ឧបនាយករដ្ឋមន្ត្រី កែ គឹមយ៉ាន ស្នើឲ្យអាជ្ញាធរ សមត្ថកិច្ចព្រំដែនបង្រួមច្រកល្មើសច្បាប់

បន្ទាយមានជ័យ ៖ ឯកឧត្តមឧបនាយករដ្ឋមន្ត្រី កែ គឹមយ៉ាន ស្នើដល់អាជ្ញាធរខេត្ត សមត្ថកិច្ចព្រំដែន ពិនិត្យ បង្រួមច្រករបៀងល្មើសច្បាប់ ឲ្យនៅសល់ចំនួនតិច ខណៈដែល បច្ចុប្បន្នច្រករបៀង ក្នុងខេត្តបន្ទាយមានជ័យ មានរហូតទៅដល់ជាង៤០ច្រក លើផ្ទៃដី ជាប់ព្រំដែនថៃ ជាង១៥០គីឡូម៉ែត្រ។

ថ្លែងដូច្នេះ ក្នុងពិធីបិទ សន្និបាតបូកសរុបលទ្ធផលការងារប្រចាំឆ្នាំ២០១៨ លើទិសដៅបន្តឆ្នាំ២០១៩ របស់រដ្ឋបាលខេត្តបន្ទាយមានជ័យ កាលពីថ្ងៃទី០៦ ខែមីនា ឆ្នាំ២០១៩ នៅនឹងសាលប្រជុំសាលាខេត្តបន្ទាយមានជ័យ។

ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានលើកឡើងទៀតថា រឿងច្រករបៀងល្មើសច្បាប់នេះ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានប្រកាសឲ្យអាជ្ញាធរ គ្រប់ខេត្ត ជាប់ព្រំដែន បិទទាំងស្រុង។

ជុំវិញការលើកឡើងខាងលើនេះ ឃើញថា ខេត្តបន្ទាយមានជ័យ មិនមានការអន់ថយ លើបញ្ហាបិទច្រករបៀងល្មើសច្បាប់នោះឡើយ ដែលនាំឲ្យបទល្មើសព្រំដែនកើតព្រោងព្រាត រួមមាន ៖ បទល្មើសនាំរថយន្តចង្កូតស្តាំ ម៉ូតូគេចពន្ធ ឈើគ្រញូង ជ្រូកមាន់ទា ...។

ស្របពេលដែលឯកឧត្តមឧបនាយករដ្ឋមន្ត្រី ឲ្យបង្រួមច្រកនេះ ដែរ ខេត្តបន្ទាយមានជ័យ កំពុងតែគ្រោងបើកច្រកតំបន់មួយទៀត ដែលស្ថិតនៅចំណុចបង្គោលសីមាលេខ២៧ ក្នុងភូមិថ្មរមៀលលិច ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ដែលការគ្រោងនេះ មិនទាន់មានសេចក្ដីសម្រេចឲ្យបើកផង ការរៀបចំ កំពុងតែចាប់ផ្តើម ដោយមានការឈូសឆាយភ្នំ ធ្វើផ្លូវឡើងទៅ គោលដៅច្រក ដែលគ្រោងបើកនេះ បានកើតឡើងយ៉ាងគគ្រឹកគគ្រេង បង្កផលប៉ះពាល់ដល់តំបន់ការពារទេសភាពបន្ទាយឆ្មា។ តាមរយៈការគ្រោងបើកច្រកនេះដែរ ធ្វើឲ្យដី តំបន់នោះមានហាងឆេង មានការទិញលក់ដីព្រោងព្រាត នាំឲ្យមានការទន្ទ្រានព្រៃឈើ យកដីធ្វើកម្មសិទ្ធិ និងមានលក់តៗគ្នា សូម្បីតែដីភ្នំ ក៏ត្រូវបានទិញលក់ដោយមានទាំងអាជ្ញាធរ ចុះហត្ថលេខាផងដែរ។

ជុំវិញបញ្ហាទិញលក់ដីតំបន់ខាងលើនេះ លោក ឌៀប ឈួន អភិបាលស្រុកថ្មពួក បានបំភ្លឺឲ្យដឹងកាលពីថ្ងៃទី០៦ ខែមីនា ឆ្នាំ២០១៩ នេះថា ពិតជាមាន ការទិញលក់តៗ គ្នាមែន ដោយ ដីទាំងនោះ ភាគច្រើនគឺ ទាហានជាអ្នកគ្រប់គ្រង ហើយបានលក់បន្តបន្ទាប់ ហើយលោកក៏ទទួលស្គាល់ថា ដីតំបន់នោះ ស្ថិតនៅក្នុងដីព្រះរាជក្រឹត្យនៅឡើយ និងខុសច្បាប់មែន តែដោយសារមនោសញ្ចេតនា ទើបអាជ្ញាធរបំពេញបែបបទឲ្យ។

ជាមួយគ្នានេះដែរលោក យឹម លី ប្រធានមន្ទីរបរិស្ថានខេត្តបន្ទាយមានជ័យ ក៏បានឲ្យដឹងដែរថា ពិតជាមានការឈូសឆាយ ដីក្នុងតំបន់ការពារទេសភាពបន្ទាយឆ្មា ពិតមែន ហើយលោក ក៏បានចាត់ឲ្យមន្ត្រីរបស់លោកឲ្យចុះហាមឃាត់ និងប្រចាំការនៅទីនោះ ជៀសវាងមានការលួចទន្ទ្រានជាថ្មី។ ដោយឡែកខាងក្រុមហ៊ុន បានប្រាប់មកលោកថា កំពុងតែស្មើសុំ ធ្វើអនុប្រយោគចេញពីតំបន់ទេសភាពបន្ទាយឆ្មារ៕