ភ្នំពេញ ៖ សិស្សានុសិស្សជាង២២០០នាក់រៀននៅសាលាបឋមសិក្សាគោកបញ្ជាន់ស្ថិតនៅភូមិចោមចៅទី២ សង្កាត់ចោមចៅទី២ខណ្ឌពោធិ៍សែនជ័យ រាជធានីភ្នំពេញ កាលពីពេលថ្មីៗនេះបានទទួលសម្ភារៈសិក្សារួមមាន សៀវភៅ ប៊ិចនិងសម្ភារៈកីឡាមួយចំនួន ពីសប្បុរសជនដើម្បីជួយសម្រួលដល់ការសិក្សាប្រចាំថ្ងៃរបស់ពួកគេ។
លោក ឡូន ផុន ជានាយកសាលាបឋមសិក្សាគោកបញ្ជាន់ បានមានប្រសាសន៍ថា «ជំនួសមុខឲ្យលោកគ្រូ អ្នកគ្រូ និងសិស្សានុសិស្សទាំងអស់ ខ្ញុំសូមថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងបុគ្គលិករបស់ក្រុមហ៊ុនអរសាំគ្លូប៊លអ៊ីនវេសម៉ិនគ្រុប ដែលបានជួយឧបត្ថម្ភដល់សិស្សានុសិស្សនៅក្នុងសាលារៀនរបស់យើង។ វត្តមាន និងភាពស្មោះត្រង់របស់ពួកគេ គឺជាគំរូដ៏ល្អដែលសហគមន៍ជឿជាក់ថា សហគ្រាសដទៃទៀត នឹងអនុវត្តតាម។ ខ្ញុំសង្ឃឹមថា ក្រុមហ៊ុន នឹងនៅតែបន្តសហការចូលរួមចំណែកជួយអភិវឌ្ឍន៍សាលារបស់យើង»។
ចំណែកប្អូនធារី សិស្សថ្នាក់ទី៥ នៃសាលាបឋមសិក្សាគោកបញ្ជាន់បានមានចំណាប់អារម្មណ៍ថា «ខ្ញុំសប្បាយចិត្តណាស់ ដែលទទួលបានសៀវភៅ និងសម្ភារៈសិក្សាមួយចំនួនពីក្រុមហ៊ុនអរសាំថ្ងៃនេះ។ ខ្ញុំនឹងខិតខំប្រឹងប្រែងរៀនសូត្រ ដើម្បីគ្រួសារ និងប្រទេសជាតិខ្ញុំ។ ខ្ញុំនឹងមិនឲ្យពួកគាត់ខកបំណងទេ។ ខ្ញុំសប្បាយចិត្ត និងមានភាពកក់ក្តៅណាស់ ពេលបានជួបពួកគាត់ ពីព្រោះពួកគាត់ មានភាពរួសរាយរាក់ទាក់ និងចិត្តល្អចំពោះយើងគ្រប់គ្នា។ ពួកយើងនឹងប្រឹងប្រែងរៀនសូត្រ ដើម្បីទទួលបានជោគជ័យដូចជាពួកគាត់។ ខ្ញុំអរគុណបងៗ ហើយស្រឡាញ់បងៗទាំងអស់គ្នាណាស់»។
ចំណែក លោកស្រី Evelyn Pek បានមានប្រសាសន៍ថា «យើងខ្ញុំទាំងអស់គ្នាមានក្តីសោមនស្សរីករាយក្រៃលែងដែលមានវត្តមាននៅថ្ងៃនេះ។ ក្រុមហ៊ុនអរសាំ មិនត្រឹមតែធ្វើការវិនិយោគលើវិស័យនានានៅក្នុងព្រះរាជាណាចក្រប្រទេសកម្ពុជាប៉ុណ្ណោះទេ ក្រុមហ៊ុនក៏បានផ្តោតការយកចិត្តទុកដាក់ខ្ពស់ជាពិសេស ទៅលើការបណ្តុះបណ្តាលធនធានមនុស្សប្រកបដោយគុណភាព។ អ្វីដែលសំខាន់ជាងនេះទៅទៀតនោះគឺ យើងជឿជាក់ថា ការវិនិយោគទៅលើកុមារ គឺជាការវិនិយោគដើម្បីអនាគតរបស់ប្រទេសកម្ពុជា ពីព្រោះកុមារគឺជាទំពាំងស្នងឫស្សី និងជាសសរទ្រូងរបស់ប្រទេសជាតិ។ ថ្ងៃនេះយើងខ្ញុំសប្បាយចិត្តខ្លាំងណាស់ដែលបានរួមចំណែកក្នុងការជួយជ្រោមជ្រែង ដល់សិស្សានុសិស្សទាំងអស់គ្នាដែលកំពុងសិក្សានៅក្នុងសាលាបឋមសិក្សាគោកបញ្ជាន់នេះ»៕
Source: Kampuchea Thmey Daily
0 Comments