នៅថ្ងៃសុក្រ នាយករដ្ឋមន្ត្រីលោកស្រី Theresa May នឹងដាក់កិច្ចព្រមព្រៀង Brexit ដែលត្រូវ បានច្រានចោលពីរដងរួចមកហើយនោះសម្រាប់ការបោះឆ្នោតសភាជាលើកទីបីនៅ ក្នុងការប៉ុនប៉ងថ្មីដើម្បីចៀសវាងការចាកចេញដ៏វឹកវរពីសហភាពអឺរ៉ុបក្នុងរយៈពេល២សប្ដាហ៍ខាងមុខ។
ការប៉ុនប៉ងរបស់លោកស្រី May បានកើតឡើងមួយថ្ងៃបន្ទាប់ពីការប្តេជ្ញាចិត្តរបស់លោកស្រីដើម្បីលាលែងពីតំណែងក្នុងគោលបំណងបញ្ចុះបញ្ចូលគូប្រជែងរបស់លោកស្រីឲ្យសម្រេចឲ្យបាននូវចក្ខុវិស័យរបស់ លោកស្រីក្នុងការបំបែកសមាជិកភាពរយៈពេល៤៦ឆ្នាំរបស់ប្រទេសអង់គ្លេសក្នុងប្លុកនេះ។
លោកស្រី Andrea Leadsom តំណាងរដ្ឋាភិបាលនៅក្នុងសភាបាននិយាយកាលពីថ្ងៃព្រហស្បតិ៍ថា ការបោះឆ្នោតថ្មីនេះបានផ្តល់ឱកាសដល់សមាជិកសភាដែលបះបោរដើម្បីធានាការចាកចេញរបស់ចក្រភពអង់គ្លេសពីសហភាពអឺរ៉ុបនៅថ្ងៃទី២២ខែឧសភា។
លោកស្រីបានប្រាប់សមាជិកសភាថា “ខ្ញុំសូមលើកទឹកចិត្តសមាជិកសភាទាំងអស់ឲ្យគាំទ្រវានិងធានាថា យើងចាកចេញពីសហភាពអឺរ៉ុបដោយផ្តល់ឲ្យប្រជាជននិងអាជីវកម្មនូវភាពច្បាស់លាស់ដែលពួកគេត្រូវការ”។
រដ្ឋាភិបាលសង្ឃឹមថា ការរៀបចំការបោះឆ្នោតនៅថ្ងៃដែលចក្រភពអង់គ្លេសត្រូវចាកចេញពីប្លុកនេះគឺអាចយកឈ្នះលើសមាជិកសភាដែលនៅតែមានការសង្ស័យ។
ប្រធានសភាលោក John Bercow បានសម្តែងការយល់ព្រមរបស់លោកដើម្បីរៀបចំការបោះឆ្នោតនេះបន្ទាប់ពីលោកបានច្រានចោលការប៉ុនប៉ងស្រដៀងគ្នានេះកាលពីសប្តាហ៍មុន។
ការបោះឆ្នោតសភាមួយផ្សេងទៀតនឹងត្រូវបានទាមទារមុនពេល Brexit អាចធ្វើទៅបាន។
ការបរាជ័យណាមួយដោយសមាជិកសភាដើម្បីអនុម័តកតិកាសញ្ញាដែលត្រូវបានចុះហត្ថលេខាកាលពីឆ្នាំមុនដោយលោកស្រី May និងមេដឹកនាំសហភាពអ៊ឺរ៉ុបចំនួន២៧រូបអាចនាំឲ្យមានសេណារីយ៉ូ “Brexit ទាំងគ្មានកិច្ចព្រមព្រៀង” នៅថ្ងៃ១២ខែមេសា។
ចក្រភពអង់គ្លេសអាចនឹងព្យាយាមបញ្ចៀសការចាកចេញដោយការស្វែងរកការពន្យារពេលយូរទៀតដែលនឹងបង្ខំឲ្យប្រទេសនេះចូលរួមក្នុងការបោះឆ្នោតសភាអឺរ៉ុបក្នុងខែឧសភា៕ AFP
Source: Kampuchea Thmey Daily
0 Comments