ភ្នំពេញ ៖ បុរសម្នាក់ត្រូវបានសមត្ថកិច្ចនគរបាលខណ្ឌសែនសុខឃាត់ខ្លួនកាលពីថ្ងៃទី២៩ខែមីនា ឆ្នាំ២០១៩ តាមបណ្តឹងរបស់ជនរងគ្រោះម្នាក់ចោទប្រកាន់ពីបទរំលោភទំនុកចិត្ត ឆបោកយកម៉ូតូគេទៅលក់ក្រោមរូបភាពដាក់បញ្ចាំ។
ឈ្មោះ អឹង គៀងសុង ភេទប្រុស អាយុ៣៤ឆ្នាំ មានទីលំនៅ សង្កាត់ទឹកល្អក់១ ខណ្ឌទួលគោក មុខរបរបុគ្គលិកក្រុមហ៊ុនម៉ូឌែន ឡូធឺរី មានទីតាំងនៅភូមិរោងចក្រ សង្កាត់គោកឃ្លាង គាត់ជាជនដែលត្រូវបានឃាត់ខ្លួននិងចោទប្រកាន់ខាងលើ។
ប៉ូលិសនិយាយថា ជនសង្ស័យខាងលើត្រូវបានឃាត់ខ្លួនតាមបណ្តឹងរបស់ឈ្មោះ ឆាយ លាងស៊ីញ ភេទប្រុសអាយុ២៧ឆ្នាំ មានទីលំនៅ សង្កាត់បឹងកេងកង២ ខណ្ឌចំការមន មុខរបរបុគ្គលិកក្រុមហ៊ុនឡូតធឺរី។
សមត្ថកិច្ចបានឲ្យដឹងថា នៅមុនពេលកើតហេតុជនសង្ស័យឈ្មោះ អឹង គៀងសុង កំពុងធ្វើការនៅក្នុងក្រុមហ៊ុន ក៏បានសុំខ្ចីម៉ូតូរបស់ជនរងគ្រោះឈ្មោះ ឆាយ លាងស៊ីញ ទៅក្រៅមួយភ្លែតនៅវេលាម៉ោង១១ថ្ងៃទី២៣ ខែមីនា ឆ្នាំ២០១៩ ស្រាប់តែទៅបាត់រហូតមិនឃើញយកម៉ូតូមកឲ្យវិញហើយទាក់ទងតាមទូរស័ព្ទក៏ពុំបាន។ ជនរងគ្រោះក៏បានទៅដាក់ពាក្យប្តឹងទុកនៅទីស្នាក់ការប៉ូលិសប៉ុស្តិ៍គោកឃ្លាងឲ្យជួយអន្តរាគមន៍ស្វែងរកម៉ូតូរបស់គាត់ម៉ាកDukeពាក់ស្លាកលេខ1CK-0777 ដែលត្រូវបានគេឆបោកយកទៅបាត់នោះ។
ក្រោយរសៀលថ្ងៃទី២៨ ខែមីនា ឆ្នាំ២០១៩ ជនរងគ្រោះបានប្រទះឃើញជនសង្ស័យកំពុងដើរតាមផ្លូវនៅម្តុំសំណង់១២ ក៏ឃាត់យកមកប្រគល់ឲ្យប៉ូលិសតែម្តង។
ជនសង្ស័យឈ្មោះអឹង គៀងសុង បានសារភាពថា ម៉ូតូនោះត្រូវបានខ្លួនឲ្យបក្ខពួកយកទៅលក់ក្រោមរូបភាពដាក់បញ្ចាំនៅកុងស៊ីមួយកន្លែងនៅម្តុំឃ្លាំងរំសេវខណ្ឌទួលគោក បានចំនួន៧០០ដុល្លារចែកគ្នាចាយអស់ហើយ។
បច្ចុប្បន្នអំពើលួចប្លន់ឆបោកយកម៉ូតូប្រជាពលរដ្ឋភាគច្រើនយកទៅលក់ឲ្យហាងកុងស៊ីក្រោមរូបភាពដាក់បញ្ចាំរាប់រយករណី ហើយមិនមានអ្នកធ្វើអីម្ចាស់កុងស៊ីរកស៊ីទទួលផលចោរកម្មនោះបានឡើយដែលធ្វើអោយមហាជនអស់ជំនឿទៅលើសមត្ថកិច្ចនិងតុលាការ៕
Source: Kampuchea Thmey Daily
0 Comments