តាកែវ ៖ ជនរងគ្រោះ២នាក់ បានរងរបួសធ្ងន់ទាំងសងខាង ក្រោយជួបគ្រោះថ្នាក់ចរាចរណ៍ រវាងម៉ូតូនិងម៉ូតូបុកគ្នា ដោយសារតែការធ្វេសប្រហែស។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅព្រឹកថ្ងៃទី១៣ ខែមីនា ឆ្នាំ២០១៩ វេលាម៉ោង៦និង៥៣នាទី ស្ថិតនៅលើផ្លូវខេត្តលេខ១២៩ ចន្លោះគីឡូម៉ែត្រលេខ១២ ១៣ ក្នុងភូមិជំរៅ ឃុំតាំងយ៉ាប ស្រុកព្រៃកប្បាស ខេត្តតាកែវ។
ប៉ូលិសស្រុកព្រៃកប្បាសបានឲ្យដឹងថា ភាគីជនរងគ្រោះដែលបើកម៉ូតូឆ្លងថ្នល់មិនប្រយ័ត្នមានឈ្មោះ ដូង លាងហេង ភេទស្រី អាយុ៤៦ឆ្នាំ មុខរបរកសិករ រស់នៅភូមិព្រៃឈើទាល ឃុំព្រៃផ្តៅ ស្រុកព្រៃកប្បាស ខេត្តតាកែវ រងរបួសធ្ងន់ និងត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យ រាជធានីភ្នំពេញ។
ចំណែកភាគីជនរងគ្រោះម្ខាងទៀតមាន ឈ្មោះ ចិត សុខ ភេទប្រុស អាយុ៣១ឆ្នាំ រស់នៅភូមិក្រាំងអំពិល ឃុំតាំងយ៉ាប ស្រុកព្រៃកប្បាស ខេត្តតាកែវ រងរបួសធ្ងន់ និងត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្តតាកែវ។
ក្រោយកើតហេតុ ប៉ូលិសជំនាញ បានចុះដល់វាស់វែងធ្វើកំណត់ហេតុ និងយកម៉ូតូជនរងគ្រោះទាំង២គ្រឿង មករក្សាទុកដើម្បីដោះស្រាយគ្នានៅពេលក្រោយ៕
Source: Kampuchea Thmey Daily
0 Comments