ភ្នំពេញ ៖ ក្រុមហ៊ុន អ៊ិនវីស៊ី ផលិតទឹកពិសាវីតាល់ សហការជាមួយក្រុមហ៊ុនម៉ាស៊ីនលក់ទឹកស្វ័យប្រវត្តិ និងមន្ទីរពេទ្យកុមារអង្គរខេត្តសៀមរាប កាលពីព្រឹកថ្ងៃទី១៣ ខែមីនា ឆ្នាំ២០១៩ បានប្រារព្ធពិធីសម្ពោធកម្មវិធីសប្បុរសធម៌ថ្មី ដែលមានឈ្មោះថា «អ្នកជាវីរបុរសជាមួយវីតាល់»នៅផ្សារទំនើប Eden Gardenដើម្បីយកថវិកាទៅជួយដល់មន្ទីរពេទ្យអង្គរ។
នេះជាលើកទីមួយហើយ នៅប្រទេសកម្ពុជាដែលបានបង្កើតកម្មវិធីសប្បុរសធម៌បែបទំនើប ដែលអនុញ្ញាតឲ្យសាធារណជន អាចក្លាយជាវីរបុរសក្នុងនាមអ្នកជួយកុមារឈឺ និងក្រីក្រកម្ពុជា ដោយគ្រាន់តែជាវទឹកវីតាល់ តាមបណ្តាទូម៉ាស៊ីនស្វ័យប្រវត្តិនៅតាមផ្សារទំនើបក្នុងរាជធានីភ្នំពេញ។ កម្មវិធីនេះ នឹងបរិច្ចាគ១០០% នៃការលក់ទឹកវីតាល់ពីទូស្វ័យប្រវត្តិជូនដល់មន្ទីរពេទ្យកុមារអង្គរ។
លោកស្រី ជឹង សុគន្ធាវី អគ្គនាយិកាក្រុមហ៊ុន អិនវីស៊ី ខបភើរេសិនវីតាល់ មានប្រសាសន៍ថា កម្មវិធីនេះ រៀបចំឡើង ក្នុងគោលបំណងធំៗចំនួន៣គឺទី១. ដើម្បីពង្រឹងវប្បធម៌ចែករំលែក ទី២.គឺដើម្បីផ្សារភ្ជាប់កម្មវិធីសប្បុរសធម៌ជាមួយនឹងម៉ាស៊ីនបែបទំនើប និងទី៣.ចូលរួមចំណែកក្នុងការជួយព្យាបាលកុមារក្រីក្រកម្ពុជាជាមួយមន្ទីរពេទ្យកុមារអង្គរ។
លោកស្រីបានបន្តថា ផ្អែកលើការគាំទ្រខ្លាំងពីអតិថិជននេះបាន ធ្វើឲ្យមូលនិធិ២៥៛របស់វីតាល់មានកញ្ចប់កាន់តែធំ និងធ្វើឲ្យក្រុមការងារវីតាល់មានកម្លាំងចិត្តយ៉ាងមុតមាំក្នុងការពាំនាំមកនូវកម្មវិធីសប្បុរសធម៌ល្អៗយ៉ាងសកម្មជាច្រើនរូបភាពទៀត ក្នុងសង្គមដើម្បីចូលរួមក្នុងការអភិវឌ្ឍប្រទេសកម្ពុជាជាមួយរដ្ឋាភិបាល។
លោក ឈុំ ឆេងហេង ប្រធានផ្នែករៃអង្គាស មូលនិធិសម្រាប់មន្ទីរពេទ្យកុមារអង្គរ បានសម្តែងក្តីសប្បាយរីករាយដោយមោទភាពចំពោះការសហការជាមួយវីតាល់ សម្រាប់គម្រោងកម្មវិធី «ក្លាយជាវីរបុរស» ព្រោះកម្មវិធីនេះប្លែកដែលមិនធ្លាប់មានទេនៅកម្ពុជាហើយលោករំពឹងថា ប្រជាពលរដ្ឋកម្ពុជាទូទៅ ជាពិសេសយុវជនកម្ពុជា នឹងគាំទ្រជាវទឹកពី ម៉ាស៊ីន ស្វ័យប្រវត្តិឲ្យបានច្រើនដើម្បីបង្កើនចំណូលដល់មូលនិធិ។
លោកស្រី ជឹង សុគន្ធាវីរំពឹងថា រយៈពេលពីរខែនេះ នឹងទទួលបានមូលនិធិប្រមាណជាង ៤ពាន់ដុល្លារអាមេរិកដើម្បីគាំទ្រដល់មន្ទីរពេទ្យកុមារអង្គរហើយពលរដ្ឋគ្រប់រូបក៏អាចចូលរួមបានដោយគ្រាន់តែជាវទឹកវីតាល់តាម ទូស្វ័យប្រវត្តិដែលនៅជិតលោកអ្នក។
គួរបញ្ជាក់ថា «អ្នកជាវីរបុរស» នឹងធ្វើឡើងរយៈពេលពីរខែចំពោះម៉ាស៊ីលលក់សម្ភារៈទាំង១៨ទូទាំងរាជធានី ដែល១៦ទូមានទីតាំងនៅផ្សារទំនើបអ៊ីអនទី១ និង២ទូនៅផ្សារទំនើប Eden Garden៕
Source: Kampuchea Thmey Daily
0 Comments