សមាជិកសភាអង់គ្លេសបានបដិសេធចំពោះកិច្ចព្រមព្រៀង Brexit របស់នាយករដ្ឋមន្ត្រីអង់គ្លេស Theresa May ជាលើកទីពីរកាលពីថ្ងៃអង្គារដែលជាហេតុធ្វើឲ្យប្រទេសនេះ ធ្លាក់ចូលទៅក្នុងភាព មិនប្រាកដប្រជាបន្ថែមទៀតក្នុងរយៈពេលតែ១៧ថ្ងៃប៉ុណ្ណោះ មុនពេលខ្លួននឹងត្រូវបំបែកចេញពីសហភាពអឺរ៉ុប។
សភាបានបោះឆ្នោតជាមួយសំឡេង៣៩១ទល់២៤២ប្រឆាំងនឹងកិច្ចព្រមព្រៀងលែងលះនេះសូម្បីតែបន្ទាប់ពីលោកស្រី May ទទួលបានការធានាបន្ថែមទៀតពីទីក្រុងប្រ៊ូសសែលអំពីចំណុចសំខាន់ដ៏ចម្រូងចម្រាសបំផុតរបស់វាក៏ដោយ។
ការបដិសេធនេះបានបង្កឲ្យមានភាពចលាចលផ្នែកសេដ្ឋកិច្ចស្របពេលដែលចក្រភពអង់គ្លេសគ្រោងនឹងបញ្ចប់ទំនាក់ទំនងជាមួយដៃគូពាណិជ្ជកម្មដ៏ធំបំផុតរបស់ខ្លួននៅថ្ងៃទី២៩ខែមីនាបន្ទាប់ពីរយៈពេល៤៦ឆ្នាំ។
ដោយបង្ហាញខ្លួននៅចំពោះមុខសមាជិកសភា លោកស្រី May បានប្តេជ្ញាថានឹងប្រយុទ្ធប្រឆាំងជាបន្តដោយនិយាយថា លោកស្រីសូមច្រានចោលយ៉ាងដាច់ខាតចំពោះលទ្ធផលនេះ។
លោកស្រីបានប្រាប់អង្គប្រជុំបន្ទាប់ពីការបោះឆ្នោតថា “កិច្ចព្រមព្រៀងដែលយើងបានចរចាគឺជាកិច្ចព្រមព្រៀងតែមួយគត់និងល្អបំផុត”។
លោកស្រី May បានសន្យាថានឹងអនុញ្ញាតឲ្យសមាជិកសភាបោះឆ្នោតលើជម្រើស “គ្មានកិច្ចព្រមព្រៀង” នៅថ្ងៃពុធហើយនឹងសម្រេចនៅថ្ងៃព្រហស្បតិ៍ថាតើត្រូវស្នើសុំសហភាពអឺរ៉ុបឲ្យពន្យាពេល Brexit ដែរឬក៏អត់។
លោកស្រីបាននិយាយថា សភាបានជួបប្រទះជម្រើសមិនអាចប្រកែកបានប្រសិនបើខ្លួនបោះឆ្នោតសម្រាប់ការពន្យារពេលមួយរួមទាំងការដកហូត Brexit, ការធ្វើប្រជាមតិប្រជាមតិលើកទីពីរឬចាកចេញជាមួយកិច្ចព្រមព្រៀងផ្សេងទៀតផងដែរ។
ការបោះឆ្នោតចុងក្រោយបំផុតនេះបានកើតឡើងពីរឆ្នាំបន្ទាប់ពីចក្រភពអង់គ្លេសបានកំណត់ពេលវេលាលើការចាកចេញរបស់ខ្លួនពីសហភាពអឺរ៉ុបបន្ទាប់ពីការធ្វើប្រជាមតិមួយក្នុងឆ្នាំ២០១៦៕ AFP
Source: Kampuchea Thmey Daily
0 Comments