បន្ទាប់ពីតុលាការរកឃើញថា អតីតគណបក្សប្រឆាំងនេះ បានឃុបឃិតជាមួយបរទេស ក្នុងគោលបំណងផ្តួលរំលំរាជរដ្ឋាភិបាលស្របច្បាប់របស់កម្ពុជា៕
Source: Kampuchea Thmey Daily
0 Comments