អ្នក​ស្រាវជ្រាវ​កម្ពុជា -​ចិន ពិភាក្សា​រួមគ្នា​ក្នុង​សិក្ខាសាលា​ស្តីពី​“ កម្ពុជា​និង​គំនិត​ផ្ដួចផ្ដើម​ខ្សែក្រវាត់​និង​ផ្លូវៈ កាលានុវត្តភាព បញ្ហា​ប្រឈម​និង​ទស្សនវិស័យ​”

ភ្នំពេញ ៖ វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យសភាកម្ពុជា សហការ​ជាមួយ​មជ្ឈមណ្ឌល​ស្រាវជ្រាវ​ដើម្បី​ហុងកុង​ដោយ​ចីរភាព​នៃ​សាកលវិទ្យាល័យ​ស៊ី​ធី​ក្រុង​ហុងកុង​ បានរៀបចំ​សិក្ខាសាលា​ស្តីពី “ កម្ពុជា​និង​គំនិត​ផ្តួចផ្តើម​ខ្សែក្រវាត់​និង​ផ្លូវៈ កាលានុវត្តភាព បញ្ហា​ប្រឈម​និង​ទស្សនវិស័យ​” នា​ព្រឹក​ថ្ងៃទី​៦​ខែមីនា​ឆ្នាំ​២០១៩​នៅ​រាជបណ្ឌិត្យសភាកម្ពុជា។

លោក​បណ្ឌិត គិ​ន ភា ប្រធាន​វិទ្យាស្ថាន​ទំនាក់ទំនង​អន្តរជាតិ បាន​មានប្រសាសន៍ថា សិក្ខាសាលា​ដែល​បានរៀបចំ​ឡើង​នេះ​គឺ​ដើម្បី​និស្សិត អ្នកស្រាវជ្រាវ និង​និស្សិត​មកពី​ប្រទេស​កម្ពុជា​និង​ប្រទេស​ចិន​ពិភាក្សា​ធ្វើការ​រួមគ្នា​ពិនិត្យមើល​កាលានុវត្តភាព បញ្ហា​ប្រឈម​និង​ទស្សនវិស័យ​សម្រាប់​ប្រទេស​កម្ពុជា​ក្នុង​ក្របខណ្ឌ​BRI របស់​ប្រទេស​ចិន។ អ្នកចូលរួម​ទាំងអស់​នៅទីនេះ​អាច​ចែករំលែក​គំនិត​ទាំង​ទស្សនៈ​វិជ្ជមាន និង​អវិជ្ជមាន​លើក​គម្រោង​BRI នៅក្នុង​ប្រទេស​កម្ពុជា​។​ អង្គសិក្ខាសាលា​យើង​មាន​វាគ្មិន​ចំនួន​៤​រូប គឺ​២​រូប​មកពី​ប្រទេស​កម្ពុជា​និង​២​រូប​ទៀត​មកពី​ហុងកុង​ដែល​នឹង​ចែករំលែក​ការស្រាវជ្រាវ​និង​ទស្សនវិស័យ​របស់​ពួកគាត់​លើ​ប្រធានបទ​ដូចជា “​សក្តានុពល​និង​ហានិភ័យ​របស់​BRI សម្រាប់​ប្រទេស​កម្ពុជា ” ប្រធានបទ “​ក្តី​ស្រមៃ​របស់​ប្រជាពលរដ្ឋ​កម្ពុជា​ឆ្ពោះទៅកាន់​BRI របស់​ប្រទេស​ចិន​”។

សាស្ត្រាចារ្យ​Linda Chelan Li ប្រធាន​មជ្ឈមណ្ឌល​ស្រាវជ្រាវ​ទីក្រុង​កុង​ហុង នៃ​សាកលវិទ្យាល័យ​ទីក្រុង​ហុងកុង​នឹង​បង្ហាញ​គម្រោង​ស្រាវជ្រាវ​ស្តីពី​“ តំបន់​ឆ្នេរ​សមុទ្រ​និង​កំណែ​ទម្រង់​របស់​ប្រទេស​ចិន​ក្រោម​គំនិត​ផ្ដួចផ្ដើម​ខ្សែក្រវាត់ ​និង​ផ្លូវ​” និង​លោក Raymond Wong​សាស្ត្រាចារ្យ​ ផ្នែក​វិទ្យាសាស្ត្រ​និង​បច្ចេកវិទ្យា​នៃ​សាកលវិទ្យាល័យ​ទីក្រុង​ហុងកុង​នឹង​ផ្តោត​ការស្រាវជ្រាវ​របស់​គាត់​ស្តីពី “​ការអភិវឌ្ឍន៍​ទីក្រុង​នៅក្នុង​ប្រទេស​ចិនៈ​ជា​មេរៀន​ដែល​បាន​រៀនសូត្រ​សំរាប់​ប្រទេស​កំពុងអភិវឌ្ឍន៍​”​។​

លោក​បណ្ឌិតសភា​ចា​រ្យ សុខ ទូច ប្រធាន​រាជ​បណ្ឌិត្យសភាកម្ពុជា​បាន​មានប្រសាសន៍​រំលឹក​ឲ្យ​ដឹង​ថា “​គំនិត​ផ្តួចផ្តើម ខ្សែក្រវាត់​និង​ផ្លូវ​” ជាការ​ផ្តួច​ផ្តើមគំនិត​បង្កើត​គម្រោង​ដ៏​មហាសាល​របស់លោក ស៊ី ជីន​ពីង ប្រធានាធិបតី​ចិន ចាប់តាំងពី​ឆ្នាំ​២០១៣​មក។ គម្រោង​នេះ ​គឺជា​គម្រោង​ហេដ្ឋារចនាសម្ពន្ធ ផ្លូវថ្នល់ ខ្សែ​រថភ្លើង បំពង់​បង្ហូរ​ឧស្ម័ន​និង​កំពង់ផែ​ជាច្រើន ដើម្បី​ផ្សារភ្ជាប់​ប្រទេស​ចិន ជាមួយនឹង​ទ្វីបអឺរ៉ុប អាស៊ី និង អាហ្វ្រិក ដោយ​ប្រមាណ​ថា នឹងត្រូវ​ចំណាយ​ទឹកប្រាក់​ប្រហែល ៥ ទ្រី​លាន​ដុល្លារ​អាមេរិក ក្នុងការ​ស្ថាបនា​ហេដ្ឋារចនាសម្ពន្ធ ដោយមាន​ការចូលរួម​ពី​ប្រទេស​ដ៏​មាន​សក្តានុពល​ចំនួន​៦៥​ប្រទេស ដែលមាន​ប្រជាជន​សរុប​ចំនួន 4.4​ពាន់​លាន​នាក់ ស្មើនឹង​៦២​ភាគរយ នៃ​ចំនួន​ប្រជាជន​ក្នុង​ពិភពលោក ហើយ​ទំហំ​សេដ្ឋកិច្ច​ជារួម​ស្មើនឹង​៣០​ភាគរយ​នៃ​ទំហំ​សេដ្ឋកិច្ចពិភពលោក។

លោក​បាន​បន្ត​ឲ្យ​ដឹងថា គម្រោង​ដ៏​មហិមា​នេះ ផ្តោតលើ​ការពង្រីក​ហេដ្ឋារចនាសម្ពន្ធ ឧស្សាហកម្ម​ជឿនលឿន ដោយ​រំពឹងថា នឹង​ផ្ទេរ​នូវ​ឧស្សាហកម្ម អតិពលកម្ម និង​ឧស្សាហកម្ម ដែល​ប្រើ​ដើមទុន​ធំៗ​របស់ខ្លួន ទៅ​ឲ្យ​បណ្តា​ប្រទេស​ដែល​ល​ចូលរួម​ក្នុង​ក្របខណ្ឌ “​គំនិត​ផ្តួចផ្តើម​ខ្សែក្រវាត់​និង​ផ្លូវ​” ទាំងនោះ​។ ​គម្រោង​មួយ​នេះ​ត្រូវបាន​បង្កើតឡើង​ក្នុង​បំណង បង្កើន​នូវ​ទំនាក់ទំនង​ឲ្យ​កាន់តែ​ជិន​ស្និត​រវាង​ប្រទេស​ចិន និង​បណ្ដា​ប្រទេស​នៅក្នុង​តំបន់​អាស៊ី អឺរ៉ុប និង​អាហ្វ្រិក ក្នុង​គោលដៅ ១-​ការ​សម្របសម្រួល​គោលនយោបាយ ២- ការសាងសង់​ហេដ្ឋារចនាសម្ពន្ធ​3- ការធ្វើ​ស​សមាហរណកម្ម​ហិរញ្ញវត្ថុ​និង​៥-​ទំនាក់ទំនង​រវាង​ប្រជាជន​និង​ប្រជាជន។ ក្នុងចំណោម​គម្រោង​ទាំង​៥​នេះ ការ​កសាង​ហេដ្ឋារចនាសម្ពន្ធ (​រួម​ទាំង​ផ្លូវដែក​និង​ផ្លូវ​ហាយ​វេ​) គឺជា​លក្ខណៈ​ពិសេស​នៃ​ផ្លូវ​សូត្រ​ថ្មី ដើម្បី​ពង្រីក​លំហូរ​ពាណិជ្ជកម្ម​ជំរុញ​ការ​អភិវឌ្ឍ​និង​កំណើន​សេដ្ឋកិច្ច​រយៈពេល​វែង ព្រមទាំង​ផ្តល់​នូវ​អត្ថប្រយោជន៍​ទៅដល់​ប្រទេស​ដែល​ចូលរួម៕

​

Source: Kampuchea Thmey Daily