រតនគិរី ៖ យុវជនម្នាក់ បានសម្រេចចិត្តបញ្ចប់ជីវិតខ្លួនឯង ដោយយកកាំបិតអារ.កសម្លាប់ខ្លួនឯងនៅលើផ្ទះ។
ហេតុការណ៍ភ្ញាក់ផ្អើលនេះ បានកើតឡើង ដោយសារសាច់ញាតិជនរងគ្រោះបានប្រទះឃើញនៅវេលាម៉ោង ៨និង៤៥នាទីព្រឹក ថ្ងៃចន្ទ ៦កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែមីនា ឆ្នាំ២០១៩កន្លងទៅ នៅលើផ្ទះជនរងគ្រោះ ស្ថិតក្នុងភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរី។
នាយប៉ុស្តិ៍សង្កាត់បឹងកន្សែង លោក គង់ សេរីភាព បានឲ្យដឹងថា ជនរងគ្រោះស្លាប់ក្នុងករណីអារ.កនឹងកាំបិតប៉័ងតោសម្លាប់ខ្លួនឯង បន្ទាប់ពីសាច់ញាតិ បានឡើងទៅលើផ្ទះ ក៏ប្រទះឃើញជនរងគ្រោះដេកស្លាប់បាត់ទៅហើយ។ ជនរងគ្រោះឈ្មោះ ឆែម សែន ភេទប្រុស អាយុ២០ឆ្នាំ ជនជាតិខ្មែរ មុខរបរជាងសំណង់។
លោកនាយប៉ុស្តិ៍បានបន្តថា តាមការបញ្ជាក់ពីលោក យ៉ន ឆែម ត្រូវជាឪពុកជនរងគ្រោះថា កូនប្រុសគាត់មានចរិតប្លែក តាំងពីត្រឡប់មកពីធ្វើសំណង់នៅស្រុកវើនសៃវិញ ដោយការនិយាយស្ដី ហាក់និយាយច្រើន ហើយនិយាយផ្ដេសផ្ដាសខុសពីធម្មតា បើតាមជំនឿថា កូនគាត់ត្រូវព្រាយបិសាចចូលហើយ។
សមត្ថកិច្ចវិទ្យាសាស្ត្របច្ចេកទេសនៃស្នងការនគរបាលខេត្តបានចុះត្រួតពិនិត្យ ធ្វើកោសល្យវិច័យ ឃើញថា សាកសពពិតជាអារកសម្លាប់ខ្លួនឯងពិតប្រាកដមែន មិនមែនរឿងអ្វីនោះទេ។
សមត្ថកិច្ចក្រោយពីបានធ្វើកោសល្យវិច័យហើយនោះ ក៏ប្រគល់សពទៅឲ្យសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments