ក្លិបបាល់ទាត់ព្រះខ័នរាជស្វាយរៀង សមាជិកពានរង្វាន់លីគកំពូលកម្ពុជា (Metfone Cambodian League) បានធ្វើការប្រមូលផ្តុំកីឡាករអស់មួយរយៈហើយ មិនតែប៉ុណ្ណោះក្រុមនេះព្រមទាំងបានចុះចែករំលែកបទពិសោធន៍បាល់ទាត់ (Football Clinic) បានដោយជោគជ័យនៅទឹកដីខេត្តស្វាយរៀង កាលពីចុងសប្ដាហ៍ថ្មីៗនេះ មុនរដូវកាលថ្មីឆ្នាំ២០១៩ មកដល់។
ក្លិបបាល់ទាត់ព្រះខ័នរាជស្វាយរៀង បានចែករំលែកបទពិសោធន៍និងមូលដ្ឋានគ្រឹះបាល់ទាត់ដល់កុមារជាង៥០នាក់នៅក្នុងបរិវេណសាលាបឋមសិក្សាស្វាយជ្រុំ ក្នុងខេត្តស្វាយរៀង ខណៈលោកConor Nestor គ្រូបង្វឹក ក្រុមការងាររបស់ក្លិបនិងកីឡាករទាំងអស់បានចូលរួមយ៉ាងសស្រាក់សស្រាំផងដែរ។ នេះជាសកម្មភាពរបស់ក្លិបដែលតែងតែធ្វើជាប្រចាំនៅលើទឹកដីខេត្តរបស់ខ្លួន។
ក្រុមព្រះខ័នរាជស្វាយរៀង ដែលដឹកនាំដោយលោក Conor Nestor ទទួលចំណាត់ថ្នាក់មិនសូវបានល្អនោះទេប្រចាំរដូវកាលនេះទាំងក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន បើធៀបនឹងលទ្ធផលតាមឆ្នាំកន្លងមក។ ចំពោះលីគកំពូលកម្ពុជា វិញក្រោយប្រកួតបាន២២លើកឈ្នះបាន១០លើក ហើយស្មើគ្នាបាន៣លើក និងបរាជ័យរហូតដល់៩លើក ឈរចំណាត់ថ្នាក់លេខ៦បណ្តោះអាសន្នក្នុងចំណោមក្លិបជាសមាជិកទាំង១២។ ចំណែកពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ត្រឹមវគ្គ៨ក្រុមចុងក្រោយបន្ទាប់ពីចាញ់អង្គរថាយហ្គឺរ។
សម្រាប់ប្រកួតបើករដូវកាលឆ្នាំ២០១៩ ខាងមុខនេះក្រុមព្រះខ័នរាជស្វាយរៀងត្រូវបើកទ្វារកីឡដ្ឋានខេត្តរបស់ខ្លួនស្វាគមន៍ក្រុមក្រសួងការពារជាតិ នៅវេលាម៉ោង៦ល្ងាចថ្ងៃទី១៧ ខែមីនា ឆ្នាំ២០១៩ ក្នុងសប្ដាហ៍ទី១។ យ៉ាងណាក្តីក្រុមទាំងមូលបានចូលហ្វឹកហាត់លើទីលានកីឡដ្ឋានខេត្តបានមួយរយៈខ្លីមកហើយ៕
Source: Kampuchea Thmey Daily
0 Comments