ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី០៤ ខែមីនា ឆ្នាំ២០១៩នេះ បានជំរុញឲ្យស្ថាប័នពាក់ព័ន្ធត្រូវតែគិតគូរអំពីការបង្កើតច្បាប់ប្រឆាំងនឹងព័ត៌មានក្លែងក្លាយនិងច្បាប់ប្រយុទ្ធប្រឆាំងនឹងបទឧក្រិដ្ឋ internet (ឧក្រិដ្ឋកម្មព័ត៌មានវិទ្យា)។ ខណៈដែលប្រទេសមួយចំនួនក្នុងពិភពលោកកំពុងតែអនុវត្តន៍ច្បាប់ទាំងអស់នេះរួចហើយ។
សម្តេចតេជោនាយករដ្ឋមន្ត្រីជំរុញបែបនេះ នៅក្នុងឱកាសអញ្ជើញជាអធិបតីក្នុងពិធីបើកការដ្ឋានសាងសង់សំណង់ផ្សេងៗក្នុងគម្រោងការពារទឹកជំនន់និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី៤។
ការជំរុញបែបនេះរបស់សម្តេចតេជោ ហ៊ុន សែន ត្រូវបានធ្វើឡើងបន្ទាប់ពី កាលពីវេលាម៉ោងជិត១២៖០០ថ្ងៃត្រង់ថ្ងៃទី២៥ ខែកុម្ភៈ ឆ្នាំ២០១៩ Facebook ផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាត្រូវជនអនាមិក Hack ។ បន្ទាប់ពីពួកគេលួចចូលហើយបានលុបទិន្នន័យជាបន្តបន្ទាប់ ហើយថែមទាំងបានបង្ហោះព័ត៌មានមិនពិតទៀតផង។
សម្តេចតេជោនាយករដ្ឋមន្ត្រីបានរំលឹកថា «ខ្ញុំសូមបញ្ជាក់ដែរថា ថ្ងៃមុនអាមេចោរវាបានមកចូលលួច facebook របស់ខ្ញុំបានប្រហែលជា ១ ម៉ោងស្រាប់តែវាយកផេករបស់ខ្ញុំបង្ហោះថា “ក្រុមហ៊ុនហ្វេសប៊ុកបានលុបនិងព្យាយាមបិទគណនីរបស់ខ្ញុំ។ តែខ្ញុំ ហ៊ុន សែន សូមប្រាប់ទៅវិញថា បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនឹងបិទលែងឲ្យប្រើហ្វេសប៊ុកនៅក្នុងស្រុកខ្មែរ ”»។
សម្តេចតេជោនាយករដ្ឋមន្ត្រីបន្តថា វាធ្វើអីមិនកើតវាលួចហ្វេសប៊ុកអ្នកឯងត្រូវដឹងថា នេះជាឧក្រិដ្ឋកម្មបច្ចេកវិទ្យាដែលបញ្ហានេះប្រទេសនៅលើពិភពលោកកំពុងតែយកចិត្តទុកដាក់ប្រឆាំង។ តាមពិតអានេះចោលសុទ្ធយើងអាចដាក់ការប្ដឹងផ្ដល់វាបានប៉ុន្តែយើងមិនធ្វើទេ ព្រោះសម្តេចជាអ្នកលេងហ្វេសប៊ុកម្នាក់រឿងអីសម្តេចទៅបិទហ្វេសប៊ុក។
សម្តេចតេជោនាយករដ្ឋមន្ត្រីបានមានប្រសាសន៍ថា «មនុស្សលេងហ្វេសបុកម្នាក់ស្រាប់តែចង់បិទ ហ្វេសប៊ុកសម្រាប់ប្រទេសរបស់ខ្លួន។ ខ្ញុំមិនបិទទេហ្វេសប៊ុក ! ខ្ញុំមិនឲ្យបិទទេ ! ព្រោះប្រជាពលរដ្ឋត្រូវការវា។ ច្បាស់ណាស់ថាយើងនឹងទទួលផលប្រយោជន៍ពីវាប៉ុន្តែក៏មានអ្នកដែលប្រើប្រាស់ក្នុងផ្លូវអវិជ្ជមានផងដែរ ហើយរឿងនេះយើងត្រូវធ្វើការអប់រំជាបណ្តើរៗក្នុងចំណោមប្រជាពលរដ្ឋរបស់យើងលើការប្រើប្រាស់ពាក្យសំដីហើយក៏ដូចជាវិធានការច្បាប់មួយចំនួនផងដែរ»។
សម្តេចតេជោនាយករដ្ឋមន្ត្រីបានលើកឡើងថា «នៅប្រទេសមួយចំនួនបានបង្កើតនូវច្បាប់ប្រឆាំងនឹងព័ត៌មានក្លែងក្លាយហើយ ហើយនៅប្រទេសមួយចំនួនក៏កំពុងតែរួមគ្នាប្រយុទ្ធប្រឆាំងបទឧក្រិដ្ឋកម្មព័ត៌មានវិទ្យា អីចឹងទេកម្ពុជាក៏ត្រូវតែគិតគូរបញ្ហានេះផងដែរ ។ ក៏ប៉ុន្តែទោះបីយ៉ាងក៏ដោយខ្ញុំសុំបញ្ជាក់ថា ខ្ញុំមិនបិទហ្វេសឬក៏បណ្តាញសង្គមផ្សេងៗនោះទេគឺខ្ញុំនឹងបន្តឲ្យប្រើប្រាស់វា លើកលែងតែអ្នកគ្រប់គ្រងក្រោយខ្ញុំយ៉ាងណាវាជាសិទ្ធិរបស់គេ។ប៉ុន្តែក្នុងដំណាក់កាលរបស់ខ្ញុំ ខ្ញុំបើកចំហសំរាប់ការលូតលាស់របស់ប្រជាជននៅក្នុងពេលនេះ»៕
Source: Kampuchea Thmey Daily
0 Comments