បង្ក្រាបទីតាំងអនឡាញ ក្បែរសាលារៀន ឯអ្នកលេង គឺជាសិស្សអាយុក្រោម១៥ឆ្នាំ

បាត់ដំបង ៖ ទីតាំងល្បែងតាមអនឡាញ ដែលជ្រកក្រោមស្លាកអ៊ីនធឺណិតស្របច្បាប់ ត្រូវបានកម្លាំងអធិការដ្ឋាន នគរបាលក្រុងបាត់ដំបង ធ្វើការបង្ក្រាបក្នុងករណីជាក់ស្តែង រួមជាមួយនឹងសិស្សសាលាអាយុក្រោម១៥ឆ្នាំ ជាច្រើននាក់ផងដែរ។

នៅថ្ងៃទី១៤ ខែមីនា ឆ្នាំ២០១៩ វេលាម៉ោង១១ថ្ងៃត្រង់ លោកវរសេនីយ៍ឯក ឆាង វណ្ណឆៃ អធិការនគរបាល ក្រុងបាត់ដំបង បានដឹកនាំកម្លាំងចេញប្រតិបត្តិការទៅកាន់ចំណុចក្បែរសាលាវិទ្យាល័យព្រះមុនីវង្ស ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង បន្ទាប់ពីមានការសំណូមពរពីសំណាក់អាណាព្យាបាលសិស្សជច្រើននាក់រួចមក។

កិច្ចប្រតិបត្តិការនេះ គឺបានធ្វើឡើងត្រង់ផ្ទះបើកអ៊ីនធឺណិតមួយកន្លែង យីហោ៩៩៩៩ NET ដោយស្ត្រីដែលជាម្ចាស់ទីតាំងមាន ឈ្មោះ សយ នី មានមុខរបរ ជាអាជីវករបើកអ៊ីនធឺណិត ដោយមានប័ណ្ណអាជីវកម្មត្រឹមត្រូវផងដែរ ដែលចេញពីមន្ទីរប្រៃសណីយ៍ ឯស្វាមីមានឈ្មោះ យ៉ង់ ផាត អាយុ ៦០ឆ្នាំ។

ការបង្ក្រាបនេះ គឺដោយសារតែម្ចាស់អាជីវកម្មមិនបានគោរពតាមលក្ខខ័ណ្ឌ នៃច្បាប់អនុញ្ញាត ដោយទី១-គឺមានចម្ងាយពីសាលារៀនមិនដល់១០០ម៉ែត្រផង នេះបើយោងតាមផ្លូវច្បាប់ត្រូវមានចម្ងាយចាប់ពី៥០០ម៉ែត្រ ឡើងទៅ។ ទី២-គឺនៅក្នុងទីតាំងសុទ្ធសឹងតែជាក្មេងសិស្សសាលា ដែលមានអាយុក្រោម១៥ឆ្នាំទាំងអស់។

នៅក្នុងកិច្ចប្រតិបត្តិការនោះ គឺមានសិស្សប្រមាណជិត៣០នាក់ ប៉ុន្តែដោយសារ ម្ចាស់ទីតាំងបានរៀបផែនការបើកចំហទ្វារខាងក្រោយជាស្រេច ទើបធ្វើឲ្យសិស្សទាំងនោះរត់គេចខ្លួនអស់ ដោយឃាត់ខ្លួនបានតែ៦នាក់ប៉ុណ្ណោះ ដើម្បីយកទៅអប់រំ ព្រោះពួកគេមានអាយុក្រោម១៥ឆ្នាំ ទាំងអស់។

ឯសម្ភារៈដែលដកហូតបានរួមមាន ម៉ូលីទ័រ ២០គ្រឿង ឃីបត១៧ ស៊ីស្ទ័រ ១៩ កង្ហារ១៥ កៅអីជ័រ១៨ និងកៅអីត្រងោលជ័រ ចំនួន១៨ បច្ចុប្បន្នដោយមានការឯកភាពពីលោកព្រះរាជអាជ្ញា នួន សាន ផងនោះ កម្លាំងបានប្រមូលវត្ថុតាង ពាក់ព័ន្ធយកទៅរក្សាទុកនៅអធិការដ្ឋានជាបណ្ដោះអាសន្ន៕