ដំណើរការកសាងកែលម្អប្រព័ន្ធប្រឡាយ.លូចំនួន៣ជំហាន កន្លងមកក្នុងរាជធានីភ្នំពេញជាបទពិសោធន៍ដ៏ល្អសម្រាប់ជំហានទី០៤

Cambodia News March 06, 2019

ភ្នំពេញ ៖ នៅថ្ងៃទី៥ ខែមីនាកន្លងមកនេះ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានជួបពិភាក្សាការងារជាមួយលោកយូស៊ីណូប៊ូ ហ្គូកូស៊ីម៉ា នាយកទីចាត់ការអន្តរជាតិរបស់ក្រុមហ៊ុនTOA Corporation ដែលជាក្រុមហ៊ុនទទួលម៉ៅការសាងសង់គម្រោងការពារទឹកជំនន់ និងកែលម្អប្រព័ន្ធប្រឡាយ.លូក្នុងរាជធានីភ្នំពេញជំហានទី៤ដើម្បីជជែកលើការងារសាងសង់គម្រោងខាងលើនេះ។

លោកឃួង ស្រេង បានថ្លែងថា រដ្ឋបាលរាជធានីភ្នំពេញត្រៀមខ្លួនជានិច្ចដើម្បីផ្តល់កិច្ចសហការឲ្យបានល្អប្រសើរជាមួយក្រុមហ៊ុនដើម្បីធានាឲ្យការងារ គម្រោងខាងលើនេះ ប្រព្រឹត្តទៅបានទាន់ពេលវេលាតាមការគ្រោងទុក។

លោកអភិបាលបន្តថា លទ្ធផលនៃការអនុវត្តគម្រោងសាងសង់ការពារទឹកជំនន់ និងកែលម្អប្រព័ន្ធប្រឡាយ.លូក្នុងរាជធានីភ្នំពេញទាំង៣ជំហានកន្លងមក វាជាបទពិសោធន៍ដ៏ល្អសម្រាប់ការអនុវត្តនៅជំហានទី៤នេះទៀត។

សូមបញ្ជាក់ថា គម្រោងការពារទឹកជំនន់ និងកែលម្អប្រព័ន្ធប្រឡាយ.លូនៅរាជធានីភ្នំពេញទាំង៤ជំហាននៅក្នុងរាជធានីភ្នំពេញគឺជាជំនួយឥតសំណងរបស់រាជរដ្ឋាភិបាលជប៉ុន ហើយសម្រាប់គម្រោងជំហានទី៤ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី៤ ខែមីនា ក្រោមអធិបតីភាពសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាដែលគម្រោងនេះនឹងសម្រេចឲ្យរួចរាល់នៅក្នុងឆ្នាំ ២០២១ខាងមុខ៕