ភ្នំពេញ ៖ ប្រមុខរាជរដ្ឋាភិបាលកម្ពុជាបានឲ្យដឹងថា រាជរដ្ឋាភិបាលគ្រោងកាត់បន្ថយថ្ងៃឈប់សម្រាកប្រចាំឆ្នាំ នៅឆ្នាំក្រោយដើម្បីសម្រួលដល់ការរកស៊ីរបស់វិនិយោគិននៅកម្ពុជា ។ សម្តេចតេជោនាយករដ្ឋមន្ត្រីបានលើកឡើងថា ប្រទេសកម្ពុជាក្រប៉ុន្តែថ្ងៃឈប់សម្រាកច្រើនជាងប្រទេសអភិវឌ្ឍន៍។ កម្ពុជាមួយឆ្នាំ មានថ្ងៃឈន់សម្រាករហូតដល់ ២៨ ទៅ ៣០ ថ្ងៃ ក្នុងពេលដែលប្រទេសសិង្ហបុរី មានថ្ងៃឈប់សម្រាប់ត្រឹមតែ ១១ ថ្ងៃប៉ុណ្ណោះ។
សម្តេចតេជោនាយករដ្ឋមន្ត្រីបានលើកឡើងបែបនេះនៅក្នុងពិធីចែកសញ្ញាបត្រដល់គរុសិស្ស និងគរុនិស្សិតចំនួនជិត ២០០០នាក់ នៃវិទ្យាស្ថានជាតិអប់រំ នាព្រឹកថ្ងៃទី ២៧ ខែ មីនានេះ។ សម្តេចតេជោនា យករដ្ឋមន្ត្រីបានសុំការយោគយល់អធ្យាស្រ័យបើមិនដូច្នេះអ្នករកស៊ីអាចនឹងរត់ចោលយើងទាំងអស់ដោយ សារតែម្ខាងទាមទារឡើងប្រាក់ខែនិងម្ខាងទៀតថ្ងៃឈប់សម្រាកកាន់តែច្រើនដូចនេះឆ្នាំក្រោយអាចកាត់បន្ថ យថ្ងៃឈប់សម្រាកខ្លះ។
សម្តេចតេជោ ហ៊ុន សែន បានមានប្រសាសន៍ថា៖«កម្ពុជាជាប្រទេសក្រីក្រ ក៏ប៉ុន្តែការឈប់សម្រាកនៅប្រទេសរបស់យើង គឺច្រើនជាងប្រទេសអ្នកមាន។ សិង្ហបុរីគេសម្រាកតែ១១ថ្ងៃទេ ក្នុងពេលដែលកម្ពុជាសម្រាក២៨ថ្ងៃទៅ៣០ថ្ងៃ ។ អ៊ីចឹងប្រទេសយើងក្រប៉ុន្តែគឺយើងឈប់សម្រាកច្រើនណាស់ដូច្នេះសូមការយោគយល់អធ្យាស្រ័យមិនអីចឹងអ្នករកស៊ីទាំងអស់រត់ចោលយើង ដោយតែម្ខាងឡើងប្រាក់ខែ ម្យ៉ាងទៀតឈប់សម្រាកកាន់តែច្រើន អ៊ីចឹងទេឆ្នាំក្រោយអាចនឹងកាត់បន្ថយថ្ងៃឈប់សម្រាក»។
សម្តេចតេជោនាយករដ្ឋមន្ត្រីបានលើកឡើងថា បើថ្ងៃឈប់សម្រាកមួយថ្ងៃៗនោះយើងដាក់ថា ថ្ងៃសម្រាកនៅក្នុងប្រតិទិនប៉ុន្តែយើងមិនបាច់សម្រាកទេគឺធ្វើការធម្មតា។ ដូចនេះយើងយកថ្ងៃនោះមកបូកក្នុង ថ្ងៃភ្ជុំបិណ្ឌឬថ្ងៃចូលឆ្នាំវិញព្រោះនៅកម្ពុជាពិធីបុណ្យធំៗ ជាបុណ្យជាតិនោះគឺមានតែពីរប៉ុណ្ណោះគឺបុណ្យចូលឆ្នាំខ្មែរ និងបុណ្យភ្ជុំបិណ្ឌ។ ដូចនេះបុណ្យទាំងពីនេះត្រូវបានអនុញ្ញាតឲ្យឈប់៣ថ្ងៃដូចនេះយើងអាចយកថ្ងៃឈប់សម្រាកផ្សេងដែលធ្វើការធម្មតានោះមកបូកដើម្បីឲ្យយើងអាចឈប់បានយូរជាងបានន័យថា អាចឈប់រហូត៥ ថ្ងៃដូចនេះប្រហែលវាចំណេញជាង។
សម្តេចតេជោនាយករដ្ឋមន្ត្រីបានថ្លែងថា អ្នករកស៊ីនៅប្រទេសរបស់យើង គេមើលឃើញថា យើងគិតតែទាមទារឡើងប្រាក់ខែ ទារថ្ងៃឈប់សម្រាកឲ្យបានកាន់តែច្រើន អ៊ីចឹងអ្នករកស៊ីនឹងចាកចេញពីយើង។ យើងធ្វើនេះដោយមិនគិតថាមានភាពអនុគ្រោះឬមួយអត់ភាពអនុគ្រោះគឺគិតតែពីកម្លាំងខ្លួនឯងប្រឹងឲ្យក្លាយជាប្រទេស ដែលមានការអភិវឌ្ឍមួយដោយមិនពឹងពាក់ភាពអនុគ្រោះពីនរណាទាំងអស់ដើម្បីកុំឲ្យប្រទេសរបស់យើងត្រូវទទួលរងនូវការប្រមាថហើយកង្វល់របស់គេត្រូវចាប់បង្ខំឲ្យយើងជាអ្នកអនុវត្តគឺអត់ទេ។ បើតាម ក្រៅពីការកាត់បន្ថយថ្ងៃឈប់សម្រាកការសម្រួលនីតិវិធីក្នុងការពិនិត្យកុងតឺន័រ និងកាត់បន្ថយថ្លៃអគ្គិសនី ក៏ស្ថិតក្នុងកញ្ចប់នៃការធ្វើកំណែទម្រង់នេះផងដែរ។
ខណៈកម្ពុជាមានថ្ងៃឈប់សម្រាកច្រើននោះវាធ្វើឲ្យអ្នកវិនិយោគនិងម្ចាស់អាជីវកម្មគ្រប់ប្រភេទ រអ៊ូ រទាំពីបញ្ហាចង្វាក់ផលិតកម្មរបស់ពួកគេ។ អ្នកវិភាគសេដ្ឋកិច្ចបាននិយាយថា ការឈប់សម្រាកច្រើនវាធ្វើឲ្យចង្វាក់ផលិតកម្មមានភាពយឺតយ៉ាវនិងស្ទះដែលធ្វើឲ្យការផលិតមានការចំណាយខ្ពស់ហើយពិបាកនឹងប្រ កួតប្រជែង។
លោក គី សេរីវឌ្ឍន៍ អ្នកវិភាគសេដ្ឋកិច្ចនៅកម្ពុជាបាននិយាយថា កម្ពុជានឹងកើនចំណូលថវិកាជាតិយ៉ាងតិច ១៥០លានដុល្លារបើសិនជារាជរដ្ឋាភិបាលសម្រេចលុបចោលថ្ងៃបុណ្យជាតិមិនសំខាន់ចំនួន ៧ ថ្ងៃចេញពីថ្ងៃឈប់សម្រាកប្រចាំឆ្នាំបច្ចុប្បន្ននេះ ។ អ្នកវិភាគសេដ្ឋកិច្ចរូបនេះបានគណនាតាមរូបមន្តសេដ្ឋកិច្ចនៃការកាត់បន្ថយថ្ងៃឈប់សម្រាកដោយវាស់ជាមួយនឹងចំណូលជាតិ(GDP)ដូច្នេះវានឹងជួយឲ្យGDPកើន ១៥០ លានដុល្លារបន្ថែមទៀត នៅពេលដែលរាជរដ្ឋាភិបាលកាត់បន្ថយថ្ងៃឈប់ ៧ថ្ងៃ។
នៅកម្ពុជាថ្ងៃឈប់សម្រាកច្រើនទាំងបុណ្យជាតិ ២៨ ទៅ ៣០ ថ្ងៃ បូកថ្ងៃឈប់សម្រាកប្រចាំឆ្នាំ ១៥ ថ្ងៃទៀត ហើយបើបុណ្យជាតិចំថ្ងៃចុងសប្តាហ៍ត្រូវសងថ្ងៃធ្វើការថែមទៀតដូច្នេះក្នុង ១ ឆ្នាំ កម្ពុជាឈប់ប្រមាណជិត ៥០ ថ្ងៃ ។ ដូច្នេះហើយយើងធ្វើការតិចជាងគេមួយខែ។ កត្តានេះហើយដែលធ្វើឲ្យកំណើនសេដ្ឋកិច្ចមិនខ្ពស់និងកំណើនវិនិយោគងាកទៅរកកន្លែងផ្សេងៗ។
ផ្ទុយពីការយល់ឃើញរបស់អ្នកវិភាគសេដ្ឋកិច្ចលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបាននិយាយថា ការកាត់បន្ថយថ្ងៃឈប់សម្រាកមិនបានផ្ដល់ផលចំណេញដល់កម្មករទេគឺវាផ្ដល់ផលចំណេញទៅលើវិនិយោគិនតែប៉ុណ្ណោះ។ ដូច្នេះលោកបានប្រកាសជំហរមិនគាំទ្រការកាត់ចំនួនថ្ងៃឈប់សម្រាកឡើយ។ ដោយលោកបានលើកឡើងថា « អង្គការ ILO បានបង្ហាញថា ការឈប់សម្រាកក្នុងប្រទេសកម្ពុជាមិនច្រើនជាងប្រទេសជិតខាងនោះទេស្ថិតនៅមធ្យមនៅឡើយ។ និយោជិក តែងតែនិយាយបែបនេះពីមុន ហើយគេធ្លាប់និយាយថា ការវិនិយោគកាត់បន្ថយពី ១៥០ភាគរយ មកនៅ១៣០ ភាគរយ ការងារច្រើនដដែល មិនមានប្រយោជន៍អ្វីនោះទេ»។
គួររម្លឹកថា ក្នុងឆ្នាំ២០១៨ កំណើនសេដ្ឋកិច្ចជាតិមានម្រមាណ ៧,៣ ភាគរយ ដែលចំណូលមធ្យមរបស់មនុស្សម្នាក់កើនដល់១,៥៦៣ ដុល្លារ។ ចំណែកទំហំពាណិជ្ជកម្មសរុបមាន២៤ពាន់លានដុល្លារ។
សូមជម្រាបថា នៅថ្ងៃទី២៩ ខែមីនា ឆ្នាំ២០១៩ខាងមុខនេះ សម្តេចតេជោ ហ៊ុន សែន នឹងដាក់ចេញការធ្វើកំណែទម្រង់លើការធ្វើធុរកិច្ចនៅប្រទេសកម្ពុជាជាកញ្ចប់ ដើម្បីសម្រួលដល់ការធ្វើពាណិជ្ជកម្ម ខណៈថ្មីៗនេះ សម្តេចតេជោទើបបានសម្រេច ដកកាំកុងត្រូលចេញពីច្រកទ្វារព្រំដែន លុបចោលស្ថាប័នកាំសាប ជាមួយនឹងការសម្រួលការធ្វើធុរកិច្ចមួយចំនួនទៀត៕
Source: Kampuchea Thmey Daily
0 Comments