ករណីជនជាតិជប៉ុន២នាក់ប្លន់សម្លាប់យកឡាននៅសៀមរាប គឺដោយសារជំពាក់លុយធនាគារច្រើនពេក

សៀមរាប ៖ សមត្ថកិច្ចបានបញ្ជាក់ថា ករណីប្លន់សម្លាប់អ្នករត់ស៊ីនៅស្រុកពួកនោះ គឺមានតែជនជាតិជប៉ុនចំនួន២នាក់ទេ ដែលធ្វើសកម្មភាពប្លន់សម្លាប់យករថយន្តនោះ គឺ ដោយសារតែ ពួកគេជំពាក់លុយធនាគារច្រើនពេក។ ចំណែកការផ្សាយថា ជនសង្ស័យមានគ្នា៣នាក់ និងជនជាតិចិននោះ គឺជារឿងមិនពិត វាជាប្រភពមិនច្បាស់លាស់។

លោកឧត្ដមសេនីយ៍ត្រី ភឹង ចន្តារ៉េត ស្នងការរងទទួលផែនកណ្ដាលព្រហ្មទណ្ឌ នៃស្នងការដ្ឋានខេត្តសៀមរាប បានឲ្យដឹងថា ជនសង្ស័យទាំង២នាក់ បានឆ្លើយសារភាពប្រាប់កម្លាំងនគរបាលជំនាញថា៖ សូមមហាជន ទូទៅ កុំយល់ច្រឡំតទៅទៀត ចំពោះការផ្សាយថា ជនសង្ស័យមានគ្នា៣នាក់ និងជនជាតិចិននោះ គឺជារឿងមិនពិត វាជាប្រភពមិនច្បាស់លាស់ អាចធ្វើឲ្យមានការយល់ច្រឡំ។

លោកបន្តថា នៅថ្ងៃទី១៦ ខែមីនា ឆ្នាំ២០១៩ ជនសង្ស័យ ទាំង០២នាក់ ទី០១-ឈ្មោះ ISHIDA REIMON ភេទប្រុស អាយុ២៤ឆ្នាំ ,ទី០២-ឈ្មោះ NAKA RYUJI ភេទប្រុស អាយុ២៤ឆ្នាំ បានចូលមកប្រទេសកម្ពុជា តាមច្រកអន្តរជាតិប៉ោយប៉ែត នៅវេលាម៉ោងប្រហែល១២ថ្ងៃត្រង់ ខែឆ្នាំដដែល ពួកគេបានជិះតាក់ស៊ីទៅខេត្តសៀមរាប ពួកគេបានសម្រាកនៅសណ្ឋាគារមួយកន្លែង ក្នុងក្រុងសៀមរាប មិនចាំឈ្មោះ ក្នុងគោលបំណងរកលួចរថយន្ត ឬប្លន់ ប៉ុន្តែលំបាកធ្វើសកម្មភាព ព្រោះកាមេរ៉ាច្រើន។

លុះព្រឹកឡើង ថ្ងៃទី១៧ ខែមីនា ឆ្នាំ២០១៩ វេលាម៉ោង១២ថ្ងៃត្រង់ ពួកគេបានរកតាក់ស៊ី ជិះទៅ ស្វាយស៊ីសាផុន ខេត្តបន្ទាយមានជ័យ ក្នុងគោលបំណងស្វែងរកឡានតាក់ស៊ីថ្មី ដើម្បីប្លន់យកមកប្រើប្រាស់ជាមធ្យោបាយសម្រាប់ធ្វើសកម្មភាពបន្តទៀត ពេលទៅដល់ស្វាយស៊ីសាផុន ពួកគេបានរកតាក់ស៊ីថ្មីបានជារថយន្តជនរងគ្រោះ ម៉ាក ហាយឡែនឌ័រ ពណ៌ស្ករ ស្លាកលេខ ២AB ៥២១៨ ដោយពួកគេប្រាប់ជនរងគ្រោះថា ចង់ទៅសៀមរាប ហើយត្រូវគ្នាក្នុងតម្លៃ៣០ដុល្លារ ពួកគេក៏ឡើងតាក់ស៊ីដោយជិះតែ០៣នាក់គត់ តៃកុងតាក់ស៊ី និងពួកគេ០២នាក់ ជិះនៅកៅអីខាងក្រោយតៃកុង ពេលមកដល់កន្លែងកើតហេតុ ពួកគេបានឲ្យតៃកុងឈប់នោម។ បន្ទាប់មកពួកគេ ក៏នាំគ្នាធ្វើសកម្មភាពចាក់សម្លាប់យករថយន្តបាន០២នាទី រូបគេ ក៏បើកទ្វារតាក់ស៊ីឃើញ បក្សពួកខ្លួនកំពុងយកកាំបិតអារ.ក និងចាក់ជាច្រើនកាំបិតលើជនរងគ្រោះ ដោយជនរងគ្រោះកំពុងរើបម្រាស់ ភ្លាមៗនោះ ជនរងគ្រោះ ក៏ធ្លាក់ចេញពីលើរថយន្តដោយខ្លួនឯង រួចរូបគេបានឡើងរថយន្តបើកចេញពីកន្លែងកើតហេតុ បានប្រហែល ៣០ម៉ែត្រ រថយន្តក៏ជ្រុលទៅបុកគោយន្តកន្ត្រៃ ហើយពួកគេក៏បើកទ្វារចុះរត់ តែត្រូវសមត្ថកិច្ចចាប់ឃាត់បានតែម្តង។

លោកបន្តថា ជនសង្ស័យ បានសារភាព ទៀតថា មូលហេតុដែលពួកគាត់ដាច់ចិត្តមកប្លន់នៅស្រុកខ្មែរ មកពីគាត់ជំពាក់ធនាគារច្រើនពេក គ្មានលុយសង។ ចំណែកវត្ថុតាង កាំបិតប្រវែងកន្លះម៉ែត្រ ០១ដើម និងដំបងរលាស់០១ដើម ពួកគេយកតាមខ្លួនពីប្រទេសជប៉ុន។ ចំណែកកាំបិត ដែលធ្វើសកម្មភាព គឺកាំបិតកោង។

ជនសង្ស័យ បានសំណូមពរមិនឲ្យខាងស្ថានទូតរកមេធាវី ជួយពួកគេទេ ដោយគ្រាន់តែសុំឲ្យផ្តល់ដំណឹងដល់គ្រួសាររបស់ពួកគេបានដឹងផង។

លោកបញ្ជាក់ទៀតថា ក្រោយសួរចម្លើយចប់ កម្លាំងបានតេស្តសារធាតុញៀនឃើញថា ជនសង្ស័យទាំង០២នាក់ ពុំមានសារធាតុញៀនក្នុងខ្លួនទេ។ បច្ចុប្បន្ន កម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋានខេត្តសៀមរាប បានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី៕