ភ្នំពេញ ៖ បុរសអ្នកលេងចាក់សាក់ពេញម្នាក់ ត្រូវបានគូទំនាស់ ដែលប្រដាប់ដោយកាំបិតសាំម៉ូរ៉ៃ តាមកាប់ បណ្តាលឲ្យដាច់ត្រឹមប្រអប់កដៃ ធ្លាក់ដី គួរឲ្យរន្ធត់ញាក់សាច់ ហើយជនដៃដល់ ក៏គេចខ្លួនបាត់ភ្លាមៗពេលនោះផងដែរ។
ហេតុការណ៍តាមកាប់ចាក់គ្នាដូចក្នុងចិនហុងកុងនោះ បានកើតឡើងនៅថ្ងៃអង្គារ ៧កើត ខែផល្គុន ឆ្នាំច សំរឹទ្ធស័ក ព.ស២៥៦២ត្រូវនឹងទី ១២ ខែមីនា ឆ្នាំ២០១៩ វេលាម៉ោង២៣យប់ ត្រង់ចំណុចតំបន់មិនរៀបរយ ស្ថិតខាងក្រោយមន្ទីរពេទ្យកាល់ម៉ែត ក្នុងភូមិ២១ ផ្លូវលេខ៨០ សង្កាត់ស្រះចក ខណ្ឌដូនពេញ។
សមត្ថកិច្ចបានឲ្យដឹងថា ជនរងគ្រោះដែលត្រូវគេកាប់ដាច់ត្រឹមប្រអប់កដៃស្តាំនោះមានឈ្មោះ យស់ គន្ធា ភេទប្រុស អាយុ៣៦ឆ្នាំ ពុំមានមុខរបរពិតប្រាកដ ស្នាក់នៅផ្ទះជួល ម្តុំសង្កាត់ទួលសង្កែ ខណ្ឌឫស្សីកែវ។ ចំណែកជនដៃដល់(ជនល្មើស) ត្រូវគេស្គាល់ថា ឈ្មោះ មាស សុភា អាយុ៣៥ឆ្នាំ ស្នាក់នៅម្តុំផ្លូវ៧០ ភូមិ២១ ក្នុងសង្កាត់ស្រះចក ខណ្ឌដូនពេញ(គេចខ្លួនបាត់)។
ប្រភពព័ត៌មានពីកន្លែងកើតបានឲ្យដឹងថា នៅមុនពេលកើតហេតុ គេឃើញក្រុមជនអ្នកលេងដែលសុទ្ធតែចាក់សាក់ពេញៗខ្លួន មិនដឹងថា ពួកគេចេញពីផឹកស៊ីមានទំនាស់គ្នាពីកន្លែងណានោះទេដែលភាគីទាំងសងខាងឃើញសុទ្ធតែមានកាន់កាំបិតសាំម៉ូរ៉ៃ បានរត់មកកាប់ចាក់គ្នានៅចំណុចកើតហេតុ ដែលរត់ឈូឆរ ដេញកាប់គ្នាដូចក្នុងរឿងចិនហុងកុងទៅហើយ បានធ្វើឲ្យភាគីម្ខាង(ខាងរងគ្រោះ)នោះ គឺត្រូវដាច់ប្រអប់កដៃស្តាំម្ខាង ដាច់ធ្លាក់ដី ដែលមើលទៅគួរឲ្យព្រឺញាក់សាច់តែម្តង។
ប្រភពព័ត៌មានបានបន្តទៀតថា ក្នុងហេតុការណ៍នោះ គេឃើញភាគីខាងរងគ្រោះ បើទោះបីខ្លួនត្រូវគេកាប់ដាច់ប្រអប់កដៃម្ខាងធ្លាក់ដីបាត់ហើយ ហាក់ដូចជាជនរងគ្រោះរូបនោះមិនបានស្លុតស្មារតីបន្តិចសោះឡើយ ហើយនៅតែរត់ដេញតាមកាប់ភាគីបង្កវិញ តែដេញមិនទាន់ ក៏ភាគីបង្កនោះគេចខ្លួនបាត់តែម្តង។ បន្ទាប់មក ក៏ត្រូវបានបក្ខពួកនាំគ្នារើសយកប្រអប់កដៃនោះហើយនាំមកកាន់មន្ទីរពេទ្យកាល់ម៉ែតភ្លាមៗ ដើម្បីគ្រូពេទ្យអាចជួយសង្គ្រោះដេរដៃដែលដាច់នោះបានមកវិញ។ ប៉ុន្តែទោះជាយ៉ាងណា គ្រូពេទ្យមិនអាចតភ្ជាប់ដៃដែលដាច់នោះមកវិញបានឡើយ(ពោល)គឺត្រូវពិការដៃនោះមួយជីវិតហើយ។
ពាក់ព័ន្ធនឹងហេតុការណ៍ក្រុមអ្នកលេងចាក់សាក់កាប់ចាក់គ្នានោះដែរ ត្រូវបានគេសង្ស័យថា អាចជារឿងពាលស៊ីពាលហើយ បានជាពួកគេតាមមកសងសឹកគ្នាដូច្នេះនោះ។
ចំណែកប៉ូលិសមូលដ្ឋានវិញ បានបញ្ជាក់ថា ចំពោះរឿងហេតុនេះ នៅមិនទាន់ច្បាស់ការថា វាផ្តើមចេញពីរឿងហេតុអ្វីឡើយ ព្រោះភាគីរងគ្រោះកំពុងហាក់ដូចជាលាក់លៀមរឿងហេតុនេះ។ តែទោះយ៉ាងណា កម្លាំងសមត្ថកិច្ចជំនាញតាមស្រាវជ្រាវចាប់ជនដៃដល់រូបនោះមកផ្ដន្ទាទោសតាមផ្លូវច្បាប់៕
Source: Kampuchea Thmey Daily
0 Comments