បាត់ដំបង ៖ យុវជនម្នាក់ ដែលអ្នកភូមិបានអះអាងថា សង្ស័យជាមនុស្សវិកលចរិត ត្រូវរថយន្តបុកស្លាប់ភ្លាមៗនៅកណ្ដាលទ្រូងផ្លូវ បន្ទាប់ពីជនមិនស្គាល់អត្តសញ្ញាណរូបនេះ បានរត់ឡើងទៅលើផ្លូវជាតិទាំងយប់ងងឹត ស្របពេលដែលរថយន្តក្រុងរបស់ក្រុមហ៊ុន វីរៈប៊ុនថាំ មកដល់។
តាមការរៀបរាប់ពីលោក អនុសេនីយ៍ឯក ស៊ុន រ៉ា នាយប៉ុស្តិ៍រដ្ឋបាល ឫស្សីក្រាំងបានបញ្ជាក់ថា នៅមុននេះប្រហែល ២ ថ្ងៃ គេសង្កេតឃើញថា ជនរងគ្រោះរូបនេះ បានដើរតត្រុកតាមផ្លូវទៅវិញ ទៅមក ដោយគេសង្ស័យថា ជាមនុស្សវិកលចរិត។
លោកនាយប៉ុស្តិ៍បានបន្តថា លុះនៅវេលាម៉ោង១១និង៣០នាទីយប់ ថ្ងៃទី១១ ខែមីនា ឆ្នាំ២០១៩ លើកំណាត់ផ្លូវជាតិលេខ៥ ត្រង់ ចន្លោះ បង្គោលគីឡូម៉ែត្រលេខ២២២ និង ២២៣ ក៏ស្រាប់តែគេឃើញយុវជនរូបនេះ បានបណ្ដើរម៉ូតូ១ គ្រឿង យកមកចតទុកចោលលើផ្លូវលំ ស្ថិតនៅក្នុងភូមិថ្នល់បត់ ឃុំឫស្សីក្រាំង ស្រុកមោងឬស្សី ខេត្តបាត់ដំបង ហើយបានរត់ឡើងទៅលើផ្លូវជាតិ ស្របពេលដែលមានរថយន្តមួយគ្រឿងមកដល់ ក៏បានបុកស្លាប់នៅទីនោះតែម្តង។
រថយន្តក្រុងគឺជា របស់ក្រុមហ៊ុន វីរៈប៊ុនថាំ ពាក់ស្លាកលេខភ្នំពេញ3A8826ធ្វើដំណើរ ពីបាត់ដំបង ទៅភ្នំពេញ រីឯម៉ូតូដែលជនរងគ្រោះទុកចោលនោះ គ្មានកូនសោបញ្ឆេះ ម៉ាក ហុងដាឌ្រីម ពណ៌ខ្មៅ ពាក់ស្លាកលេខ ពោធិ៍សាត់1D6539 ដោយបច្ចុប្បន្នរថយន្ត និងម៉ូតូ ត្រូវបានកម្លាំងនាំយករក្សាទុក នៅប៉ុស្តិ៍ឫស្សីក្រាំង ជាបណ្ដោះអាសន្ន ចំណែក សព បានយកទៅតម្កល់ទុកនៅវត្តស្វាយប្រហោង រង់ចាំក្រែងមានអ្នកស្គាល់៕
Source: Kampuchea Thmey Daily
0 Comments