សង្ស័យ​ចោរ​មាន​រនុក​ក្នុង បើកឡាន​មក​លួច​ដឹក​ម៉ូតូ​អស់​៦​គ្រឿង ក្នុង​១​យប់ ​នៅ​ ​កន្លែង​ផ្ញើ

ភ្នំពេញ ៖ ក្រុម​ម្ចាស់​ម៉ូតូ​ទាំង​៦​នាក់ ​ក៏​ដូច​ជា​ពលរដ្ឋ​រស់នៅ​ក្បែរ​ខាង​ បាននាំគ្នា​ភ្ញាក់ផ្អើល​ឆោឡោ​ទាំង​ព្រឹក បន្ទាប់ពី​ជនសង្ស័យ​មួយក្រុម ​ថ្លើមធំ​ពាសមេឃ បាន​ធ្វើ​សកម្មភាព​ឆ្កឹះ​សោ​ទ្វារ​របង​ និង​កាត់​ច្រវាក់​ទ្វារ​១​ជាន់​ទៀត ចូល​លួច​ម៉ូតូ​មួយ​យប់​អស់​ចំនួន​៦​គ្រឿង ទៅ​បាត់​ដោយ​សុវត្ថិភាព ទម្រាំ​ដឹង​ថា​បាត់ ទើប​នាំគ្នា​ផ្អើល​នៅវេលា​ម៉ោង​៥​និង​២០​នាទី​ព្រឹក​ ថ្ងៃ​ថ្ងៃទី​១៨ ខែ​មីនា ឆ្នាំ​២០១៩ នៅ​កន្លែង​ទទួល​ផ្ញើ ចំណុច​ផ្ទះជួល ភូមិ​ត្រពាំង​ពោធិ សង្កាត់​ចោមចៅ​៣ ខណ្ឌ​ពោធិ៍សែន​ជ័យ។​

ទីតាំង​ផ្ទះជួល និង​ទទួល​ផ្ញើ​ម៉ូតូ ចំណុច​កើតហេតុ មាន​ស្ត្រី​ ឈ្មោះ កៅ ស្រី​ម៉ៅ អាយុ​៣៥​ឆ្នាំ ជា​អ្នក​មើល​ការ​ខុសត្រូវ​ផ្ទះជួល និង​ទទួល​កន្លែង​ផ្ញើ​ម៉ូតូ ស្នាក់នៅ​ទីតាំង​កើតហេតុ មាន​ស្រុកកំណើត ភូមិ​ក្បាលស្ពាន​១ សង្កាត់​ក្បាលស្ពាន ក្រុង​ប៉ោយប៉ែត ខេត្ត​បន្ទាយមានជ័យ។​

តាម​ប្រភពពី​ស្ត្រី​ ឈ្មោះ កៅ ស្រី​ម៉ៅ ម្ចាស់​មើល​ការខុសត្រូវ​ទីតាំង​កើតហេតុ បាន​ឲ្យ​ដឹង​ថា ក្រោយ​ពី​ម៉ូតូ អ្នក​យកមក​ផ្ញើ ទុកដាក់​ហើយ នៅ​យប់​ថ្ងៃទី​១៧ ខែ​មីនា ឆ្នាំ​២០១៩ គាត់​ និង​ក្រុមគ្រួសារ ចូល​ដេក​សម្រាក​ជាប់​ក​ន្លែ​ង​ទុកដាក់​ម៉ូតូ ដូច​សព្វដង ស្រាប់តែ​ដល់​វេលា​ម៉ោង​៥​និង​២០​នាទី ម្ចាស់​ម៉ូតូ មក​យក​ម៉ូតូ ស្រាប់តែ​ទ្វារ​របង ខាងក្រៅ របើក​បាត់​ទៅ​ហើយ មើល​ទៅ​របង មួយ​ជាន់​ទៀត ត្រូវ​បាន​កាត់​ច្រវាក់ ម្ចាស់​ម៉ូតូ​បាន​ភ្ញាក់​ផ្អើលឆោឡោ នាំគ្នា​មក​មើល​ទើប​ដឹងថា​បាត់ សរុប​ម៉ូតូ​៦​គ្រឿង ​ដោយ ត្រូវ​បាន​ជនសង្ស័យ​លួច​យកទៅ​បាត់។

ក្រោយពី​ដឹងថា ម៉ូតូ​៦​គ្រឿង​ចោរលួច​បាត់ ពី​ទីតាំង​តែមួយ ក្នុង​មួយ​យប់ ឆោឡោ​រាយការណ៍​ទៅ​សមត្ថកិច្ច អាជ្ញាធរ​មូលដ្ឋាន ចុះទៅពិនិត្យ​ជាក់ស្តែង ដើម្បី​ឲ្យ​សមត្ថកិច្ច​ជួយ​ស្រាវជ្រាវ។

ករណី​ខាង​លើ សមត្ថកិច្ច​កំពុងធ្វើការ​សាកសួរ និង​ពិនិត្យ​ទីតាំង​កើតហេតុ ទទួល​បណ្ដឹង​ពី​ម្ចាស់​ម៉ូតូ​និមួយៗ​ក្រែង​អាច​ស្រាវជ្រាវ​រកឃើញ។

ម៉ូតូ​ទាំង​៦​គ្រឿង​ដែល​ចោរលួច​យកទៅ​បាត់ ម៉ាក​ហុងដា សេ​១២៥​ទាំងអស់ ១. ហុងដា សេរ​១២៥ ស៊េរី​២០១៧ ពណ៌​ខ្មៅ ពាក់​ស្លាក​លេខ ភ្នំពេញ 1GJ-8413 ម្ចាស់​កម្មសិទ្ធិ​ឈ្មោះ សុះ សាលី។ ទី​១- ម៉ាក ហុងដា សេ​១២៥ ស៊េរី​២០១៨ ពណ៌​ខ្មៅ ពាក់​ស្លាក​លេខ កំពង់ធំ 1J-1494 ម្ចាស់​កម្មសិទ្ធិ ឈ្មោះ អ៊ឹម ឡំ ។ ទី​៣-ម៉ាក​ហុងដា សេ​១២៥ ស៊េរី​២០១៨ ពណ៌​ខ្មៅ ពាក់​ស្លាក​លេខ កំពង់ធំ 1J-5151 ម្ចាស់​កម្មសិទ្ធិ ឈ្មោះ ហ៊ួ​យ ណាក់​ណា។ ទី​៤-ម៉ាក ហុងដា សេ​១២៥ ស៊េរី​២០១៥ ពណ៌​ខ្មៅ ពាក់​ស្លាក​លេខ ភ្នំពេញ 1FG-9352 ម្ចាស់​កម្មសិទ្ធិ ឈ្មោះ យ៉ាន ធូ ។ ទី​៥ ម៉ាក ហុងដា សេ​១២៥ ស៊េរី​២០១៥ ពណ៌​ខ្មៅ ពាក់​ស្លាក​លេខ កំពង់ឆ្នាំង 1E-7279 ម្ចាស់​កម្មសិទ្ធិ ឈ្មោះ សាត សុ​ផៃ។ ទី​៦-ម៉ាក ហុងដា សេ​១២៥ ស៊េរី ២០១៧ ពណ៌​ខ្មៅ ពាក់​ស្លាក​លេខ កំពង់ឆ្នាំង 1D-4937 ម្ចាស់​កម្មសិទ្ធិ ឈ្មោះ ឆាយ ជ័យ៕

​

Source: Kampuchea Thmey Daily