កាលពីថ្ងៃអង្គារ ប្រទេសវេណេហ្ស៊ូអេឡា បានបញ្ជាឲ្យអ្នកការទូតអាមេរិកចាកចេញពីប្រទេសនេះក្នុងរយៈពេល៧២ម៉ោង បន្ទាប់ពីលោកប្រធានាធិបតី Nicolas Maduro បានចោទប្រកាន់សមភាគីអាមេរិកលោក Donald Trump អំពីការបំផ្លិចបំផ្លាញតាមអ៊ីនធើណិតដែលបានធ្វើឲ្យប្រទេសនេះធ្លាក់ចូលក្នុងការដាច់ចរន្តអគ្គិសនីដ៏អាក្រក់បំផុតក្នុងកំណត់ត្រា។
រដ្ឋមន្ត្រីការបរទេសលោក Jorge Arreaza បាននិយាយថា អ្នកការទូតអាមេរិកនៅលើទឹកដីវេណេហ្ស៊ូអេឡាត្រូវតែចាកចេញក្នុងរយៈពេលបីថ្ងៃបន្ទាប់ពីកិច្ចចរចាអំពីការរក្សាផលប្រយោជន៍ការទូតនៅក្នុងប្រទេសទាំងពីរត្រូវដួលរលំ។
រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា “វត្តមានរបស់មន្ត្រីទាំងនេះនៅលើទឹកដីវេណេហ្ស៊ូអេឡាគឺជាហានិភ័យសម្រាប់សន្តិភាព សាមគ្គីភាពនិងស្ថេរភាពនៃប្រទេស”។
ស្របពេលជាមួយគ្នានោះដែរ ក្រសួងការបរទេសអាមេរិកបានប្រកាសកាលពីថ្ងៃចន្ទថា ខ្លួននឹងដកបុគ្គលិករបស់ខ្លួនចេញពីប្រទេសវេណេហ្ស៊ូអេឡានៅក្នុងសប្តាហ៍នេះដោយនិយាយថា វត្តមានរបស់ពួកគេបានក្លាយជាឧបសគ្គមួយចំពោះគោលនយោបាយសហរដ្ឋអាមេរិក។
ទីក្រុងវ៉ាស៊ីនតោនបាននាំមុខគេក្នុងការទទួលស្គាល់មេដឹកនាំគណបក្សប្រឆាំងលោក Juan Guaido ថាជាប្រធានាធិបតីស្របច្បាប់របស់ប្រទេសវេណេហ្ស៊ូអេឡា។
លោក Maduro ដែលនៅតែរក្សាការត្រួតត្រាលើយោធានិងស្ថាប័នរដ្ឋផ្សេងទៀតក៏ដូចជាមានការគាំទ្រពីរុស្ស៊ីនិងចិនផងដែរនោះបានប្រកាសថាលោក Guaido គឺជាអាយ៉ងរបស់សហរដ្ឋអាមេរិក។
ខណៈការដាច់ភ្លើងបានឈានដល់ថ្ងៃទីប្រាំមួយនោះ, មន្ទីរពេទ្យបានតស៊ូដើម្បីរក្សាឧបករណ៍ ម្ហូបអាហារបានរលាយក្នុងកំដៅហើយការនាំចេញពីស្ថានីយប្រេងដ៏សំខាន់របស់ប្រទេសនេះត្រូវបានបិទ។
យោងតាមសាក្សីនិងប្រព័ន្ធផ្សព្វផ្សាយសង្គមបានឲ្យដឹងថា អគ្គិសនីបានវិលត្រលប់មកវិញនៅផ្នែកជាច្រើននៃប្រទេសនេះកាលពីថ្ងៃអង្គារ។ ប៉ុន្តែអគ្គិសនីនៅតែមិនមាននៅក្នុងផ្នែកខ្លះនៃរដ្ឋធានី Caracas និងតំបន់ភាគខាងលិចក្បែរព្រំដែនជាមួយប្រទេសកូឡុំប៊ី។
លោក Maduro បានបន្ទោសក្រុងវ៉ាស៊ីនតោនថាបានរៀបចំនូវអ្វីដែលលោកនិយាយថា ជាការវាយប្រហារតាមអ៊ីនធើណិតដ៏ទំនើបទៅលើប្រតិបត្ដិការវារីអគ្គិសនីរបស់ប្រទេសវេណេហ្ស៊ូអេឡា៕ REUTERS
Source: Kampuchea Thmey Daily
0 Comments