ភ្នំពេញ ៖ មហាជនពិតជាបានស្គាល់ច្បាស់ហើយនូវកេរ្តិ៍ឈ្មោះដ៏ល្បីល្បាញ និងជាពិធីការិនីសម្បូរវោហារសព្ទ គឺ អ្នកនាង គង់ សុជាតិ ដែលជាអ្នកមានទ្រព្យស្តុកមួយរូប ខណៈអ្នកនាង ក៏ជាថៅកែហាងសាឡន គង់ សុជាតិ នៅម្តុំទួលគោកក្នុងតម្លៃរាប់សិបម៉ឺនដុល្លារផងដែរ។ លើសពីនេះអ្នកនាង គង់ សុជាតិ ក៏បានបន្ថែមជំនាញមួយទៀតជាអ្នកជំនាញផ្នែកប៉ាក់-ផ្លុំចិញ្ចើម ដែលពិធីការិនី រូបនេះបានទៅរៀនជំនាញមួយនេះដល់ប្រទេសអូទ្រីស ជាមួយនឹងគ្រូមាន ជំនាញ ច្បាស់លាស់កម្រិតលំដាប់ពិភពលោក។
តារាស្រីដែលនូវតែរក្សាបានប្រជាប្រិយភាព និងរូបសម្ផស្សស្រស់ស្អាត អ្នកនាង គង់ សុជាតិ បានប្រាប់ឲ្យដឹងថា ដោយសារតែអ្នកនាងបានទទួលជំនាញបែបនេះទើបមានបំណងចង់ឲ្យកូនខ្មែរដែលមានបំណងចង់មានជំនាញផ្នែកមួយនេះច្បាស់លាស់និង ដោយសារតែមានការរាប់អានពីអ្នកគ្រូជំនាញមកពីប្រទេសអូទ្រីសទើបអ្នកគ្រូលំដាប់អន្តរជាតិរូបនេះដាក់ចិត្តមកបង្រៀនជំនាញប៉ាក់-ផ្លុំចិញ្ចើម នៅប្រទេសកម្ពុជា នាពេលកន្លងមកដល់សិស្សកម្ពុជាដែលបង្រៀនដោយអ្នកគ្រូបង្រៀនប៉ាក់ ចិញ្ចើមដ៏ល្បីឈ្មោះលើពិភពលោកគឺអ្នកគ្រូ Vesna Jugovic និងសហការ រៀបចំ ដោយសាលាបណ្តុះបណ្តាលវិជ្ជាជីវៈថែសម្ផស្សសុជាតិ។
តារាស្រី អ្នកនាង គង់ សុជាតិ បានបន្តទៀតថា ការបណ្តុះបណ្តាលបានធ្វើនៅសណ្ឋាគារសាន់វេ រាជធានីភ្នំពេញ កាលពីថ្ងៃទី២៣ និង២៤ ខែមីនា ឆ្នាំ២០១៩។ នេះជាលើកទីមួយសម្រាប់ស្រុកខ្មែរដែលសាលាPhiAcademy ជាស្ថាប័នធំមួយលើពិភពលោកចុះមកសហការ ជាមួយនឹងសាលាបណ្តុះ បណ្តាលវិជ្ជាជីវៈថែសម្ផស្សសុជាតិ គឺដើម្បីឲ្យកូនខ្មែរមួយចំនួនបានយល់ដឹង និង បានចុះឈ្មោះចូលរៀននៅវគ្គពិសេសបែបនេះបន្តទៀត។
អ្នកនាង សង្ឃឹមថា លើកក្រោយ នឹងមានកូនខ្មែរជាច្រើនរូប ចូលរួមបានយល់ច្រើន ដោយសារលើកនេះមានអ្នកសួរច្រើនអំពីការចូលរៀន ដូច្នេះហើយ ទើបអ្នកនាងថា វគ្គសិក្សានេះ នឹងមាន ការរៀបចំសម្រាប់លើកក្រោយៗទៀត។
អ្នក គង់ សុជាតិ បញ្ជាក់ថា ការរៀននេះ គឺកម្រិតចេញមកមានស្តង់ដារទាំងការរៀបចំ បូករួមទាំងទ្រឹស្ដី និង បច្ចេកទេសបង្រៀន ជាពិសេសគឺមានការអនុវត្តផ្ទាល់តែម្ដងចំពោះសិស្សតែម្តង។ និយាយរួមគឺគ្រប់សព្វបែបយ៉ាង គឺស្តង់ដារអន្តរជាតិពិតប្រាកដដូចដែលបានបង្ហាញតាមរយៈ រូបភាព និងអ្នកចូលរួមផ្ទាល់។
តារាស្រីសម្តីផ្អែមទទួលបានការគាំទ្រពីទស្សនិកជនច្រើន អ្នកនាង គង់ សុជាតិ បានលើកឡើងទៀតថា ចំពោះអ្នកដែលមិនបានចូលរួមរៀនវគ្គផ្លុំចិញ្ចើម និង ប៉ាក់ចិញ្ចើម វគ្គនេះ កុំទាន់អស់សង្ឃឹម អ្នកនាង និងអ្នកគ្រូ និងមានវគ្គក្រោយៗទៀត។ ចំណែកវគ្គក្រោយ នឹងមានការផ្សព្វផ្សាយមុនឲ្យបានច្រើនខែ ដើម្បីឲ្យកូនខ្មែរបានដឹងបន្ថែម និងមានការត្រៀមទុកមុនសម្រាប់អ្នកដែលចង់បានជំនាញ មួយ ដែល មានកម្រិតស្តង់ដារអន្តរជាតិ។
ចំពោះសិស្សដែលបានចូលរួមវគ្គបណ្ដុះបណ្ដាលនេះ នឹងទទួលបានការប្រឹក្សាពីអ្នកគ្រូ ជាពិសេសគឺអ្នកនាង នឹងផ្តល់ចំណេះដឹងផ្តល់ការប្រឹក្សាបានរហូត អីចឹងសម្រាប់អ្នកស្រុកខ្មែរ ដែលបានចូលរួមរៀនហើយ អាចសួរ និងប្រឹក្សាជាមួយអ្នកនាងបាន ព្រោះតែអ្នកនា ក៏ជាសមាជិក របស់ PhiBrows Academy ដោយសារតែអ្នកនាង ទទួលបានបទពិសោធន៍ជាច្រើនរយៈពេលកន្លងមកហើយ ជាពិសេស អ្នកនាង គឺជាមនុស្សដំបូងគេដែលបានទទួលសញ្ញាប័ត្រពី PhiBrows Academy ដែលជាសាលាបណ្ដុះបណ្ដាល ជំនាញប៉ាក់ និងផ្លុំចិញ្ចើម ក្នុងពេលតែមួយមកពីប្រទេសអូទ្រីស។ នេះជាសម្តីបន្ថែមរបស់របស់ អ្នកនាង គង់ សុជាតិ៕
Source: Kampuchea Thmey Daily
0 Comments