រតនគិរី ៖ នៅព្រឹកថ្ងៃពុធ ៨កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែមីនា ឆ្នាំ២០១៩ នៅមន្ទីរអប់រំយុវជន និងកីឡា ខេត្តរតនគិរី បានប្រារព្ធពិធីបើកការប្រកួតកីឡាសិស្សបឋមសិក្សា-មធ្យមសិក្សាថ្នាក់ខេត្តប្រចាំឆ្នាំ២០១៨-២០១៩ នៅទីលានបាល់ទាត់អនុវិទ្យាល័យឡាបានសៀក។
ពិធីនេះមានការអញ្ជើញចូលរួមជាអធិបតីភាពពី សំណាក់ លោក ញ៉ែម សំអឿន អភិបាលខេត្ត ស្ដីទី និងមានការចូលរួមពី លោក លោកស្រី ប្រធាន អនុប្រធានមន្ទីរ អង្គភាពជុំវិញខេត្ត ព្រមទាំងប្រតិភូកីឡាករ កីឡាការិនី មកពីបណ្ដាក្រុង/ស្រុកទាំង៩ សរុបចំនួន៧៨៤នាក់។
មានប្រសាសន៍សំណេះសំណាលក្នុងពិធីបើកការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ខេត្តប្រចាំឆ្នាំសិក្សា២០១៨-២០១៩នេះ លោក ញ៉ែម សំអឿន បានធ្វើការលើកទឹកចិត្តឲ្យកីឡាករ កីឡាការិនីទាំងអស់ ត្រូវខិតខំប្រឹងប្រែងប្រកួត ដើម្បីដណ្តើមយកជ័យជម្នះជូនក្រុង/ស្រុករបស់ខ្លួន។
ជាពិសេសការប្រកួតកីឡានាំមកនូវសុខភាពល្អ អាចជៀសផុតពីការប្រព្រឹត្តអំពើអបាយមុខផ្សេងៗ ដូចជា ការប្រើប្រាស់អំពើហិង្សា ការសេពគ្រឿងញៀន ល្បែងស៊ីសង...។ល។ ព្រោះកីឡា នាំឲ្យសុខភាពល្អ និងមានវិន័យ វិន័យនាំឲ្យមានសណ្ដាប់ធ្នាប់សេចក្ដីថ្លៃថ្នូរ និងមានកិត្តិយស។
លោកអភិបាលរងខេត្ត ក៏បានធ្វើការអំពាវនាវដល់មន្ត្រីរាជការនៅតាមមន្ទីរ អង្គភាពនានាជុំវិញខេត្ត ថ្នាក់ដឹកនាំកីឡាករក្នុងក្រុង ស្រុក លោកគ្រូ អ្នកគ្រូទាំងអស់ សូមចូលរួមចំណែកបំផុសចលនាកីឡាឲ្យបានទូលំទូលាយ។ ជាពិសេសសកម្មភាពអប់រំកាយ និងកីឡា នៅក្នុងសាលារៀន ដើម្បីជាគោលដៅសុខុមាលភាព ទាំងផ្លូវកាយផ្លូវបញ្ញារបស់ក្មួយៗ សិស្សានុសិស្សផង និងចូលរួមចំណែកលើកស្ទួយការអភិវឌ្ឍន៍កីឡាក្នុងខេត្តរតនគិរីយើងផងដែរ។
លោក ឈីវ គឹមសាយ អនុប្រធានមន្ទីរអប់រំ យុវជន និងកីឡាខេត្តរតនគិរី បានឲ្យដឹងថា ការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ខេត្តប្រចាំឆ្នាំសិក្សា ២០១៨-២០១៩ មាន៤ប្រភេទកីឡា រួមមាន បាល់ទាត់ បាល់ទះ បាល់បោះ និងអត្តពលកម្ម។
ក្នុងនោះបាល់ទាត់បុរសនារី បាល់បោះបុរសនារី មាន៩ក្រុម បាល់ទះបុរសនារីមាន៩ក្រុម និងអត្តពលកម្ម ហើយការប្រកួតនេះ ចាប់ផ្ដើមពីថ្ងៃទី១០ ដល់ថ្ងៃទី១៥ ខែមីនា ឆ្នាំ២០១៩ ដោយមានសិស្សជាកីឡាករ កីឡាការិនី ចូលរួមប្រកួតសរុបចំនួន៧៨៤នាក់ និងគ្រូបង្វឹកចំនួន៧៤នាក់។
ការប្រកួតនេះ សំដៅប្រមូលផ្ដុំ កីឡាករ កីឡាការិនី ដែលជាសិស្សឲ្យចូលរួមប្រកួតប្រជែង ដើម្បីដកស្រង់បទពិសោធន៍ បច្ចេកទេស ភាពសប្បាយរីករាយពង្រឹងកាយសម្បទា ឲ្យមាំមួន បង្កើនស្មារតីឲ្យឈ្លាសវៃ និងចៀសផុតពីអំពើអសកម្មផ្សេងៗក្នុងសង្គម៕
Source: Kampuchea Thmey Daily
0 Comments