កំពង់ស្ពឺ ៖ កាលពីថ្ងៃទី២៨ ខែមីនា ឆ្នាំ២០១៩ នៅសាលាបឋមសិក្សាត្រពាំងព្នៅមានរៀបចំការអប់រំ និងផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោកដល់ប្អូនសិស្សានុសិស្សប្រមាណ២០០នាក់ ដោយមានការចូលរួមពី លោក ពា គីមវង ទីប្រឹក្សាផ្នែកសុវត្ថិភាពចរាចរណ៍ផ្លូវគោក លោកគ្រូ អ្នកគ្រូ និងសិស្សសានុសិស្សផងដែរ។
បញ្ហាគ្រោះថ្នាក់ចរាចរណ៍ គឺជាក្តីកង្វល់របស់រាជរដ្ឋាភិបាលកម្ពុជា គ្រោះថ្នាក់ចរាចរណ៍បានបណ្តាលឲ្យមានអ្នកស្លាប់ របួស ពិការ និងខូចខាតសម្ភារៈអស់ជាច្រើន ហើយក្នុងចំណោមអ្នកស្លាប់ដោយសារគ្រោះថ្នាក់ចរាចរណ៍ក្នុងឆ្នាំ២០១៨ មានចំនួនប្រមាណជិត២០០០នាក់ ហើយស្ទើរជារៀងរាល់ឆ្នាំ ប្រទេសកម្ពុជា ខាតបង់ថវិកាប្រមាណជាង៣០០លានដុល្លារអាមេរិកដោយបញ្ហានេះ។
ដោយឡែក កត្តាចម្បង ដែលបង្កឲ្យមានគ្រោះថ្នាក់ គឺកត្តាមនុស្ស ដែលរួមមានការបើកបរលើសល្បឿនកំណត់ ការហូបគ្រឿងស្រវឹង ការវ៉ាជែង ការបត់ក្នុងស្ថានភាពគ្រោះថ្នាក់ ការមិនគោរពសិទ្ធិអាទិភាព ការមិនពាក់មួកសុវត្ថិភាព និងការមិនយកចិត្តទុកដាក់លើបញ្ហាបច្ចេកទេសយានយន្តជាដើម។ ដោយមើលឃើញពីបញ្ហាប្រឈមនេះ ក្រសួងសាធារណការ និងដឹកជញ្ជូនតាមរយៈអង្គភាពស្ថាបនាផ្លូវថ្នល់(MPU3) បានចុះធ្វើការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោក ដល់មន្ត្រីថ្នាក់ស្រុក ឃុំ និងលោកគ្រូអ្នកគ្រូ សិស្សនុសិស្ស ពិសេសប្រជាពលរដ្ឋដែលរស់នៅតាមបណ្តោយខ្សែផ្លូវ នៃគម្រោងកែលម្អផ្លូវ។
សាលាបឋមសិក្សាត្រពាំងព្នៅស្ថិតនៅក្នុងភូមិស្នួល ឃុំអមលាំង ស្រុកថ្ពង ខេត្តកំពង់ស្ពឺ ស្ថិតនៅលើផ្លូវលេខ១៥១Bដែលតភ្ជាប់ពីផ្លូវជាតិលេខ៥៣ ក្នុងស្រុកទឹកផុសខេត្តកំពង់ឆ្នាំង ទៅផ្លូវជាតិលេខ៤៤ក្នុងខេត្តកំពង់ស្ពឺ។
នៅក្នុងឱកាស នៃពិធីបើកកម្មវិធី លោក ពា គីមវង ទីប្រឹក្សា នៃកម្មវិធីសុវត្ថិភាពចរាចរណ៍ផ្លូវគោកក៏បានប្រាប់ពីគោលបំណងនៃការអប់រំ និងផ្សព្វផ្សាយនេះថា ការរៀបចំឲ្យមានការអប់រំ និងផ្សព្វផ្សាយស្តីពីសុវត្ថិភាពចរាចរណ៍ផ្លូវគោកនៅពេលនេះ គឺក្នុងគោលបំណងចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកដែលបានកំពុងគំរាបកំហែងអាយុជីវិតអ្នកប្រើប្រាស់ផ្លូវ និងធ្វើឲ្យមានការរាំងស្ទះដល់កិច្ចអភិវឌ្ឍន៍ប្រទេសជាតិ និងបង្កើនចំណេះដឹងស្តីពីសុវត្ថិភាពចរាចរណ៍ផ្លូវគោកដែលជាមេរៀនបំណិនជីវិតសម្រាប់ក្មួយៗសិស្សានុសិស្ស។ លោកថាពេលនេះលោកបានលើកយកប្រធានបទចំនួនពីរដើម្បីចែករំលែកដល់ប្អូនៗ គឺសុវត្ថិភាពក្នុងការប្រើប្រាស់កង់ និងការដើរប្រកបដោយសុវត្ថិភាព។
លោកបានបន្ថែមថា កម្មវិធីនេះ ពិតជាមានសារៈសំខាន់សម្រាប់អ្នកប្រើប្រាស់ផ្លូវ ដូចជាប្រជាពលរដ្ឋ ដែលរស់នៅតាមបណ្ដោយខ្សែផ្លូវពិសេសសិស្សានុសិស្ស ព្រោះពួកគេជាអ្នកប្រើប្រាស់កង់ និងជាថ្មើរជើងដែលជាជនដែលងាយរងគ្រោះដោយគ្រោះថ្នាក់ចរាចរណ៍ផ្លូវគោក។
លោកបានបន្ថែមថា ផ្លូវ មូលហេតុចម្បង នៃគ្រោះថ្នាក់ចរាចរណ៍ គឺការបើកបរហួសល្បឿនកំណត់ដែលធ្វើឲ្យអ្នកប្រើប្រាស់កង់ និងថ្មើរជាងរងគ្រោះ ព្រោះថាកាបង្កើនល្បឿនបើកបរ នៃរថយន្តបន្តិចតែឱកាសស្លាប់នៃថ្មើរជើងរហូត៨០% ព្រោះកុមារមិនអាចទ្រាំទ្រចំពោះកម្លាំងប៉ះទង្គិចរបស់រថយន្តឡើយ។ ជាមួយគ្នានេះដែរ លោក គីម វង បានសំណូមពរឲ្យលោកគ្រូ អ្នកគ្រូជួយជំរុញ និងណែនាំឲ្យកុមារកុំឲ្យដើរលើទ្រូងផ្លូវ បើផ្លូវគ្នា ចិញ្ចើម ឬជាយផ្លូវកុមារត្រូវដើរបញ្ច្រាសទិសចរាចរណ៍ដែលថ្មើរជើងអាចមើលឃើញយានមកពីទិសផ្ទុយ ដែលអាចការពារខ្លួនបានពីគ្រោះថ្នាក់ចរាចរណ៍ផ្លូវគោក៕
Source: Kampuchea Thmey Daily
0 Comments