ភ្នំពេញ ៖ លោក នុត សុខុម អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា តាមស្ថិតិប្រជាពលរដ្ឋប៉ាន់ស្មានឆ្នាំ២០១៩ អ្នកដែលមានអាយុចាប់ពី១៨ ឡើងទៅមានចំនួន១០,១៧៨,៨០៩ នាក់ ហើយ គ.ជ.ប មានផែនការចុះឈ្មោះអ្នកបោះឆ្នោតថ្មីចំនួន៣៧២,៦២៨ នាក់ ហើយអ្នកដែលត្រូវលុបឈ្មោះចេញពីបញ្ជីបោះឆ្នោតមានចំនួន៨៨,៦២៦ នាក់ ចំណែកអ្នកដែលមានឈ្មោះក្នុងបញ្ជីបោះឆ្នោតឆ្នាំ២០១៨ មានចំនួន ៨,៥៤៤,៨៨៥ នាក់ ហើយការិយាល័យបោះឆ្នោតឆ្នាំ២០១៩ មានចំនួន២៣,៣៦៤ ការិយាល័យ។
លោក នុត សុខុម អះអាងបែបនេះ ខណៈលោកបានអញ្ជើញជាអធិបតីក្នុងកិច្ចប្រជុំជាមួយភាគីពាក់ព័ន្ធ ស្តីពីការប្រកាសផ្សព្វផ្សាយប្រតិទិន នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ និងការផ្សព្វផ្សាយស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មាន នៅសាលសន្និសីទសារព័ត៌មាន គ.ជ.ប កាលពីព្រឹកថ្ងៃទី២៩ ខែមីនា ឆ្នាំ២០១៩ ដែលកិច្ចប្រជុំនោះ មានការចូលរួមពីតំណាងក្រុមប្រឹក្សាធម្មនុញ្ញ ព្រឹទ្ធសភា រដ្ឋសភា ក្រសួងមហាផ្ទៃ ក្រសួងព័ត៌មាន ស្ថានទូតជប៉ុន អង្គការមិនមែនរដ្ឋាភិបាលចំនួន៦ គណបក្សនយោបាយ ចំនួន១៤ អង្គភាពសារព័ត៌មានចំនួន៨ និងមន្ត្រីនៃទីស្តីការ គ.ជ.ប សរុបប្រមាណ៦០នាក់។
តាមលោក នុត សុខុម ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ នេះ ដូចគ្នានឹងឆ្នាំកន្លងទៅដែរ គឺមានគោលដៅធានាឲ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាព តាមរយៈចុះឈ្មោះបោះឆ្នោត, ការកែតម្រូវឈ្មោះ ឬទិន្នន័យអ្នកបោះឆ្នោត តាមសំណើរបស់សាមីខ្លួនដោយផ្អែកលើឯកសារសំអាងត្រឹមត្រូវ និងការស្រង់ និងលុបឈ្មោះអ្នកបោះឆ្នោត។
ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ នេះ ធ្វើឡើងសំរាប់ប្រជាពលរដ្ឋខ្មែរដែលមានសិទ្ធិបោះឆ្នោត ហើយមិនទាន់បានចុះឈ្មោះបោះឆ្នោតពីមុនមក, ប្រជាពលរដ្ឋខ្មែរដែលទើបគ្រប់អាយុ១៨ឆ្នាំ (កើតមុន ឬកើតត្រឹមថ្ងៃទី១ ខែសីហា ឆ្នាំ២០០១), ប្រជាពលរដ្ឋខ្មែរដែលបានផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី ត្រូវទៅចុះឈ្មោះបោះឆ្នោតនៅតាមឃុំ សង្កាត់ដែលសាមីខ្លួនត្រូវបោះឆ្នោត, ប្រជាពលរដ្ឋដែលបានទទួលមរណភាព, ប្រជាពលរដ្ឋដែលត្រូវបានដកហូតសិទ្ធិបោះឆ្នោតជាបណ្តោះអាសន្ន, ប្រជាពលរដ្ឋដែលបានផ្លាស់លំនៅឋាន ឬទីសំណាក់ចេញទៅឃុំ សង្កាត់ផ្សេង ដែលមានឯកសារជាសំអាងត្រឹមត្រូវ និងច្បាស់លាស់ ដើម្បីលុបចេញពីបញ្ជីបោះឆ្នោត។
ឆ្លៀតក្នុងឱកាសនេះ លោកអនុប្រធាន ក៏បានអំពាវនាវដល់គណបក្សនយោបាយ អង្គការមិនមែនរដ្ឋាភិបាលជាតិ និងអន្តរជាតិ ចូលរួមដាក់ភ្នាក់ងារ ឬអ្នកសង្កេតការណ៍របស់ខ្លួន ដើម្បីតាមដាន និងពិនិត្យមើលដំណើរការនេះនៅតាមការិយាល័យចុះឈ្មោះបោះឆ្នោត ដើម្បីធានាការអនុវត្តឲ្យបានរលូន និងជោគជ័យ និងបានអំពាវនាវឱ្យអាជ្ញាធរគ្រប់លំដាប់ថ្នាក់ចូលរួមសហការ និងថែរក្សា ការពារសន្តិសុខ និងធានាបាននូវសុវត្ថិភាពជូនដល់ប្រជាពលរដ្ឋ។
សូមជម្រាបជូនថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ ត្រូវធ្វើឡើងនៅតាមសាលាឃុំ សង្កាត់ និងនៅតាមភូមិមួយចំនួននៅក្នុងឃុំ សង្កាត់ ដែលមានរយៈពេល ២២ថ្ងៃ ដោយបែងចែកពេលវេលាដូចជា គឺរយៈពេល៦ថ្ងៃ ពីថ្ងៃទី១ ដល់ថ្ងៃទី៦ ខែឧសភា ចុះឈ្មោះនៅតាមសាលាឃុំ សង្កាត់, រយៈពេល១១ថ្ងៃ ពីថ្ងៃទី៧ ដល់ថ្ងៃទី១៧ ខែឧសភា ចុះឈ្មោះចល័តតាមភូមិមួយចំនួនក្នុងឃុំ សង្កាត់ និងរយៈពេល៥ថ្ងៃ ពីថ្ងៃទី១៨ ដល់ថ្ងៃទី២២ ខែឧសភា ត្រឡប់មកចុះឈ្មោះនៅតាមសាលាឃុំ សង្កាត់វិញ៕
Source: Kampuchea Thmey Daily
0 Comments