វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង វង្ស វិឆ័យអ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវគេផ្គូអោយជួបប្រកួតជាមួយអ្នកប្រដាល់ថៃ នៅលើសង្វៀនគូបូតាស្ទឹងមានជ័យ នាយប់ថ្ងៃសុក្រទី១៥ មីនា ២០១៩នេះ។
វង្ស ណយ គេនឹងត្រូវជួបប្រកួតជាមួយអ្នកប្រដាល់ថៃ រុងរ៉ាត់ ភុមផាន់មួង (Ruong Rat Phumphanmoeung)។ ពួកគេទាំងពីរ នឹងជួបប្រកួតគ្នាក្នុងប្រភេទទម្ងន់៧០គីឡូក្រាម។
រុងរ៉ាត់ ភុមផាន់មួង គេធ្លាប់មកប្រកួតនៅកម្ពុជាប៉ុន្មានលើកហើយកន្លងមក ។អ្នកប្រដាល់ថៃរូបនេះ ខ្លាំងគួរសមដែរ។ នេះបើតាមអ្នកដឹកនាំកីឡាករថៃមកប្រកួតអោយដឹង។
ទោះជាយ៉ាងណា រុងរ៉ាត់ ភុមផាន់មួង ជួបជាមួយវង្សណយលើកនេះ ក៏មិនជាធានាប៉ុន្មានដែរ ព្រោះវង្ស ណយ គេបានត្រៀមខ្លួនយ៉ាងល្អ សម្រាប់ការប្រកួតនេះ ។ យ៉ាងណា វង្ស ណយ លើកនេះ អាចថាគេមានការប្រុងប្រយ័ត្នជាងមុន ដែលធ្វើអោយរុងរ៉ាត់ ភុមផាន់មួង ពិបាកសង្ឃឹមឈ្នះណាស់។
រុងរ៉ាត់ ភុមផាន់មួង បើតាមអ្នកផ្គូផ្គងឲ្យដឹងនោះ គេមានកំនត់ត្រាប្រកួត៩៨លើក ឈ្នះ៧៤លើក ចាញ់២០លើក ស្មើ០៤លើក និងធ្លាប់វាយដៃគូអោយសន្លប់ជាង២០លើកឯណោះ ។ តែបើធៀបជាមួយប្រវត្តិប្រកួតរបស់វង្ស ណយ គឹនៅតែតិចជាងដែរ ដោយវង្ស ណយ មានកំណត់ត្រាប្រកួតរហូតដល់២០៣លើក ឈ្នះ១៦១លើក ចាញ់៣៧លើក និងស្មើ៥លើក។
ទោះជាយ៉ាងនេះក្តី វង្ស ណយមិនអាចមើលងាយ រុងរ៉ាត់ ភុមផាន់មួង បានឡើយ ព្រោះអ្នកប្រដាល់ថៃរូបនេះ គេក៏ល្អមិនចាញ់វង្ស ណយប៉ុន្មានដែរ។
ចាំមើល វង្ស ណយ និង រុងរ៉ាត់ ភុមផាន់មួង នេះ តើនរណាជាអ្នកឈ្នះ ?ក្នុងការជួបគ្នាលើកដំបូងនេះ។ វង្ស ណយ គេប្រកួតចុងក្រោយនេះ វាយចាញ់អ្នកប្រដាល់ថៃចែគ ស្យ៉ាម ដោយពិន្ទុ កាលពីថ្ងៃទី០៣មីនាកន្លងទៅនេះ។
ចំពោះ វង្ស វិឆ័យ អ្នកប្រដាល់ក្លិបកងពលតូចទ័ពពិសេសឆ័ត្រយោង៩១១ត្រូវផ្គូជាមួយអ្នកប្រដាល់ថៃឈ្មោះ ហាន់មើ ចាក់ក្រយ៉ានមួយថៃ(Hanmer Chak Kravan Muay Thai)ពីរនាក់នេះ នឹងជួបប្រកួតគ្នាក្នុងប្រភេទទម្ងន់៧០គីឡូក្រាម ។ពីរនាក់នេះ មិនដែលជួបគ្នាទេកន្លងមក។
វង្ស វិឆ័យ ប្រកួតចុងក្រោយនេះ (១៦កុម្ភៈ២០១៩) បានវាយឈ្នះយ៉ាម ខេមរា អ្នកប្រដាល់ក្លិបរស្មីកុមាកំព្រាដោយប្រកួតគ្នាក្នុងទម្ងន់៧០គីឡូក្រាម។ វិឆ័យ ជាអ្នកប្រដាល់ស្រករក្រោយ ដែលសព្វថ្ងៃកេរ្តិ៍ឈ្មោះរបស់គេកំពុងត្រូវបានគេចាប់អារម្មណ៍គួរសមដែរ ។ វិឆ័យ មានកាយសម្បទារឹងមាំ វាយខ្លាំង ហើយវាយមិនចេះខ្លាចគូប្រកួតនោះទេ ។ ពោលគឺ វិឆ័យវាយសម្រុកចូលដោយមិនញញើត ជាមួយនឹងកណ្តាប់ដៃខ្លាំង សន្ទុះទាត់ក៏ខ្លាំង ជង្គង់កែងក៏ល្អថែមទៀត។
ហាន់មើ គេក៏ជាអ្នកប្រដាល់ស្រករក្រោយដែរ ហើយអ្នកប្រដាល់រូបនេះ ក៏វាយខ្លាំងមិនចាញ់វង្ស វិឆ័យ ប៉ុន្មានដែរ។អ្នកប្រដាល់រូបនេះ ក៏វាយសម្រុកមិនចេះខ្លាចគូប្រកួតដែរ ។
យ៉ាងណា សម្រាប់ការប្រកួតលើកនេះ គេមិនអាចទាយមុនថា វង្ស វិឆ័យអាចឈ្នះអ្នកប្រដាល់ថៃហាន់មើ នោះឡើយ។ ការប្រកួតចុងក្រោយ វង្ស វិឆ័យ បានវាយឈ្នះយ៉ាម ខេមរាដោយពិន្ទុ៕
Source: Kampuchea Thmey Daily
0 Comments