បន្ទាយមានជ័យ ៖ នៅព្រឹកថ្ងៃទី១៤ ខែកុម្ភៈ ឆ្នាំ២០១៩នេះ នៅសាលប្រជុំក្រុងសិរីសោភ័ណ បានបើកកិច្ចប្រជុំ ស្តីពីអាជ្ញាធរក្រុងសិរីសោភ័ណ បានធ្វើការព្រមានដល់អ្នកម៉ៅភាស៊ីផ្សារចម្ការគ និងផ្សារសិរីសោភ័ណ គឺ លោក ពេជ្រ ញាណ ធ្វើការឲ្យក្រុមហ៊ុន លោក ថូ ម៉ាក់ នោះ ថា នៅតែយកលុយអ្នកលក់កញ្ច្រែង កញ្ជើល្អី ដែលជាទង្វើផ្គើននឹងអនុសាសន៍ សម្ដេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា។
លោក ហ៊ឹល រ៉ាយ៉ា អភិបាលក្រុងសិរីសោភ័ណ នៅក្នុងកិច្ចប្រជុំរៀបចំសណ្ដាប់ធ្នាប់ របៀបរៀបរយនៅក្នុងក្រុងសិរីសោភ័ណទាំងមូល បានធ្វើការព្រមាន លោក ពេជ្រ ញាណ និងក្រុមទារភាស៊ីរបស់ក្រុមហ៊ុន លោក ថូ ម៉ាក់ នៅផ្សារចម្ការគ ហៅផ្សារថ្មី ក្នុងសង្កាត់កំពង់ស្វាយ និងផ្សារសិរីសោភ័ណក្នុងសង្កាត់ព្រះពន្លា ដែលបានអនុវត្តផ្ទុយពីអនុសាសន៍របស់ សម្ដេចតេជោហ៊ុន សែន ប្រមុខរាជរដ្ឋាភិបាល ដោយសម្តេចមិនឲ្យយកភាស៊ី ពីបងប្អូនពលរដ្ឋ និងអាជីវករ ដែលលក់ដូរតាមកញ្ច្រែង កញ្ជើ ល្អីឡើយ។
លោកបន្តថា អ្នកម៉ៅការភាស៊ីផ្សារខាងលើ ត្រូវបញ្ឈប់ការយកភាស៊ីពីបងប្អូន លក់ដូរតាមកញ្ច្រែង កញ្ជើ ល្អី តទៅទៀត បើនៅតែមិនស្តាប់ លោកនឹងធ្វើសំណើទៅថ្នាក់លើ ដើម្បីសុំគោលការណ៍ដកចេញ ឬបញ្ឈប់ដំណើរការភាស៊ី និងអាជីវកម្មផ្សារតែម្តង។
ជាការឆ្លើយតប អ្នកម៉ៅការដេញភាស៊ី លោក ពេជ្រ ញាន និយាយថា លោក និងក្រុមទារភាស៊ីបានយកភាស៊ីចឹងហើយ ព្រោះលោកជាអ្នកដេញភាស៊ីបាន បើមិនឲ្យយកភាស៊ី ទៅយកអីទៅវិញ ហើយបងប្អូន ក៏ចេះតែឲ្យភាស៊ីមកដែរ។
លោក ពេជ្រ ញាណ បន្តថា តាមពិត អ្នកលក់ដូរកញ្ច្រែងទាំងនោះ គឺលក់លើផ្លូវជុំវិញផ្សារដែលក្រុមហ៊ុន លោក ថូ ម៉ាក់ ជាអ្នកសាងសង់ ហេតុនេះ បើបងប្អូនអ្នកលក់ មិនចង់បង់ភាស៊ី មានតែកុំលក់លើផ្លូវនោះ គឺទៅលក់ក្នុងផ្សារទៅ ម្យ៉ាងបងប្អូនអាជីវករ ឬពលរដ្ឋដែលលក់ដូរទាំងនោះ ក៏មិនមែនលក់លើកញ្ច្រែង ល្អី ឬកញ្ជើនោះ ទេ គឺលើតង់ លើកូនរាន ឬទ្រនាប់អីផ្សេងទៅវិញទេ ប៉ុន្តែ អ្នកលក់ និងមន្ត្រីវាយបកមកវិញថា ទីលានផ្សារមេឃ នៃផ្សារទាំង២ គឺផ្សារចម្ការគ និងផ្សារសិរីសោភ័ណ នៅក្រុងសិរីសោភ័ណនោះ ត្រូវបានម្ចាស់ផ្សារ និងជាអ្នកដេញភាស៊ីផ្សារនោះ អង្កន់លក់និងជួលឲ្យអ្នកលក់ឥវ៉ាន់ផ្សេងៗអស់ហើយ ពោលគឺ គ្មាន កន្លែងលក់បន្លែ ត្រីសាច់ និងទំនិញតាមកញ្ច្រែង កញ្ជើ ល្អីអីតទៅទៀតឡើយ៕
Source: Kampuchea Thmey Daily
0 Comments