លោក​ត្រាំ ​ព្រមាន​លោក​គីម ​អំពី​ការសាងសង់​ទីតាំង​បាញ់​រ៉ុក្កែត​ឡើងវិញ

ប្រធានាធិបតី​អាមេរិក​លោក ដូ​ណា​ល់ ត្រាំ បាន​និយាយ​កាលពី​ថ្ងៃ​ពុធ​ថា លោក​នឹងមាន​ការខកចិត្ត​យ៉ាងខ្លាំង​ចំពោះ​មេដឹកនាំ​កូរ៉េខាងជើង​លោក​គីម​ជុង​អ៊ុន​ប្រសិនបើ​របាយការណ៍​ដែលថា​ការងារ​កំពុងដំណើរកា​រ​ដើម្បី​ស្ថាបនា​ឡើងវិញ​នូវ​ទីតាំង​រ៉ុក្កែត​រយៈ​ចម្ងាយ​ឆ្ងាយ​គឺជា​ការពិត​មែន​នោះ។

ថ្លែង​ទៅកាន់​អ្នកយកព័ត៌មាន លោក ត្រាំ បាន​និយាយថា “​វា​ឆាប់​ពេក​ក្នុងការ​សន្និដ្ឋានថា​តើ​ព័ត៌មាន​អំពី​ការងារ​នៅ​ទីតាំង​របស់​កូរ៉េខាងជើង​គឺជា​ការពិត​មែនឬ​អត់​”​។​

លោក​ត្រាំ​និង​លោក​គីម​បាន​ជួបគ្នា​កាលពី​សប្តាហ៍​មុន​នៅ​ប្រទេស​វៀតណាម​ដើម្បី​ចរចា​ស្តីពី​ការ​កម្ចាត់​អាវុធ​នុយក្លេអ៊ែរ​របស់​កូរ៉េខាងជើង​ប៉ុន្តែ​កិច្ចប្រជុំ​កំពូល​នោះបាន​បញ្ចប់ទៅ​មុនពេល​កំណត់ដោយ​គ្មាន​ការរីកចម្រើន​ណាមួយ​ឡើយ​។​

ក្រុម​អ្នកស្រាវជ្រាវ​បាន​និយាយថា ការកសាង​ឡើងវិញ​នូវ​ទីតាំង​នេះ​បានចាប់ផ្តើម​ចាប់តាំងពី​កិច្ចប្រជុំ​មក​ឬ​ប្រហែលជា​បានចាប់ផ្តើម​មុន​កិច្ចប្រជុំ​នៅ​ប្រទេស​វៀតណាម​ទៅទៀត​។​

ក្រុម​អ្នកស្រាវជ្រាវ​នៅ​មជ្ឈមណ្ឌល​សិក្សា​យុទ្ធសាស្ត្រ​និង​អន្តរជាតិ (CSIS) ដែលមាន​មូលដ្ឋាន​នៅ​ទីក្រុង​វ៉ាស៊ីនតោន​បាន​និយាយថា “​ទីតាំង​នេះ​មិនមាន​សកម្មភាព​ទេ​ចាប់តាំងពី​ខែសីហា​ឆ្នាំ​២០១៨​មកហើយ​សកម្មភាព​នាពេល​បច្ចុប្បន្ននេះ​គឺមាន​ចេតនា​និង​មាន​គោលបំណង​”​។​

លោក​គីម​បាន​ព្រមព្រៀង​បិទ​ទីតាំង​សាកល្បង​មី​ស៊ី​ល Sohae នៅឯ​កិច្ចប្រជុំ​កំពូល​មួយ​ជាមួយ ប្រធានាធិបតី​កូរ៉េខាងត្បូង​លោក​មូ​ន​ចេ​អ៊ី​ន​ក្នុង​ទីក្រុង​ព្យុងយ៉ាង​ដែលជា​ផ្នែក​មួយ​នៃ​វិធាន​ការកសាង​ទំនុកចិត្ត​ហើយ​រូបភាព​ផ្កាយរណប​កាលពី​ខែសីហា​បាន​បង្ហាញថា កម្មករ​បាន​រុះរើ​ជើង​ទម្រ​ធ្វើតេស្ត​ម៉ាស៊ីន​នៅ​ទីតាំង​នោះ​រួចទៅហើយ​។​

ប៉ុន្តែ CSIS បាន​និយាយថា សកម្មភាព​សាងសង់​ឥឡូវនេះ​គឺមាន​ភាពជាក់ស្តែង​នៅ​ស្ថានីយ៍​បាញ់​បង្ហោះ​ផ្កាយរណប Sohae ដែលជា​កន្លែង​ទីក្រុង​ព្យុងយ៉ាង​បាន​បាញ់​បង្ហោះ​ផ្កាយរណប​នៅក្នុង​ឆ្នាំ​២០១២​និង​ឆ្នាំ​២០១៦​។​

ក្រោយមក កូរ៉េខាងជើង​ត្រូវបាន​ហាមឃាត់​ដោយ​ក្រុមប្រឹក្សាសន្តិសុខ​អង្គការសហប្រជាជាតិ​ពី​ការបាញ់​បង្ហោះ​ដោយសារតែ​បច្ចេកវិទ្យា​ខ្លះ​របស់​វា​គឺ​ស្រដៀង​ទៅនឹង​មី​ស៊ី​ល​ឆ្លង​ទ្វីប​ឬ ICBM៕ AFP

​

Source: Kampuchea Thmey Daily