ផ្សារឯកជនរបស់ឧកញ៉ា ឌួង តិច ត្រូវភ្លើងឆេះ អស់ជិត១០តូប

ភ្នំពេញ ៖ ទីតាំងផ្សារឯកជនមួយកន្លែងរបស់ ឧកញ៉ា ឌួង តិច ស្ថិតនៅក្នុងភូមិតាសេ សង្កាត់កំបូលខណ្ឌពោធិ៍សែនជ័យ ត្រូវបានអគ្គិភ័យឆាបឆេះខូចខាតអស់ចំនួន៨តូប តែក្រោយមក បានរថយន្តពន្លត់អគ្គិភ័យ ចេញជួយអន្តរាគមន៍ទាន់ពេល បើមិនដូច្នោះទេវា នឹងខូចខាតច្រើនជាងនេះទៅទៀត តែទោះជាយ៉ាងណា ករណីនេះ មិនបណ្ដាលឲ្យគ្រោះថ្នាក់ដល់មនុស្សណាម្នាក់ឡើយ។

ហេតុការណ៍នេះ បានកើតឡើងកាលពីវេលាម៉ោង១១និង៤០នាទីយប់ ថ្ងៃទី៦ ខែមីនា ឆ្នាំ២០១៩នេះ នៅចំណុចតូបលក់អីវ៉ាន់ចាប់ហួយ ក្នុងបរិវេណផ្សារតាសេក ស្ថិតក្នុងភូមិតាសេក សង្កាត់កំបូល ខណ្ឌពោធិ៍សែនជ័យ។ មូលហេតុ នៃការឆេះនេះ គឺបណ្ដាលមកពីទុស្សេខ្សែភ្លើង។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញមានផ្សែងហុយៗចេញពីខាងក្នុងតូបលក់អីវ៉ាន់ចាប់ហួយមួយកន្លែងក្នុងផ្សារនេះ លាយឡំជាមួយអណ្ដាតភ្លើងតិចៗផង ពេលនោះប្រជាពលរដ្ឋ បាននាំគ្នាស្រែកឆោឡោឡើងនិងរាយការណ៍ប្រាប់សមត្ថកិច្ចមូលដ្ឋានចុះមកពិនិត្យជួយអន្តរាគមន៍ តែដោយសារស្ថានការណ៍ភ្លើងឆេះខ្លាំងពេក មិនអាចជួយបាញ់ទឹកពន្លត់ដោយខ្លួនឯងបាន ក៏បានទាក់ទងហៅរថយន្តពន្លត់អគ្គិភ័យប្រចាំសាលាខណ្ឌ និងឡានទឹកចេញពីតំបន់សេដ្ឋកិច្ចពិសេសជាច្រើនគ្រឿងមកជួយអន្តរាគមន៍បាញ់ទឹកពន្លត់ រហូតរលត់ជាស្ថាពរ។ អគ្គិភ័យនេះ បណ្ដាលឲ្យឆេះរាលដាលឡើងអស់ចំនួន៨តូប និងខូចខាតសម្ភារៈក្នុងតូបលក់ដូរនោះមួយចំនួនធំផងដែរ។

ប្រតិបត្តិការពន្លត់អគ្គិភ័យនេះ សមត្ថកិច្ច បានប្រើប្រាស់រថយន្តពន្លត់អគ្គិភ័យចំនួន៤គ្រឿង បាញ់អស់ទាំង៤គ្រឿង ដោយធ្វើការពន្លត់រហូតរលត់ទាំងស្រុងនៅម៉ោង១និង៣០នាទីរំលងអធ្រាត្រឈានចូល ថ្ងៃទី៧ ខែឆ្នាំដដែល។

បងប្អូនប្រជាពលរដ្ឋ ក៏ដូចអាជីវករផ្សេងៗ គួរប្រុងប្រយ័ត្នឲ្យបានខ្ពស់ពេលទៅណាមកណា គួរតែបិទបារ៉ែតភ្លើង ឬភ្លើងធូបទៀនជាដើមឲ្យអស់ជាមុនសិន សឹមចាកចេញ ព្រោះមានគ្រោះអគ្គិភ័យជាយថាហេតុ៕