កាមរី បុកម៉ូតូនៅផ្លូវខ្វែងទិសគ្នា ម្នាក់ស្លាប់ និង២នាក់របួសធ្ងន់

កំពង់ឆ្នាំង ៖ យុវជនម្នាក់ ជាអ្នកជិះម៉ូតូបានស្លាប់នៅនឹងកន្លែង និងយុវជន២នាក់ទៀតជិះពីក្រោយបានរងរបួសធ្ងន់ ក្នុងករណីរថយន្តបុកម៉ូតូ នៅផ្លូវខ្វែងទិសគ្នា។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១០និង២០នាទីយប់ ថ្ងៃទី១៣ ខែមីនា ឆ្នាំ ២០១៩ ចំណុចផ្លូវបែកជាបួន មុខភោជនីយដ្ឋានបៃតង ស្ថិតនៅក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង។

សមត្ថកិច្ចនគរបាលចរាចរណ៍ ក្រុងកំពង់ឆ្នាំង បានឲ្យដឹងថា ជនរងគ្រោះក្នុងហេតុការណ៍នេះមានឈ្មោះ ជួន តារា អាយុប្រមាណ២០ឆ្នាំ រស់នៅភូមិធម្មយុត្តិ ជាអ្នកបើកបរម៉ូតូ បានស្លាប់នៅនឹងកន្លែង។ ចំណែកអ្នកជិះពីក្រោយ២នាក់ ១.ឈ្មោះ យ៉ុន សេងណាតូ និង ម្នាក់ទៀតមិនស្គាល់ឈ្មោះ ។
សមត្ថកិច្ចបន្តថា មុនពេលកើតហេតុ ជនរងគ្រោះទាំង៣នាក់ បានជិះម៉ូតូ ម៉ាកស៊ូម័រអិច មួយគ្រឿង ក្នុងដំណើរពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តមួយគ្រឿងទៀតម៉ាកកាមរីគូថប៉ោង ពណ៌ស ពាក់ស្លាកលេខភ្នំពេញ 2E. 1108 បើកបរ ដោយបុរស ឈ្មោះ លី ប៊ុនឡា អាយុ៤៥ឆ្នាំ ជាមន្ត្រីយោធា មានទីលំនៅភូមិស្ពករាជ្យ ឃុំអណ្ដូងស្នាយ ស្រុករលាប្អៀរ បានបុកគ្នាជាមួយម៉ូតូក្នុងដំណើរខ្វែងទិសគ្នាយ៉ាងពេញទំហឹង។ ក្រោយពេលកើតហេតុជនរងគ្រោះ ឈ្មោះ ជួង តារា ជាអ្នកបើកបរម៉ូតូ បានស្លាប់នៅនឹងកន្លែងកើតហេតុ ចំណែកឯយុវជនពីរនាក់ទៀត ដែលជិះពីក្រោយ បានរងរបួសធ្ងន់ ហើយត្រូវគេបានដឹកទៅសង្គ្រោះព្យាបាលនៅមន្ទីរពេទ្យបង្អែកខេត្តកំពង់ឆ្នាំង។

អ្នកបើករថយន្ត ឈ្មោះ លី ប៊ុនឡា ត្រូវបានសមត្ថកិច្ចចាប់ឃាត់ខ្លួនយកមកកាន់អធិការដ្ឋាននគរបាលក្រុងកំពង់ឆ្នាំង បញ្ជូនទៅកាន់ការិយាល័យ នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង ជាមួយនឹងមធ្យោបាយធ្វើដំណើរ ទាំង២គ្រឿង ដើម្បីកសាងសំណុំរឿងចំណាត់ការតាមនីតិវិធីច្បាប់។

សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បណ្តាលមកអ្នកបើកម៉ូតូ និងអ្នកបើកបររថយន្ត ខ្វះការប្រុងប្រយ័ត្នដូចគ្នា ពេលបើកបរនៅផ្លូវខ្វែងទិសគ្នាជាបួន ទើបបង្កឲ្យមានគ្រោះថ្នាក់បែបនេះ៕