មន្ត្រីគយបាននិយាយកាលពីថ្ងៃសុក្រថា ប្រទេសវៀតណាម បានរឹបអូសភ្លុកដំរីជាង៩តោននៅក្នុងការដឹកជញ្ជូនឈើមួយមកពីសាធារណរដ្ឋកុងហ្គោដែលនេះជាការរឹបអូសសត្វព្រៃខុសច្បាប់ចុងក្រោយបំផុតមួយរបស់ប្រទេសនេះ។ថ្វីបើវាជារឿងខុសច្បាប់ក្នុងការទិញនិងលក់ភ្លុកដំរីនៅប្រទេសកុម្មុយនិស្តវៀតណាមក៏ដោយ ការអនុវត្តច្បាប់ធូររលុងបានអនុញ្ញាតឲ្យមានការជួញដូរខុសច្បាប់រីករាលដាលក្នុងទីផ្សារងងឹត។
រដ្ឋាភិបាលបានប្ដេជ្ញាថានឹងបង្ក្រាបការជួញដូរសត្វព្រៃខុសច្បាប់ស្របពេលមានការដាក់សម្ពាធពីអន្ដរជាតិហើយអាជ្ញាធរបាននិយាយថា ការវាយឆ្មក់ចុងក្រោយបំផុតនៅទីក្រុង Danang ភាគកណ្តាលនេះគឺជាការវាយឆ្មក់ធំបំផុតនៅក្នុងរយៈពេលប៉ុន្មានឆ្នាំចុងក្រោយនេះ។
យោងតាមវេបសាយព័ត៌មាន Hai Quan ដែលជាអ្នកនាំពាក្យរបស់គយវៀតណាមបានឲ្យដឹងថា “កញ្ចប់ទំនិញចំនួន៩.១តោនដ៏ធំដែលគេសង្ស័យថាមានភ្លុកដំរីលាក់នៅក្នុងកំណាត់ឈើគឺត្រូវបានគេរកឃើញនិងរឹបអូស”។
វេបសាយនេះបានបន្ថែមថា កំណាត់ឈើដែលផ្ទុកភ្លុកដំរីនៅខាងក្នុងគឺត្រូវបានរកឃើញកាលពីថ្ងៃអង្គារនៅកំពង់ផែដ៏សំខាន់របស់ទីក្រុង Danang លើកប៉ាល់មួយគ្រឿងមកពីសាធារណរដ្ឋកុងហ្គោ។
មន្ត្រីគយម្នាក់បានប្រាប់ AFP ថា “អាជ្ញាធរនៅតែកំពុងធ្វើការត្រួតពិនិត្យមុនពេលធ្វើការសន្និដ្ឋានចុងក្រោយអំពីវត្ថុនេះ”។
ភ្លុកដំរីត្រូវបានគេប្រើសម្រាប់ធ្វើជាគ្រឿងអលង្ការ គ្រឿងតុបតែងផ្ទះនិងឱសថបុរាណនៅក្នុងប្រទេសវៀតណាមដែលជាមជ្ឈមណ្ឌលឆ្លងកាត់ដ៏ពេញនិយមផងដែរសម្រាប់សត្វព្រៃខុសច្បាប់ទៅទីតាំងផ្សេងទៀតនៅតំបន់អាស៊ីជាពិសេសប្រទេសចិន។
រដ្ឋាភិបាលបានតស៊ូដើម្បីបង្ក្រាបការជួញដូរខុសច្បាប់ខណៈការលក់បានផ្លាស់ប្តូរពីកន្លែងលក់ដូរតាមប្រពៃណីទៅលក់តាមអ៊ីនធើណិតវិញ៕ AFP
Source: Kampuchea Thmey Daily
0 Comments