ឧត្តរមានជ័យ ៖ នៅថ្ងៃទី២៩ ខែមីនា ឆ្នាំ២០១៩ វេលាម៉ោង០៩និង០០នាទី បន្ទាប់ពីកម្លាំងជំនាញសមត្ថកិច្ច បានសួរចម្លើយ ដោយយកចិត្តទុកដាក់ ទៅលើជនសង្ស័យ ឈ្មោះ ហ៊ូ សាមផាន ពាក់ព័ន្ធនឹង ករណី គ្រឿងញៀន ដែលធ្វើការបង្ក្រាបបាន កាលពីថ្ងៃទី២៨ ខែមីនា ឆ្នាំ២០១៩ មកដល់ថ្ងៃនេះ ជនសង្ស័យខាងលើបានសារភាពថា ខ្លួនបានលាក់ទុកនូវសារធាតុញៀនមួយចំនួនទៀត នៅផ្ទះរបស់ខ្លួន។
បន្ទាប់ពីបានចម្លើយភ្លាមៗនោះ លោកវរសេនីយ៍ឯក ហម ភិរម្យ អធិការនគរបាលក្រុងសំរោង បានដឹកនាំកម្លាំងក្រោមឱវាទ និង ជនសង្ស័យ ហ៊ូ សាមផាន យកទៅផ្ទះដែលខ្លួនស្នាក់នៅ ដើម្បីចង្អុលបង្ហាញ ទីកន្លែងដែលខ្លួនបានលាក់ទុកនូវសារធាតុញៀន។ ខណៈពេលទៅដល់ និងមានការចង្អុលបង្ហាញពីជនសង្ស័យ កម្លាំងយើងបានរកឃើញថ្នាំញៀនបន្ថែមទៀតរួមមាន មេតំហ្វេតាមីនICE (ម៉ាទឹកកក) ចំនួន៨កញ្ចប់ធំ ស្មើនឹង៦០១.៣១ក្រាម និង មេតំហ្វេតាមីនគ្រាប់ ចំនួន៦៣គ្រាប់ បន្ថែមទៀត។
បច្ចុប្បន្ន ជនសង្ស័យ រួមនឹងវត្ថុតាងខាងលើ ត្រូវបាននាំមកកាន់អធិការដ្ឋាននគរបាលក្រុង ដើម្បីសាកសួរ និងកសាងសំណុំរឿងតាមនីតិវិធី៕
Source: Kampuchea Thmey Daily
0 Comments