អង្គភាពប្រឆាំងអំពើពុករលួយ នឹងពិនិត្យវិភាគពាក្យប្តឹង លោក ពេជ្រ ស្រស់ នៅព្រឹកថ្ងៃអង្គារ ទី២ មេសា

អង្គភាពសារព័ត៌មាន Fresh News បានទាមទារឲ្យ លោក ផែង វណ្ណៈ ធ្វើការកែតម្រូវពាក្យសម្តីរបស់ខ្លួន ដែលអង្គភាពនេះ បានចាត់ទុកថា ជាការចោទប្រកាន់គ្មានមូលដ្ឋាន និងបរិហារកេរ្តិ៍

ភ្នំពេញ ៖ មន្ត្រីជាន់ខ្ពស់ ACU បានឲ្យដឹងថា នៅព្រឹកថ្ងៃអង្គារ ទី២ ខែមេសា ឆ្នាំ២០១៩ ខាងមុខ អង្គភាពប្រឆាំងអំពើពុករលួយ នឹងបើកកិច្ចពិភាក្សាលើបណ្ដឹង លោក ពេជ្រ ស្រស់ ដែលបានប្តឹងឈ្មោះ ផែង វណ្ណៈ ពីបទសង្ស័យប្រព្រឹត្តអំពើពុករលួយ ក្នុងករណីធ្វើជាតំណាងយកលុយចំនួន៥០០០ដុល្លារ ទៅចូលបុណ្យសពនិស្សិតស្រីម្នាក់ ក្នុងករណីគ្រោះថ្នាក់ចរាចរណ៍ ដើម្បីកំណត់ថា តើបណ្តឹងនោះអាចយកមកចាត់ការបាន ឬមិនបាន។

លោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ (ACU) មានប្រសាសន៍បែបនេះ នៅក្នុងបណ្ដាញអេឡិចត្រូនិកតេឡេក្រាម (Telegram) កាលពីរសៀលថ្ងៃទី២៨ ខែមីនា ឆ្នាំ២០១៩។

លោកបញ្ជាក់យ៉ាងនេះថា “ជូនដំណឹងបងៗក្នុងក្រុម, អបព [អង្គភាពប្រឆាំងអំពើពុករលួយ] ពិនិត្យវិភាគពាក្យប្តឹងនេះ នៅព្រឹកថ្ងៃអង្គារទី២មេសា។ ឯកឧត្ដម ពេជ ស្រស់ និង គ្នាគាត់២នាក់ទៀត ចូលរួមស្តាប់ការវិភាគរបស់ អបព និងការពារពាក្យប្តឹងរបស់ខ្លួន។ មិនគួរសង្គមហ្វេសប៊ុក រុញដុំថ្មក្តៅមកឲ្យ អបព កាន់សោះ”។

លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ផងនោះ បានដាក់បណ្ដឹង ឈ្មោះ ផែង វណ្ណៈ ដែលជាអ្នកលេងហ្វេសប៊ុក (Facebook) ដ៏សកម្មម្នាក់ ឲ្យអង្គភាពប្រឆាំងអំពើពុករលួយ (ACU) ធ្វើការស៊ើបអង្កេតក្រែងមានករណីពុករលួយទាក់ទងលុយ៥ពាន់ដុល្លារ ដែល លោក ផែង វណ្ណៈ បានយកទៅចូលបុណ្យ។

តាមបណ្តឹងរបស់ លោក ពេជ្រ ស្រស់ ចុះថ្ងៃទី២៨ ខែមីនា ឆ្នាំ២០១៩ ដោយអះអាងថា ជាទីប្រឹក្សារាជរដ្ឋាភិបាលផងនោះ និងបានដាក់ជូនលោកទេសរដ្ឋមន្ត្រី ឱម យ៉ិនទៀង បានរៀបរាប់ថា បើតាមពិនិត្យផ្លូវច្បាប់បុគ្គល ផែង វណ្ណៈ មិនមែនជាមេធាវី ឬជាអ្នកបម្រើសេវាផ្លូវច្បាប់ ដែលអាចធ្វើជាតំណាងឲ្យជនណាម្នាក់នោះទេ ប៉ុន្តែមានរឿងគួរឲ្យភ្ញាក់ផ្អើលមួយកើតឡើង គឺ ឃើញ លោក ផែង វណ្ណៈ ប្រកាសខ្លួនថា ជាអ្នកតំណាងឲ្យក្រុមជនបង្កគ្រោះថ្នាក់ចរាចរណ៍លើសពនិស្សិត ឌុំ រីដា ស្របពេលសមត្ថកិច្ចមិនទាន់ចាប់បានជនបង្ក យកមកផ្ដន្ទាទោសតាមផ្លូវច្បាប់នៅឡើយ ហើយអ្វីដែលគួរឲ្យសង្ស័យបំផុតនោះ គឺថាមានកើតក្តីព្រួយបារម្ភខ្លាចមានការឃុបឃិតប្រព្រឹត្តនូវអំពើពុករលួយជាប្រព័ន្ធ ដើម្បីសម្របសម្រួលបន្ធូរបន្ថយបទការចោទប្រកាន់ណាមួយ តាមរយៈការយកលុយទៅលួងលោម ឬបញ្ចុះបញ្ចូលក្រុមគ្រួសារជនរងគ្រោះតាមរយៈបុគ្គល ផែង វណ្ណៈ ដែលអាចធ្វើឲ្យប៉ះពាល់ដល់នីតិវិធីច្បាប់ ម្យ៉ាងវិញទៀត ជាហេតុធ្វើឲ្យរីកដុះដាល នៃអំពើពុករលួយជាប្រព័ន្ធនៅក្នុងប្រទេសកម្ពុជា កាន់តែច្រើនឡើងៗ ធ្វើឲ្យពលរដ្ឋរងគ្រោះ ក្រីក្រគ្មានយុត្តិធម៌។

លោក ពេជ្រ ស្រស់ លើកឡើងទៀតថា ដើម្បីទប់ស្កាត់នូវអំពើពុករលួយជាប្រព័ន្ធ និងលុបបំបាត់អំពើពុករលួយលើករណីគ្រោះថ្នាក់ចរាចរណ៍លើសព កញ្ញា ឌុំ រីដា គឺមានតែការកោះហៅបុគ្គល ផែង វណ្ណៈ ទៅស៊ើបអង្កេត ស្វែងរកការពិតជុំវិញការធ្វើតំណាងឲ្យជនបង្កឲ្យគ្រោះថ្នាក់ចរាចរណ៍ដ៏សាហាវឃោរឃៅលើនិស្សិត កញ្ញា ឌុំ រីដា ដោយខុសច្បាប់។ ម្យ៉ាងវិញទៀត ដើម្បីបញ្ចប់វប្បធម៌អន្តរាគមន៍ខុសច្បាប់ ឬចេញមុខទទួលខុសត្រូវដោយខុសច្បាប់ ជាពិសេស គឺលុបបំបាត់វប្បធម៌បុកស្លាប់យកលុយទៅលួងចិត្តក្រុមគ្រួសារជនរងគ្រោះ ដើម្បីសម្របសម្រួលណាមួយ ក្នុងគោលបំណងបន្ធូរបន្ថយការចោទប្រកាន់។

ទាក់ទងបញ្ហានេះ លោក ផែង វណ្ណៈ បានថ្លែងប្រាប់កម្ពុជាថ្មីតាមទូរស័ព្ទ កាលពីរសៀលថ្ងៃទី២៨មីនា ថា លោកមិនចាប់អារម្មណ៍រឿងបណ្ដឹងអីហ្នឹងទេ ពីព្រោះលោកមិនបានធ្វើអ្វីខុសច្បាប់ គ្រាន់តែកាន់លុយទៅចូលបុណ្យ ហើយបើគ្រាន់តែកាន់លុយទៅចូលបុណ្យ ក៏ប្ដឹងដែរ វាចប់ហើយ។ លោកបញ្ជាក់ដែរថា លោកមិនបានចេញទៅក្រៅប្រទេសទេ។

គួររំលឹកថា កាលពីរសៀលថ្ងៃទី២៦ ខែមីនា ឆ្នាំ២០១៩ មានរថយន្តមួយគ្រឿង ម៉ាក Rang Rover ពាក់ស្លាកលេខភ្នំពេញ 2AF-7777 បានបើកបោះពួយយ៉ាងលឿន ទៅនិស្សិតម្នាក់នៅតាមបណ្ដោយផ្លូវលេខ៣១៧ កែងនឹងផ្លូវលេខ៥២៨ ក្នុងសង្កាត់បឹងកក់ទី១ ខណ្ឌទួលគោក ខណៈជនរងគ្រោះកំពុងជិះម៉ូតូ បណ្តាលឲ្យមនុស្ស និងម៉ូតូប៉ើងទៅចិញ្ចើមផ្លូវស្លាប់ភ្លាមៗនៅកន្លែងកើតហេតុ។

នារីរងគ្រោះ ឈ្មោះ ឌុំ រីដា អាយុ២២ឆ្នាំ ស្រុកកំណើតភូមិកំពង់ដំរី ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ជាសិស្សពូកែទូទាំងប្រទេស ខាងអក្សរសាស្ត្រខ្មែរ ហើយខិតខំប្រឹងប្រែងរៀនសូត្រ រហូតទទួលបានអាហារូបករណ៍នៅសាលាផារ៉ាហ្គន។ ចំណែកជនបង្ក ត្រូវបានសមត្ថកិច្ចបង្ហាញអត្តសញ្ញាណហើយ ដោយនាង មានឈ្មោះ យិន ម៉ាណា ជាកូនស្រីរបស់ លោក យិន ង្គិច និងបានលាក់ខ្លួនរយៈពេល២ថ្ងៃមកហើយ មិនទាន់ចេញមុខ ដោយឲ្យឪពុកចេញដោះស្រាយជំនួស។

លោក ផែង វណ្ណៈ កាលពីថ្ងៃទី២៧ ខែមីនា ឆ្នាំ២០១៩ ដោយសំអាងថា ជាតំណាងក្រុមគ្រួសាររថយន្តបង្ក បានយកលុយចំនួន៥០០០ដុល្លារអាមេរិក យកទៅចូលបុណ្យសព កញ្ញា ឌុំ រីដា នៅគេហដ្ឋានរបស់សព ក្នុងភូមិកំពង់ដំរី ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។ បញ្ហានេះ បានបណ្តាលឲ្យសាធារណជនខ្លះបានរិះគន់ ប៉ុន្តែ លោក ផែង វណ្ណៈ បានចេញវីដេអូឃ្លីបមួយបកស្រាយថា លុយ៥ពាន់ដុល្លារនោះ គឺជាលុយចូលបុណ្យរបស់គ្រួសារជនបង្កប៉ុណ្ណោះ តែមិនមែនជាការសូកប៉ាន់ទេ ហើយជនបង្កត្រូវតែមានវិធានការតាមច្បាប់ មិនអាចរួចខ្លួនទេ។

ដោយឡែកទាក់ទងសំណុំរឿងនេះដែរ អង្គភាពសារព័ត៌មាន Fresh News បានទាមទារឲ្យ លោក ផែង វណ្ណៈ ធ្វើការកែតម្រូវជាបន្ទាន់ ចំពោះការលើកឡើងថា អង្គភាព Fresh News ផ្សព្វផ្សាយតែព័ត៌មានដែលមានលុយ ដោយអង្គភាពមួយនេះ ចាត់ទុកការលើកឡើងរបស់លោក ផែង វណ្ណៈ ថា ជាការចោទប្រកាន់គ្មានមូលដ្ឋាន និងបរិហារកេរ្តិ៍។

តាមអង្គភាពសារព័ត៌មាន Fresh News លោក ផែង វណ្ណៈ បាននិយាយតាមរយៈការ Live វីដេអូ កាលពីយប់ថ្ងៃទី២៨ ខែមីនា ឆ្នាំ២០១៩ថា “អា Fresh News គេបន្ទរទៀត អូ គេអាលើតៗៗ (Alert) តែប្រជាជនមានទឹកភ្នែកទឹកសំបោរ មិនដែលឃើញ Fresh News ផ្សាយទេ Fresh News គេផ្សាយតែរឿងណាមានលុយទេ មានលុយគេផ្សាយ កន្លែងណាមានផលប្រយោជន៍គេផ្សាយ រឿងប្រជាជនទឹកភ្នែកទឹកសំបោរ រហេម រហាមអី ទៅរក Fresh News គឺ Fresh News អត់ជួយទេ...”។

ជាមួយគ្នានោះ អង្គភាពព័ត៌មាន Fresh News បានទុកពេលឲ្យ លោក ផែង វណ្ណៈ ធ្វើការកែតម្រូវ និងសុំទោសជាសាធារណៈ ក្នុងរយៈពេល២៤ម៉ោង៕