មនុស្ស៦នាក់​ បាន​ស្លាប់​នៅ​ពេល​រថយន្ត​មួយ​គ្រឿង​បើក​បុក​ហ្វូង​មនុស្ស​នៅ​ប្រទេស​ចិន​ ហើយ​ប៉ូលិស​ក៏បាន​សម្លាប់​អ្នកបើកបរ​ផងដែរ

ទូរទស្សន៍​រដ្ឋ CCTV បាន​រាយការណ៍​ថា រថយន្ដ​មួយ​គ្រឿង ​បាន​បើក​ចូល​ទៅក្នុង​ហ្វូង​មនុស្ស​នៅ​ភាគ​កណ្តាល​ប្រទេស​ចិន​កាលពី​ថ្ងៃ​សុក្រ ​ដោយ​បាន​សម្លាប់​មនុស្ស​៦​នាក់ និង​រងរបួស ៧ នាក់​ទៀត ខណៈដែល​អ្នកបើកបរ​ត្រូវបាន​បាញ់សំលាប់​ដោយ​ប៉ូលីស។

ទូរទស្សន៍ CCTV បាន​និយាយថា អ្នករងរបួស​ត្រូវបាន​បញ្ជូន​ទៅកាន់​មន្ទីរពេទ្យ​បន្ទាប់ពី​ឧប្បត្តិហេតុ​នៅ​ព្រឹក​ព្រលឹម​នៅ​ទីក្រុង Zaoyang ខេត្ត Hubei។

វីដេអូ​មួយ​ដែល​ត្រូវបាន​ចេញផ្សាយ​ដោយ​កាសែត The Paper បានបង្ហាញ​ពី​សាកសព​ត្រូវបាន​គ្រប​ដោយ​ភួយ​នៅតាម​ដងផ្លូវ ហើយ​ក្រុម​មួយ​កំពុង​ព្យាយាម​លើក​អ្នកណាម្នាក់​ដាក់​លើ​ស្នែង​សែង ។​
ទន្ទឹម​នោះ​ប្រទេស​ចិន​បានទទួល​រង​នូវ​ឧប្បត្តិហេតុ​ស្រដៀង​គ្នា​នេះ​នៅក្នុង​ប៉ុន្មាន​ខែ​ថ្មីៗ​នេះ​ផងដែរ។​

កាលពី​ខែកញ្ញា​ឆ្នាំមុន​មាន​មនុស្ស ១១ នាក់​បាន​ស្លាប់ និង​រាប់សិប​នាក់​បាន​រងរបួស​នៅពេល​រថយន្ត​មួយគ្រឿង​បាន​បើក​បុក​ទៅលើ​ហ្វូងមនុស្ស​នៅក្នុង​ទីលាន​សាធារណៈ​មួយ​នៅក្នុង​ទីក្រុង Hengdong ភាគ​កណ្តាល​នៃ​ខេត្ត Hunan ។​

ប៉ូលីតេលី​បាន​ឃាត់ខ្លួន​អ្នកបើកបរ​ម្នាក់​ដែលមាន​អាយុ ៤០ ឆ្នាំ ហើយ​បាន​ពិពណ៌នា​ថា​គាត់​ជា «​ពិរុទ្ធជន​ម្តង​ហើយ​ម្តងទៀត​» ដែលមាន​កាំបិត​នៅក្នុង​ឡាន​របស់គាត់ និង​មានបំណង​ធ្វើ​ឲ្យ​មានការ​ខូចខាត​ធ្ងន់ធ្ងរ។

កាលពី​ចុងខែ​វិច្ឆិកា​រថយន្ត​មួយគ្រឿង​បាន​បើក​បុក​ចូលទៅក្នុង​ហ្វូង​កុមារ​មួយក្រុម​ដែល​ឆ្លងកាត់​ផ្លូវ​នៅមុខ​សាលារៀន​បឋម​មួយកន្លែង​នៅក្នុង​ខេត្ត Liaoning ភាគ​ឥ​សាន្ត​ដែល​បានសម្លាប់​មនុស្ស ៥ នាក់ និង​រងរបួស​យ៉ាងហោចណាស់ ១៩ នាក់។

អ្នកបើក​បរបាន​និយាយថា គាត់​បានជ្រើសរើស​ជន​រងគ្រោះ​ដោយ​ចៃដន្យ ហើយ​ត្រូវបាន​គេ​រាយការណ៍​ថា​កំពុង​គិត​អំពី​ការធ្វើអត្តឃាត​ដោយសារតែ​បញ្ហា​ក្នុងស្រុក​មុនពេល​សោកនាដកម្ម​នេះ​កើតឡើង ៕ AFP

​

Source: Kampuchea Thmey Daily