ប្រធានាធិបតីអាមេរិកលោក Donald Trump កាលពីថ្ងៃព្រហស្បតិ៍បានគំរាមជាថ្មីម្តងទៀតថានឹងបិទព្រំដែនអាមេរិក-ម៉ិកស៊ិក។ លោកបានអះអាងនៅក្នុងការបង្ហោះ Twitter មួយថា អ្នកជិតខាងភាគខាងត្បូងរបស់សហរដ្ឋអាមេរិកកំពុងអនុញ្ញាតឱ្យជនអន្តោប្រវេសន៍ខុសច្បាប់ឆ្លងកាត់ដោយគ្មានរារាំង។
លោកប្រធានាធិបតីបានសរសេរថា "ខ្ញុំអាចបិទព្រំដែនខាងត្បូង!"។ លោកនិយាយថា "ប្រទេសម៉ិកស៊ិកមិនបានធ្វើអ្វីសោះដើម្បីជួយបញ្ឈប់លំហូរនៃជនអន្តោប្រវេសន៍ខុសច្បាប់មកកាន់ប្រទេសរបស់យើង។ ពួកគេទាំងអស់និយាយគ្នាហើយគ្មានសកម្មភាពអ្វីទេ"។
លោកបន្តថា “ដូចគ្នានេះដែរ ប្រទេសហុងឌូរ៉ាស ហ្គាតេម៉ាឡានិងអែលសាល់វ៉ាឌ័របានយកប្រាក់របស់យើងអស់ជាច្រើនឆ្នាំមកហើយ។ គណបក្សប្រជាធិបតេយ្យមិនខ្វល់ឡើយ”។
ការគំរាមកំហែងថ្មីដើម្បីបិទព្រំដែនដ៏មមាញឹកបំផុតមួយនៅលើពិភពលោកមួយនេះបានបង្ហាញថា លោក Trump កំពុងបង្កើនការប៉ុនប៉ងរបស់លោកដើម្បីយកបញ្ហាអន្តោប្រវេសន៍ធ្វើជាគន្លឹះនៃយុទ្ធនាការឃោសនាបោះឆ្នោតឡើងវិញឆ្នាំ២០២០។
ស្របពេលជាមួយគ្នានោះ ប្រធានាធិបតីម៉ិកស៊ិកលោក Andres Manuel Lopez Obrador បានច្រានចោលការរិះគន់របស់លោក Trump ដោយប្រាប់អ្នកកាសែតថា "យើងកំពុងធ្វើអ្វីមួយលើបញ្ហានេះ" ។
លោកបាននិយាយថា "យើងនឹងជួយគ្រប់វិធីដែលយើងអាចធ្វើបាន។ យើងមិនមានបំណងចង់ប្រឈមមុខជាមួយសហរដ្ឋអាមេរិកទេ" ។ស្នងការការពារព្រំដែនអាមេរិកលោក Kevin McAleenan បាននិយាយកាលពីថ្ងៃពុធថា ព្រំដែនភាគនិរតីកំពុងប្រឈមនឹងវិបត្តិមនុស្សធម៌និងសន្តិសុខព្រំដែនដែលមិនធ្លាប់មានពីមុនមក។
លោកនិយាយថា កន្លែងអាក្រក់បំផុតគឺនៅជុំវិញទីតំបន់ El Paso នៃរដ្ឋតិចសាស់។
ទីភ្នាក់ងារនេះបាននិយាយថា នៅទូទាំងប្រទេស ទីភ្នាក់ងាព្រំដែនបាន ទទួលជនអន្តោប្រវេសន៍ជាង១២,០០០នាក់នៅ ក្នុងសប្ដាហ៍នេះ៕AFP
Source: Kampuchea Thmey Daily
0 Comments