ភ្នំពេញ ៖ សពជនជាតិចិនម្នាក់ ត្រូវបានមិត្តភ័ក្ដិរួមការងាររបស់ខ្លួនប្រទះឃើញដេកស្លាប់ក្នុងថ្លុកឈាម ដោយមានស្នាមអារ.ក នឹងកាំបិតដេកស្លាប់លើគ្រែយ៉ាងអាណោចអាធ័ម ក្រោយពេលសមត្ថកិច្ចជំនាញចុះទៅពិនិត្យឃើញថា ជាករណីអត្តឃាតទៅវិញ កាលពីវេលាម៉ោង៩យប់ ថ្ងៃទី១០ ខែមីនា ឆ្នាំ២០១៩ ស្ថិតនៅបន្ទប់ កន្លែងដេកក្នុងឃ្លាំងនៃបរិវេណទល់មុខរោងចក្រសឺពីយ៉ា ខេមបូឌា ហ្គាមេន ដែលមានទីតាំងស្ថិតនៅ តាមផ្លូវលំ ក្នុងភូមិត្រពាំងជ្រៃសង្កាត់កាកាបទី២ខណ្ឌពោធិ៍សែនជ័យ។
សាកសពជនជាតិនេះមាន ឈ្មោះWEI MINGkAI ភេទប្រុស អាយុ៤១ឆ្នាំ ជនជាតិចិន រស់នៅ ក្នុងបន្ទប់ ឃ្លាំងផ្ទុកអីវ៉ាន់ របស់រោងចក្រ សឺពីយ៉ា។ កន្លែងឃ្លាំងស្តុកឥវ៉ាន់រោងចក្រខាងលើ ជនរងគ្រោះស្នាក់នៅគ្នា២នាក់ ជាមួយមិត្តភ័ក្ដិម្នាក់ទៀត។
តាមប្រភពព័ត៌មានបានឲ្យដឹងថា កាលពីយប់ថ្ងៃទី០៩ ខែមិនា ឆ្នាំ២០១៩ ជនជាតិចិនម្នាក់ទៀតដែលត្រូវជាមិត្តភ័ក្ដិរបស់សព មិនបានដេកស្នាក់នៅជាមួយគ្នាឡើយ ដោយរវល់តែទៅដេកជាមួយសង្សារពេញមួយថ្ងៃ ហើយព្យាយាមតេទូរស័ព្ទនិងឆាតតាមហ្វេសប៊ុក មកជនរងគ្រោះតែមិនលើកទទួល ឬឆ្លើយតបឡើយ។ រហូតមកដល់យប់ថ្ងៃទី១០ ខែមីនា មុនពេលមានការភ្ញាក់ផ្អើល ជនជាតិចិនម្នាក់នេះដែលជាមិត្តរួមការងារ បានត្រឡប់មកដល់រោងចក្រវិញ បន្ទប់ឃ្លាំងកន្លែងដេកសម្រាកនោះ ត្រូវបានជាប់សោពីខាងក្នុងហើយបាន ព្យាយាមទូរស័ព្ទរកជនរងគ្រោះជាច្រើនដងទៀត តែនៅមិនលើកដដែល ទើបហៅសន្តិសុខ មកជួយផ្លោះរបងចូល ហើយគាស់ទ្វារចូលក្នុងបន្ទប់ ទើបប្រទះឃើញសពជនរងគ្រោះដេកស្លាប់ មានស្នាមអារ.កឈាម ហូរឈាមឡើងកកបាត់ទៅហើយ ក៏ឆោឡោនាំគ្នារាយការណ៍ប្រាប់សមត្ថកិច្ចភ្លាមៗផងដែរ។
ក្រោយមានការភ្ញាក់ផ្អើល សមត្ថកិច្ចគ្រប់ជំនាញ បានត្រួតពិនិត្យករណីខាងលើ ហើយបាននាំជនចិនប្រមាណ៣នាក់ យកទៅសាកសួរនៅប៉ុស្តិ៍នគរបាលភ្លាមៗផងដែរ ដោយមានអ្នក បកប្រែភាសាចិនមកជួយផងដែរ។ ចំណែកឯសាកសព ជនជាតិចិននេះ ត្រូវបានជំនាញព្រហ្មទណ្ឌខណ្ឌពោធិ៍សែនជ័យ សហការចូលរួមជាមួយជំនាញចក្ខុរាជធានីភ្នំពេញដើម្បី ពិនិត្យមើលសាកសពខាងលើ។
ពាក់ព័ន្ធនឹងបញ្ហានេះ សមត្ថកិច្ចជំនាញខាងលើ ពុំទាន់បញ្ជាក់ថា វាជាករណីឃាតកម្ម ឬ អត្តឃាតនៅឡើយនោះទេ។ ព្រោះបើតាមលោកយឹម សារ៉ាន់ អធិការនគរបាលខណ្ឌពោធិ៍សែនជ័យបានបញ្ជាក់ថា ករណីនេះវាជារឿង អត្តឃាតព្រោះថា កន្លងមកជនរងគ្រោះម្នាក់នេះធ្លាប់ព្យាយាមសម្លាប់បែបនេះពីរបីដងមកហើយតែមិនបានសម្រេចទើបលើកនេះបានសម្រេចដូចបំណងម្យ៉ាងទៀត បើមើលតាមស្នាមអារ វាមុតរាក់ហើយមានចាក់សោបន្ទប់ពីខាងក្នុងថែមទៀតផង។
សពជនជាតិចិនខាងលើ ត្រូវបានសមត្ថកិច្ចជំនាញព្រហ្មទណ្ឌខណ្ឌពោធិ៍សែនជ័យនឹងជំនាញពិនិត្យសាកសពរាជធានីភ្នំពេញ យកទៅតម្កល់នៅវត្តស្ទឹងមានជ័យជាបណ្ដោះអាសន្នរង់ចាំមិត្តភ័ក្ដិមកចាត់ចែងតាមការគួរ៕
Source: Kampuchea Thmey Daily
0 Comments